កម្មករសន្លប់ ដែលត្រូវបានបញ្ជូនមកមន្ទីរពេទ្យបង្អែកខេត្តកោះកុង កាលពីថ្ងៃទី៦ វិច្ឆិកា។ រូបថត រដ្ឋបាលខេត្តកោះកុង
បន្ទាយមានជ័យៈ កម្មករចំនួន ២៨ នាក់ ក្នុងនោះស្ត្រីមានផ្ទៃពោះ ៦ នាក់ នៃរោងចក្រកាត់ដេរសម្លៀកបំពាក់ឈ្មោះ KKN នៅខេត្តកោះកុង បានដួលសន្លប់ កាលពីថ្ងៃទី ៦ វិច្ឆិកា បន្ទាប់ពីពួកគេ បានឮសំឡេងកណ្តឹងរោទិ៍ប្រកាសអាសន្ន ខណៈកម្មករកំពុងហាត់ប្រាណរយៈពេល ១៥ នាទី មុនពេលចាប់ផ្តើមការងារពេលព្រឹក។ នេះបើតាមលោកយក់ សង្វាត ប្រធានមន្ទីរការងារខេត្តកោះកុង ឲ្យដឹង ថ្ងៃទី ៧ វិច្ឆិកា នេះ។
ទោះយ៉ាងណា លោក យក់ សង្វាត បញ្ជាក់ថាលោកមិនទាន់បានដឹងពីហេតុផល ដែលបណ្តាលឲ្យកណ្តឹងរោទិ៍ ដែលបង្កឲ្យកម្មករភ័យភ្ញាក់ផ្អើលរហូតសន្លប់នោះទេ ប៉ុន្តែលោកថា ប្រហែលវាអាចខុសបច្ចេកទេស។
លោកបន្ថែមថា នៅវេលាព្រឹក កម្មករមិនទាន់ចូលធ្វើការទេ ដោយពួកគេនៅហាត់ប្រាណប្រហែល ១៥ នាទីសិន បន្ទាប់មកទើបពួកគេចូលធ្វើការ ហើយថា រោងចក្រខាងលើនេះ កន្លងមកក៏ធ្លាប់មានកម្មករដួលសន្លប់អ៊ីចឹងដែរ ដែលក្នុងរយៈពេល ២ ឆ្នាំនេះ កម្មករសន្លប់ ៣ ដងហើយ។ លោកក៏បានឲ្យដឹងដែរថា រោងចក្រនេះផលិតសម្លៀកបំពាក់កីឡា ដែលមានកម្មករជាង ៦ ០០០ នាក់ បាននិងកំពុងបំពេញការងារ។
.jpg)
លោកសង្វាត បញ្ជាក់ថា៖ «នៅក្នុងរោងចក្រមានភ្នាក់ងារ ដែលមើលលើសុវត្ថិភាព ដែលក្រុមហ៊ុនជួលមក។ ប៉ុន្តែក្រោយពីមានបញ្ហាកើតឡើង យើងបានចុះទៅផ្ទាល់ ហើយបានប្រជុំជាមួយតំណាងក្រុមហ៊ុនឲ្យបា្រប់ពីហេតុផល។ យើងតែងតែជំរុញឲ្យពិនិត្យឡើងវិញរឿងនេះ គឺកើតឡើងដោយចៃដន្យ»។
លោកបន្ថែមថា៖ «កម្មករភ័យឃើញគ្នា ហើយជួយគ្នាបន្ទាប់មកសន្លប់ខ្លួនឯង។ អ្នកខ្លះគាត់ខ្សោយហើយក៏ដួលសន្លប់ទៅដោយសារគាត់មើលឃើញគ្នា។ គាត់ចូលរធ្វើការឡើងវិញស្អែក។ យើងមានវិធានការរោងចក្របានធ្វើកិច្ចសន្យាជាមួយយើង។ អុំទូករយៈពេល៣ថ្ងៃគាត់ [រោងចក្រ] នឹងអោយក្រុមអ្នកជំនាញមកពិនិត្យបញ្ហាហ្នឹង»។
លោក ហៃ ឡៃសុន ប្រធានមន្ទីរពេទ្យបង្អែកខេត្តកោះកុង ឲ្យដឹងថា មានកម្មករ ២៨ នាក់បានចូលមកសម្រាកនៅមន្ទីរពេទ្យកាលពីម្សិលមិញ។
លោកនិយាយថា៖ «ពេលកណ្តឹងរោទិ៍គាត់ភ័យដល់មានអ្នកខ្លះគាត់ខ្សោយអ៊ីចឹងទៅគាត់សន្លប់។ នៅក្នុងហ្នឹងមានស្រ្តីផ្ទៃពោះចំនួន ៦ នាក់។ យើងបានមើលអេកូអត់មានអ្វីទេ គាត់នៅចន្លោះគភ៌អាយុ ១ ខែទៅ ២ ខែ។ គិតមកដល់ថ្ងៃនេះយើងនៅសល់មនុស្ស ២ នាក់គាត់នៅវិលមុខនិងធីងធោង។ យើងដាក់ឲ្យគាត់អុកស៊ីហ្សែនអោយគាត់និងដាក់ថ្នាំកុំឲ្យគាត់រន្ធត់»។
កាលពីខែ មករា ឆ្នាំ ២០១៨ មានកម្មករប្រមាណ ១២០ នាក់ក៏បានដួលសន្លប់ដោយសារក្លិនផ្សែងប្រេងពីអាប៊ុល ដែលនៅទីធ្លារោងចក្រនៅក្នុងរោងច្រកដែលផ្គត់ផ្គង់ឲ្យក្រុមហ៊ុនម៉ាកល្បី Adidas ដែលជាកម្មសិទ្ធិរបស់ថៃ។
