កម្មករចេញពីធ្វើការនៅរោងចក្រមួយក្នុងខណ្ឌដង្កោ នៅថ្ងៃទី១៦ខែឧសភា ឆ្នាំ២០២១។ ហុង មិនា
ភ្នំពេញៈ ទំព័រហ្វេសប៊ុករបស់ក្រសួងការងារ និងបណ្ដុះបណ្ដាលវិជ្ជាជីវៈ បានបង្ហាញវីដេអូពីរបៀប Upload ដល់បណ្ដារោងចក្រទាំងអស់ ឱ្យបញ្ជូនបញ្ជីឈ្មោះបច្ចុប្បន្នភាព របស់កម្មករ និយោជិត ឱ្យចូលទៅក្នុងប្រព័ន្ធទិន្នន័យរួមរបស់ក្រសួងការងារ ដើម្បីទទួលបានអត្ថប្រយោជន៍នានាពីរាជរដ្ឋាភិបាល។
ការបង្ហាញវីដេអូនេះ ធ្វើឡើងក្រោយពី ក្រសួងការងារ កាលពីថ្ងៃទី ១២ ខែឧសភា បានជូនដំណឹងដល់បណ្តារោងចក្រផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប ឲ្យធ្វើបច្ចុប្បន្នភាពលេខទូរស័ព្ទរបស់កម្មករនិយោជិតរបស់ខ្លួនឲ្យបានមុនថ្ងៃទី ២៧ ខែឧសភា។
ក្រសួងការងារបញ្ជាក់ថា៖ «ការធ្វើបច្ចុប្បន្នភាពនេះ គឺដើម្បីងាយស្រួលក្នុងការជួយគាំទ្រគ្រួសារពលរដ្ឋដែលកំពុងជួបប្រទះនូវការខ្វះខាតក្នុងអំឡុងពេល ឆ្លងរីករាលដាលជំងឺកូវីដ ១៩»។
.jpg)
ក្រៅពីភ្ជាប់វីដេអូណែនាំជាង ២២ នាទីនេះ ក្រសួងការងារ ក៏បានណែនាំឲ្យបណ្តារោងចក្រដែលមានមន្ទិលសង្ស័យ ឬមិនអាចបំពេញតាមការណែនាំនេះបាន អាចទាក់ទងបន្ថែមទៅលេខ ១២៩៧ ដោយឥតគិតថ្លៃ នៅរៀងរាល់ម៉ោងធ្វើការ។
លោក កាំង ម៉ូនីកា អគ្គលេខាធិការរង សមាគមរោងចក្រកាត់ដេរនៅកម្ពុជា បានប្រាប់ ភ្នំពេញ ប៉ុស្តិ៍ នៅថ្ងៃ ១៧ ឧសភាថា សមាគមតែងតែបានណែនាំដល់សមាជិក ឲ្យអនុវត្តតាមការណែនាំរបស់ក្រសួការងារ ក្នុងការធ្វើបញ្ជីឈ្មោះបច្ចុប្បន្នភាពកម្មករនិយោជិត ផ្ញើទៅក្រសួងឲ្យបានទាន់ពេលវេលា។
ប៉ុន្តែចំពោះការបញ្ជូនបញ្ជីឈ្មោះបច្ចុប្បន្នភាពរបស់កម្មករ នៅតាមបណ្តាលរោងចក្រមួយចំនួនជួបការលំបាក ដោយសារតែកម្មករនិយោជិតមួយចំនួន បានប្តូរលេខទូរស័ព្ទ ហើយចំពោះកម្មករចូលធ្វើការងារថ្មី ពុំមានប័ណ្ណជាសមាជិក បសស ព្រោះតែ បសស ផ្អាកការទទួលធ្វើប័ណ្ណក្រោយព្រឹត្តិការណ៍ ២០ កុម្ភៈ និងកម្មករនិយោជិតខ្លះ ក៏បានបាត់អត្តសញ្ញាណប័ណ្ណ ហើយមិនអាចប្រើប្រាស់ច្បាប់ថតចម្លងបាន។
លោកបញ្ជាក់ថា៖ «ជាការត្រឹមត្រូវណាស់ ដែលការទូទាត់ប្រាក់ឧបត្ថម្ភផ្សេងៗ ត្រូវយោងលើឯកសារមានតម្លៃច្បាប់ត្រឹមត្រូវ ពីព្រោះអ្នកចំណាយក៏ត្រូវទទួលខុសត្រូវ លើការចំណាយរបស់ខ្លួនដែរ ព្រោះមានការធ្វើសវនកម្មត្រឹមត្រូវក្រោយការចំណាយ ដែលនេះជាយន្តការប្រតិសមតុល្យ»។
ក្រសួងការងារ និងបណ្តុះបណ្តាលវិជ្ជាជីវៈ ធ្លាប់បានព្រមានថា ប្រសិនបើបងប្អូនកម្មករនិយោជិតណាម្នាក់ខកខាន ឬមិនបានផ្តល់លេខទំនាក់ទំនងតាមការកំណត់របស់ក្រសួង នោះបងប្អូនកម្មករនិយោជិតនោះ នឹងត្រូវទទួលខុសត្រូវដោយខ្លួនឯងចំពោះការខកខានមិនទទួលបានជំនួយសង្គមជាសាច់ប្រាក់ ដែលបានផ្តល់ជូនដោយរដ្ឋាភិបាល៕
វីដេអូ៖
