កសិករថៃម្នាក់ កំពុងបើកបរគ្រឿងចក្រ ភ្ជួរដីស្រែនៅតាមព្រំដែន ត្រូវបានអាជ្ញាធរខ្មែរបញ្ឈប់ដើម្បីសាកសួរ។ រូបថត នគរបាល
បន្ទាយមានជ័យៈ មន្ត្រីនគរបាលល្បាតតាមបណ្ដោយព្រំដែនកម្ពុជា-ថៃ កាលពីសប្ដាហ៍មុន បានបញ្ឈប់សកម្មភាពកសិករថៃម្នាក់ ដែលកំពុងប្រើគ្រឿងចក្រភ្ជួរដី នៅក្នុងតំបន់ដែលមានព្រំដែនមិនច្បាស់លាស់ ត្រង់បង្គោលសីមាលេខ ៤៣ ស្ថិតក្នុងភូមិសាស្ត្រភូមិព្រៃចាន់ និងភូមិអូរបីជាន់ ក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
ទោះយ៉ាងណាក៏ដោយ កម្លាំងល្បាតមិនបានចាប់ឃាត់ខ្លួនកសិករថៃរូបនោះ ឬរឹបអូសយកត្រាក់ទ័រធ្វើជាវត្ថុតាងនោះទេ គឺគ្រាន់តែបញ្ឈប់សកម្មភាព ហើយអនុញ្ញាតឲ្យត្រឡប់ទៅវិញ ក្រោយពីមានការសម្របសម្រួលពីថ្នាក់លើ ក៏បានអនុញ្ញាតឲ្យពួកគេចូលបង្កបង្កើនផលនៅលើទីតាំងដី ដែលពួកគេធ្លាប់ដាំដុះតាំងពីមុនមក។
លោក ស៊ឹម ធី នាយរងប៉ុស្តិ៍រិទ្ធីសែននៃអង្គភាពនគរបាលវរៈការពារព្រំដែនលេខ ៩១១ ប្រចាំតំបន់៥ បានប្រាប់ ភ្នំពេញ ប៉ុស្តិ៍ នៅថ្ងៃ ១៧ ខែឧសភាថា កាលពីរសៀលថ្ងៃទី ១៤ ខែនេះ កម្លាំងវរៈការពារព្រំដែនលេខ ៩១១ បានសហការជាមួយកម្លាំងយោធានៃវរសេនាតូចលេខ ៥០៣ ចុះល្បាត តាមជួរបន្ទាត់ព្រំដែន ហើយបានប្រទះឃើញប្រជាកសិករថៃម្នាក់ កំពុងបើកត្រាក់ទ័រភ្ជួរដី នៅចំណុចចន្លោះបង្គោលឡាក់ (បង្គោលសីមា) លេខ ៤៣-៤៤ ស្ថិតក្នុងភូមិសាស្ត្រភូមិព្រៃចាន់ និង ភូមិអូរបីជាន់ នៃឃុំអូរបីជាន់ស្រុកអូរជ្រៅ។
.jpg)
លោក ធី បានបញ្ជាក់ថា៖ «កម្លាំងកងល្បាតរបស់យើង បានសម្រេចបញ្ឈប់សកម្មភាពរបស់កសិករថៃម្នាក់នោះជាបណ្ដោះអាសន្ន បើទោះជាកសិករថៃរូបនោះអះអាងថា ដីស្រែដែលគាត់បានភ្ជួររាស់នោះ ជាដីដែលគាត់បង្កបង្កើនផលស្រូវតាំងពីដើមរហូតមកក្ដី។ បន្ទាប់មកខ្ញុំបានរាយការណ៍ពីករណីនេះប្រាប់ទៅថ្នាក់លើ។ ក្រោយមានការសម្របសម្រួល ពីថ្នាក់លើ ក៏បានអនុញ្ញាតឲ្យពួកគេចូលបង្កបង្កើនផលនៅលើទីតាំងដី ដែលពួកគេធ្លាប់ដាំដុះតាំងពីមុនមក»។
លោក ស៊ឹម ធី បានអះអាងថា កសិករថៃរូបនោះ បានភ្ជួរដីរួចរាល់ទំហំជាង ២ ហិកតា លើផ្ទៃដីសរុបទំហំ ២២៦ ហិកតា ដែលស្ថិតនៅក្នុងតំបន់មិនច្បាស់លាស់ នៃចំណុចបង្គោលឡាក់លេខ ៤៣-៤៤ ដែលតំបន់នោះនៅមិនទាន់មានការសម្របសម្រួលរកដំណោះស្រាយពីគណៈកម្មការព្រំដែននៃប្រទេសទាំង ២ (កម្ពុជា-ថៃ)នៅឡើយ។
លោក កេង លីម ប្រធានកងល្បាតយោធាការពារព្រំដែន នៃវរៈសេនាតូចលេខ ៥០៣ ដែលឈរជើងនៅចំណុចភូមិសាស្ត្របង្គោលឡាក់លេខ ៤៣ បានប្រាប់ ភ្នំពេញ ប៉ុស្តិ៍ នៅថ្ងៃទី ១៧ ខែឧសភាថា ជារៀងរាល់ឆ្នាំ កសិករថៃបាននាំគ្នាចូលមកធ្វើស្រែ ដាំពោត និង សណ្ដែកនៅក្នុងតំបន់មិនច្បាស់លាស់នេះ ដោយអះអាងថា ដីក្នុងតំបន់នេះជាដីដែលពួកគេបង្កបង្កើនផលតាំងពីទសវត្សរិ៍ឆ្នាំ ១៩៩០ មក។
លោកបានបន្តថា កន្លងមកប្រជាកសិករខ្មែរ ដែលរស់នៅតាមតំបន់ជួរព្រំដែននៃភូមិសាស្ត្រ បង្គោលសីមាលេខ ៤៣ នេះ ក៏ធ្លាប់ធ្វើការតវ៉ាប្រឆាំងនឹងកសិករថៃ ដែលបានចូលមកបង្កបង្កើនផលនៅលើទីតាំងដីទំហំ ២២៦ ហិកតា នោះផងដែរ ដោយស្នើសុំឲ្យអាជ្ញាធរខ្មែរ ហាមឃាត់ពួកគេកុំឲ្យចូលដាំដុះរហូតដល់មានដំណោះស្រាយពីគណៈកម្មការដោះស្រាយវិវាទព្រំដែន នៃប្រទេសទាំងពីរ។
លោកបានបន្តថា៖«ឥឡូវនេះកម្លាំងយើងខ្ញុំ បានពិនិត្យឃើញកសិករថៃចូលមកភ្ជួររាស់ដាំដុះលើដីនោះប្រមាណ៣០ភារយ នៃផ្ទៃដីសរុប ២២៦ ហិកតា។ ទោះយ៉ាងណាកម្លាំងយើង កំពុងបន្តឃ្លាំមើលនូវសកម្មភាពរបស់កសិករថៃទាំងនោះ។ យើងនឹងចាត់វិធានការតាមច្បាប់របស់កម្ពុជាយើងប្រសិនពួកគេឈូសឆាយចូលមកហួសពីតំបន់ដែលពួកគេធ្លាប់ដាំដុះនេះ»។
ស្រដៀងគ្នានេះ លោក ស៊ា សៅឌី នាយប៉ុស្តិ៍ព្រៃគុកនៃវរៈការពារព្រំដែន ៩១១ ដែលមានទីតាំងស្ថិតនៅភូមិទំនប់ក ៥ សង្កាត់-ក្រុងប៉ោយប៉ែត បានប្រាប់ ភ្នំពេញ ប៉ុស្តិ៍ថា កាលពីរសៀលថ្ងៃទី ១៥ ឧសភា ក្នុងពេលចុះល្បាតត្រួតពិនិត្យ ការលួចឆ្លងដែនខុសច្បាប់ របស់ពលករចំណាកស្រុកពីថៃចូលកម្ពុជា ដោយគេចវេះពីការធ្វើចត្តាឡីស័ក កម្លាំងរបស់លោក បានពិនិត្យឃើញមានការចូលលួចកាប់គាស់ដាំដុះដំណាំមួយចំនួននៅតាមជួរបន្ទាត់ព្រំដែន ដែលសង្ស័យជាអំពើរបស់ពលរដ្ឋថៃ។
លោកបានថ្លែងថា៖ «យើងឃើញមានការលួចដាំដំណាំ ចេក ស្វាយ ឫស្សី និងដើមអាកាស្យា នៅក្នុងព្រៃនៃជួរបន្ទាត់ព្រំដែនក្នុងទឹកដីកម្ពុជាយើង។ យើងសង្ស័យជាសកម្មភាពរបស់ពលរដ្ឋថៃ ទោះយ៉ាងណាយើងកំពុងដាក់កម្លាំងលួចឃ្លាំមើលបន្តទៀត ដើម្បីចាត់វិធានការតាមផ្លូវច្បាប់»៕
