កម្មករ​វីងស្តាស៊ូ​តវ៉ា​បិទ​ផ្លូវ​ជាតិ​លេខ​៣


កំពង់ស្ពឺៈ កម្មករ​រាប់​រយ​នាក់​បាន​នាំ​គ្នា​បិទ​ផ្លូវ​ជាតិ​លេខ ៣ នៅ​ខាង​មុខ​រោងចក្រ វីងស្តាស៊ូ ក្នុង ស្រុក​គងពិសី ចាប់​តាំង​ពី​ម៉ោង ៧ ព្រឹក ដល់​ម៉ោង ៤ រសៀល​កាល​ពី​ថ្ងៃ​ម្សិលមិញ បន្ទាប់​ពី​ក្រុមហ៊ុន​បាន​គំរាម​លុប​ឈ្មោះ​កម្មករ​ណា​ដែល​ធ្វើ​ការ​តវ៉ា​មិន​ព្រម​ចូល​ធ្វើ​ការ។

អ្នក​នាង បិន ស្រីមុំ ជា​កម្មករ​កាត់ដេរ ដែល​បាន​ចូល​រួម​ធ្វើ​ការ​តវ៉ា​តាំង​ពី​ថ្ងៃ ទី​២៥ ខែ​មេសា រហូត​មក​ដល់​ពេល​នេះ​បាន​ឲ្យ​ដឹង​ថា កម្មករ​បាន​សម្រេច​ធ្វើ​ការ​បិទ​ផ្លូវ​បន្ទាប់​ពី​បុគ្គលិក​ក្រុមហ៊ុន​បាន​ចេញ​មក​ប្រកាស​ពី​សេចក្តី​សម្រេច​របស់​ក្រុមហ៊ុន ដោយ​បាន​កាត់​ប្រាក់​ក្នុង​អំឡុង​ពេល​តវ៉ា។

អ្នក​នាង ស្រីមុំ ថ្លែង​ថា៖ «យើង​ទាមទារ​ឲ្យ​ក្រុមហ៊ុន​ផ្តល់​លុយ​ទ្រទ្រង់​សុខភាព​ចំនួន ៥ ដុល្លារ ថ្លៃ​បាយ​ពេល​ល្ងាច​ចំនួន ២០០០ រៀល​កុំ​ឲ្យ​អ្នក​គ្រប់​គ្រង​ចិន និង​ខ្មែរ ប្រើ​ពាក្យ​សម្ដី​តិះ​ដៀល ជេរ​មក​លើ​កម្មករ និង​សុំ​កុំ​ឲ្យ​ក្រុមហ៊ុន​កាត់​ប្រាក់​ក្នុង​អំឡុង​ពេល​ពួក​គេ​ធ្វើ​ការ​តវ៉ា»។

ក្នុង​ពេល​តវ៉ា​កម្មករ​បាន​យក​ថង់​ទឹក​អំពៅ ស្នូល​ពោត និង​ដុំ​ថ្ម​តូចៗ​គប់​ទៅ​លើ​រោងចក្រ តែ​មិន​បណ្តាល​ឲ្យ​មាន​ការ​ខូច​ខាត​អ្វី​ទេ។ ចំណែក​ឯ​កម្លាំង​សមត្ថកិច្ច​ក៏​មិន​បាន​រារាំង​ឬ​បណ្តេញ​កម្មករ​ចេញ​ពី​ផ្លូវ​ជាតិ​ដែរ។

លោក ម៉ៅ ស៊ីសុង ប្រធាន​រដ្ឋបាល​រោងចក្រ វីងស្តាស៊ូ បាន​ថ្លែង​ថា ក្រុមហ៊ុន​របស់​លោក​បាន​ផ្តល់​ឱកាស​ច្រើន​ដល់​កម្មករ តែ​ពួក​គេ​មិន​ទទួល​យក។ លោក​អភិបាល​រង​ខេត្ត និង​ថ្នាក់​ដឹក​នាំ​ខេត្ត​ជាច្រើន​នាក់​រួម​ជាមួយ​នឹង​មន្រ្តី​ក្រសួង ការងារ បាន​ចុះ​មក​ធ្វើ​អន្តរាគមន៍ នៅ​រោងចក្រ​ហើយ​រោងចក្រ​បាន​ទុក​ឱកាស​មួយ​ថ្ងៃ​ទៀត គឺ​ថ្ងៃ​អង្គារ​នេះ ដើម្បី​ឲ្យ​កម្មករ​ចូល​ធ្វើ​ការ​វិញ។

លោក​បាន​ឲ្យ​ដឹង​ថា ក្រុមហ៊ុន​យល់​ព្រម​ផ្តល់​ជូន​នូវ​ប្រាក់​បាយ​ល្ងាច ២០០០ រៀល ប្រាក់​ទ្រទ្រង់​សុខភាព តែ​ក្រុមហ៊ុន​មិន​អាច​ឲ្យ​ពួក​គាត់​នូវ​ប្រាក់​ពេល​កូដកម្ម​បាន​ទេ​ដោយ​សារ​ពួក​គេ​មិន​បាន​ធ្វើ​ការ​ហើយ​ក្រុមហ៊ុន​មិន​មាន​លទ្ធភាព​ផ្តល់​ឲ្យ​ឡើយ។ លោក ស៊ីសុង បាន​ព្រមាន​ថា ប្រសិន​បើ​ក្នុង​រយៈ​ពេល​មួយ​ថ្ងៃ​ទៀត ពួក​គេ​នៅ​តែ​មិន​ព្រម​ចូល​ធ្វើ​ការ រោងចក្រ​នឹង​លុប​ឈ្មោះ​ពួក​គេ​ចេញ។

លោក ចឹក បូរិន ប្រធាន​ការិយាល័យ​ការងារ​នៃ​មន្ទីរ​ការងារ ខេត្ត​កំពង់ស្ពឺ បាន​ឲ្យ​ដឹង​ថា មន្ទីរ​ការងារ បាន​ចុះ​ជួយ​ធ្វើ​អន្តរាគមន៍​ជាច្រើន​ដង តែ​នៅ​តែ​មិន​អាច​ផ្សះ​ផ្សា​បាន។

លោក​បាន​ថ្លែង​ថា៖ «កម្មករ​មិន​បាន​គោរព​ទៅ​តាម​ដីកា​រក្សា​ការពារ​របស់​តុលាការ​ខេត្ត ដែល​បង្គាប់​ឲ្យ​ពួក​គេ​ចូល​ធ្វើការ​វិញ​ទេ ហើយ​ពួក​គេ ក៏​មិន​បាន​ស្តាប់​ទៅ​នឹង​ការ​អន្តរាគមន៍​ពី​មន្ទីរ​យើង​ដែរ»៕

ព័ត៌មានថ្មីៗ