ភ្នំពេញៈ រដ្ឋមន្ត្រីក្រសួងព័ត៌មានលោក ខៀវ កាញារីទ្ធ ពីម្សិលមិញអះអាងថា ការរីករាលដាលព័ត៌មានក្លែងក្លាយ (Fake News) គឺជាកត្ដារាំងស្ទះដល់សិទ្ធិទទួលព័ត៌មានរបស់ពលរដ្ឋកម្ពុជា ដោយលោកជំរុញឲ្យគ្រប់ប្រព័ន្ធផ្សព្វផ្សាយប្រឆាំងព័ត៌មានក្លែងក្លាយ ហើយរាយការណ៍ព័ត៌មានពិត ខណៈសង្គមស៊ីវិលស្នើឲ្យ ពន្លឿនការអនុម័តច្បាប់ស្ដីពីសិទ្ធិទទួលព័ត៌មានឲ្យបានឆាប់។
លោកលើកឡើងបែបនេះក្នុងកិច្ចប្រជុំទិវាអន្តរជាតិសម្រាប់សិទ្ធិទទួលបានព័ត៌មានជាសកលឆ្នាំ ២០១៩ នាថ្ងៃអង្គារក្រោមប្រធានបទ «សិទ្ធិទទួលព័ត៌មានដោយគ្មាននរណាម្នាក់ត្រូវបានបំភ្លេចចោល» ដើម្បីលើកកម្ពស់ការយល់ដឹងអំពីសិទ្ធិទទួលព័ត៌មានសម្រាប់អភិបាលកិច្ចប្រកបដោយតម្លាភាព និងគណនេយ្យភាព។ ជាតម្រូវការការចូលរួមរបស់សាធារណជនក្នុងការបង្កើតគោលនយោបាយសង្គម និងសេចក្ដីសម្រេចចិត្តនៃអភិបាលកិច្ច។ កម្មវិធីនេះមានការចូលរួមពីមន្ត្រីរដ្ឋាភិបាលតំណាងអង្គការសង្គមស៊ីវិលជាតិ និងអន្តរជាតិក៏ដូចជាអ្នកពាក់ព័ន្ធ និងប្រព័ន្ធផ្សព្វផ្សាយប្រមាណជិត ២០០ នាក់នៅសណ្ឋាគារសូហ្វីតែលភ្នំពេញ។
រដ្ឋមន្ត្រីព័ត៌មានរូបនេះថ្លែងថាការរីករាលដាលនៃព័ត៌មានមិនពិតបំផ្លើស ញុះញង់ និងជេរប្រមាថជាដើមតាមបណ្ដាញព័ត៌មានថ្មីនេះបានក្លាយជាការរំខានដល់សិទ្ធិទទួលបានព័ត៌មានរបស់ប្រជាពលរដ្ឋកម្ពុជា។ ថ្មីៗនេះរដ្ឋាភិបាលបានចេញសេចក្ដីសម្រេចបង្កើតឲ្យមានក្រុមគណៈកម្មការអន្តរក្រសួង រៀបចំសេចក្ដីព្រាងគោលនយោបាយក្របខ័ណ្ឌគ្រប់គ្រងសេដ្ឋកិច្ច ឌីជីថល (Digital) ដើម្បីធ្វើឲ្យសិទ្ធិទទួលព័ត៌មានមានភាពល្អប្រសើរ។
លោក ខៀវ កាញារីទ្ធ បញ្ជាក់ថា៖ «ប្រសិនបើយើងមិនបានប្រុងប្រយ័ត្ននោះ វានឹងបង្កឲ្យមានភាពចលាចលក្នុងសង្គម និងប៉ះពាល់ដល់ការអភិវឌ្ឍប្រទេសជាតិ។ ខ្ញុំឧទាហរណ៍ថា បើមានការផ្សព្វផ្សាយចោទទៅធនាគារមួយថាក្ស័យធន ឬត្រូវបិទ ហើយធម្មតា ធនាគារដំណើរការបានលុះត្រាមានការទុកចិត្តពីអតិថិជន ហើយភ្លាមៗនោះ បើគេផ្សាយអ៊ីចឹង ម្ចាស់ស្ថាប័ន ឬប្រព័ន្ធផ្សព្វផ្សាយមានវិជ្ជាជីវៈ ត្រូវតែបកស្រាយឲ្យបានឆាប់ ដើម្បីបង្ក្រាបព័ត៌មានក្លែងក្លាយហ្នឹង»។
លោកបន្ថែមថាចំពោះក្រសួងព័ត៌មាននៅតែជំរុញឲ្យប្រព័ន្ធផ្សព្វផ្សាយទាំងអស់ត្រូវចូលរួមប្រយុទ្ធប្រឆាំងព័ត៌មានក្លែងក្លាយក៏ដូចជាជំរុញឲ្យមន្ត្រីពាក់ព័ន្ធត្រូវឆ្លើយបំភ្លឺ ឬបកស្រាយឲ្យបានលឿនបំផុត ដើម្បីចៀសវាងបង្កចលាចលដល់សង្គមជាតិ។ ក្រៅពីនេះក្រសួងមហាផ្ទៃក៏មានច្បាប់ ចាត់វិធានការប្រឆាំងនឹងការផ្សព្វផ្សាយព័ត៌មានមិនពិតនេះដែរ។
លោក ប៉ែន បូណា ប្រធានក្លិបអ្នកកាសែតកម្ពុជា (CCJ) បានថ្លែងថាលោកគាំទ្រឲ្យមានការប្រយុទ្ធប្រឆាំងព័ត៌មានក្លែងក្លាយ ព្រោះវាអាចបង្កភាពអសន្ដិសុខសង្គម និងរាំងស្ទះដល់សិទ្ធិទទួលព័ត៌មាន។ ចំពោះច្បាប់ស្ដីពីសិទ្ធិទទួលព័ត៌មាននេះ លោកជំរុញឲ្យពន្លឿនការងារត្រួតពិនិត្យសេចក្ដីព្រាងច្បាប់សិទ្ធិទទួលព័ត៌មានផងដែរ។
លោកនិយាយថា៖ «ចាប់តាំងពីខ្ញុំចូលធ្វើជាអ្នកសារព័ត៌មានមកគឺមានរយៈពេលជិត ២០ ឆ្នាំហើយដោយជួបការលំបាកច្រើនក្នុងការប្រមូលព័ត៌មាន ឬសុំព័ត៌មានពីស្ថាប័នពាក់ព័ន្ធ។ ប៉ុន្ដែមួយរយៈចុងក្រោយនេះ វាមានការប្រែប្រួលគួរឲ្យកត់សម្គាល់។ ជាក់ស្ដែងមកដល់ពេលនេះយើងកំពុងរៀបចំបង្កើតច្បាប់ស្ដីពីសិទ្ធិទទួលព័ត៌មាន ខ្ញុំគិតថាវាចាំបាច់ណាស់យើង គួរពន្លឿនធ្វើវាឲ្យបានឆាប់»។
លោកស្រី Camilla Ottosson លេខាទី ១ ផ្នែកប្រជាធិបតេយ្យ និងសិទ្ធិមនុស្ស និងទីផ្សារការងារនៃស្ថានទូតស៊ុយអែតប្រចាំកម្ពុជាថ្លែងថានៅប្រទេសកម្ពុជា ការប្រារព្ធទិវាអន្តរជាតិសម្រាប់សិទ្ធិទទួលព័ត៌មានជាសកលពិតជាមានសារៈសំខាន់ណាស់ ដោយសារក្រសួងព័ត៌មានសហការជាមួយសង្គមស៊ីវិល និងអ្នកពាក់ព័ន្ធផ្នែកសារព័ត៌មាន ឬប្រព័ន្ធផ្សព្វផ្សាយកំពុងស្ថិតក្នុងដំណើរការនៃការធ្វើសេចក្ដីព្រាងច្បាប់មួយស្ដីពីសិទ្ធិទទួលព័ត៌មានក៏ដូចជាការប្រយុទ្ធប្រឆាំងព័ត៌មានក្លែងក្លាយដែរ។
លោកស្រីបញ្ជាក់ថា៖ «ការអនុម័តសេរីភាព និងច្បាប់នៃសិទ្ធិទទួលព័ត៌មានត្រូវបានកត់សម្គាល់ ថាជានិន្នាការពិភពលោកក្នុងទសវត្សរ៍ចុងក្រោយនេះ»។
លោក ឡាំ សុជាតិ នាយកអង្គការវិទ្យាស្ថានតស៊ូមតិ និងគោលនយោបាយ(API) ថ្លែងថាបច្ចុប្បន្នប្រជាជនកម្ពុជាមិនទាន់មានសិទ្ធិទទួលបានព័ត៌មានសាធារណៈដែលធានាដោយច្បាប់សិទ្ធិទទួលព័ត៌មាននៅឡើយ។ វាធ្វើឲ្យស្ថាប័ននីតិប្បញ្ញត្តិ នីតិប្រតិបត្តិ និងតុលាការនៅមានភាពស្ទាក់ស្ទើរក្នុងការបើកចំហ និងផ្សព្វផ្សាយព័ត៌មានសំខាន់ៗជាច្រើនដោយមូលហេតុមានច្រើនក្នុងនោះមានមូលហេតុចម្បងមួយគឺខ្វះច្បាប់ស្ដីពីសិទ្ធិទទួលបានព័ត៌មាន។
លោកថា៖ «រដ្ឋាភិបាល និងស្ថាប័នសភាកម្ពុជាគួរប្រញាប់អនុម័តច្បាប់សិទ្ធិទទួលព័ត៌មានឲ្យបានឆាប់ស្របតាមបទដ្ឋានអន្តរជាតិ និងធានាបាននូវសិទ្ធិសេរីភាពក្នុងការទទួលព័ត៌មានដើម្បីដោះស្រាយបញ្ហាប្រឈមនានា និងអភិវឌ្ឍលើគ្រប់វិស័យដោយតម្លាភាព»។
គួររំឭកថា សេចក្ដីព្រាងច្បាប់ស្ដីពីសិទ្ធិទទួលព័ត៌មាននេះមាន ៩ ជំពូក និង ៣៨ មាត្រាដោយបានចំណាយពេលប្រមាណ ៣ ឆ្នាំក្នុងការរៀបចំដែលទើបតែបញ្ចប់នាពេលថ្មីៗនេះ ហើយគ្រោងបញ្ជូនទៅទីស្ដីការគណៈរដ្ឋមន្ត្រី ដើម្បីពិភាក្សាបន្តទៀត។ ការតាក់តែងច្បាប់នេះមានការចូលរួមពីភាគីអង្គការសង្គមស៊ីវិល និងស្ថាប័នដែលធ្វើការទាក់ទងនឹងវិស័យព័ត៌មានបានពិភាក្សាគ្នាជាមួយក្រសួងជំនាញ៕