ភ្នំពេញៈ ក្រសួងយុត្តិធម៌បានបដិសេធថា មិនមានអំពើពុករលួយ និងភាពមិនប្រក្រតីនៅក្នុងការប្រឡងសិស្សចៅក្រមជំនាន់ទី ១០ ដែលបានប្រព្រឹត្តទៅកាលពីខែធ្នូទេ ប៉ុន្តែយល់ព្រមទទួលយកនូវចំណុចកែលម្អក្នុងវិស័យយុត្តិធម៌ បន្ទាប់ពីបានឆ្លើយតទល់គ្នាជាមួយសមាជិកឧត្តមក្រុមប្រឹក្សាពិគ្រោះ និងផ្តល់យោបល់កាលពីថ្ងៃអង្គារ។
បន្ទាប់ពីទទួលបានការអនុញ្ញាតពីលោកនាយករដ្ឋមន្ត្រី ហ៊ុន សែន តបតាមការអញ្ជើញពីប្រធានគណបក្សខ្មែរក្រោកតាមរយៈឧត្តមក្រុមប្រឹក្សាពិគ្រោះ និងផ្តល់យោបល់កាលពីថ្ងៃអង្គារលោក អង្គ វង្ស វឌ្ឍានា រដ្ឋមន្ត្រីក្រសួងយុត្តិធម៌បានលើកឡើងក្នុងទំព័រហ្វេសប៊ុកផ្លូវការរបស់ក្រសួងថា ការប្រទ្បងជ្រើសរើសសិស្សចៅក្រមជំនាន់ទី ១០ នេះបានប្រព្រឹត្តទៅដោយគ្មានអំពើពុករលួយ និងត្រឹមត្រូវស្របតាមច្បាប់។
ជាមួយគ្នានេះលោក អង្គ វង្ស វឌ្ឍានា បានបកស្រាយពីការរៀបចំប្រឡងនេះថា បានធ្វើឡើងក្រោមការពិនិត្យយ៉ាងល្អិតល្អន់ដោយមានការទទួលស្គាល់ពីអង្គភាពប្រឆាំងអំពើពុករលួយព្រមទាំងរាជបណ្ឌិត្យសភាវិជ្ជាជីវៈតុលាការ។
លោកថា៖ «ចំពោះករណីនេះ ប្រតិភូក្រសួងយុតិ្តធម៌បានបកស្រាយបំភ្លឺយ៉ាងច្បាស់លាស់ជូនឧត្តមក្រុមប្រឹក្សាពិគ្រោះ និងផ្តល់យោបល់រួចហើយ។ ប្រតិភូក្រសួងយុតិ្តធម៌បានធ្វើការបកស្រាយបំភ្លឺអំពីគោលការណ៍សំខាន់ៗ ដែលធានាបានថា ការប្រទ្បងប្រជែងជ្រើសរើសសិស្សចៅក្រម ប្រព្រឹត្តទៅដោយតម្លាភាព ត្រឹមត្រូវ សុក្រឹត និងភាពអាចជឿទុកចិត្តបានដោយផ្អែកលើបទបញ្ជាផ្ទៃក្នុង និងនីតិវិធីនៃការប្រទ្បងប្រជែង»។
ក្រៅពីបកស្រាយករណីនេះលោក អង្គ វង្ស វឌ្ឍានា បានអះអាងថា ក្រសួងយុតិ្តធម៌ក៏បានទទួលនូវមតិយោបល់ ព័ត៌មាន និងសំណូមពរពីប្រតិភូគណបក្សមួយចំនួនដែលបានលើកទ្បើងពីភាពមិនប្រក្រតីនៃការអនុវត្តនីតិវិធីច្បាប់ ភាពអសកម្ម និងបញ្ហាពុករលួយនៅក្នុងស្ថាប័នតុលាការផងដែរ។
លោកបន្ថែមថា៖ «ក្រសួងយុត្តិធម៌រីករាយ និងសូមស្វាគមន៍ទទួលយកនូវមតិយោបល់ និងសំណូមពរនានាពីសមាជិកនៃឧត្តមក្រុមប្រឹក្សាពិគ្រោះ និងផ្តល់យោបល់ដែលចាត់ទុកថានេះជាការចូលរួមចំណែក និងជាធាតុចូលយ៉ាងសំខាន់...»។
យ៉ាងណាក្ដីលោក វឌ្ឍនាសាប៊ុង ប្រធានគណបក្សខ្មែរក្រោក និងជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់បានប្រាប់ភ្នំពេញប៉ុស្តិ៍ពីម្សិលមិញថា ការអះអាងរបស់ក្រសួងយុត្តិធម៌នេះគ្រាន់តែជាការដោះសាប៉ុណ្ណោះ។ លោកថានឹងតាមដានបន្តទៀតលើអ្វីដែលលោកបានរកឃើញក្នុងវិស័យយុត្តិធម៌ដែលរដ្ឋមន្ត្រីក្រសួងនេះបានទទួលស្គាល់ និងសន្យាកែលម្អ។
លោកបញ្ជាក់ថា៖ «យើងទទួលបានភាពជោគជ័យនោះគឺការប្រឡងផ្ទៃក្នុងនៃការជ្រើសរើសចៅក្រម និងព្រះរាជអាជ្ញាក្រោយការជជែកដេញដោលជិត ១ ម៉ោងដោយទីបំផុត ក្រសួងយុត្តិធម៌បានទទួលស្គាល់ថា ពិតជាមានភាពខ្វះចន្លោះក្នុងការអនុវត្តច្បាប់ពិតប្រាកដមែន...»។
ឧត្តមក្រុមប្រឹក្សាពិគ្រោះ និងផ្តល់យោបល់ក៏បានលើកឡើងក្នុងសេចក្តីប្រកាសព័ត៌មានរបស់ខ្លួនផងដែរ ក្រោយបញ្ចប់កិច្ចពិភាក្សាដេញដោលកាលពីថ្ងៃអង្គារថា ភាពមិនប្រក្រតីបញ្ហាអសកម្ម ការរំលោភអំណាច និងអំពើពុករលួយដោយជំរុញឲ្យក្រសួងយុត្តិធម៌យកចិត្តទុកដាក់ទប់ស្កាត់ឲ្យមានប្រសិទ្ធភាព និងដាក់ទោសដល់បុគ្គលដែលបានប្រព្រឹត្ត។
ស្ថាប័ននេះបញ្ជាក់ថា៖ «ដោយសារតែមានអំពើមិនប្រក្រតីដោយបុគ្គលទើបសម្តេចតេជោ ផ្តួចផ្តើមគំនិតបង្កើតឧត្តមក្រុមប្រឹក្សាពិគ្រោះ និងផ្តល់យោបល់ដែលមានបំណងរួមគ្នាតែមួយដើម្បីផលប្រយោជន៍ប្រជាជនកម្ពុជាដោយឈរលើជំហរពង្រឹងនីតិរដ្ឋ... »។
ទន្ទឹមនេះឧត្តមក្រុមប្រឹក្សាពិគ្រោះ និងផ្តល់យោបល់ក៏សំណូមពរឲ្យក្រសួងយុត្តិធម៌ពង្រឹងដល់ស្ថាប័នអយ្យការឲ្យបំពេញការងារតាមច្បាប់ចៀសវាងការចាប់ឃុំខ្លួនភាគីទំនាស់ដីធ្លី ហើយផ្ទុយទៅវិញព្រះរាជអាជ្ញា ត្រូវរស់រវើកក្នុងការកសាងសំណុំរឿងព្រហ្មទណ្ឌ ជាបណ្តឹងអាជ្ញាពាក់ព័ន្ធនឹងអំពើហិង្សាលើរាងកាយជាដើម។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាបានលើកឡើងថា ជារួមយន្តការនេះហាក់មិនសូវមានការចាប់អារម្មណ៍នោះទេ។ លោកមិនរំពឹងថា យន្តការនេះមានប្រសិទ្ធភាពដែលអាចចូលរួមកែទម្រង់បានល្អប្រសើរជាងយន្តការចម្រុះក្នុងរដ្ឋសភាដោយមានសមាជិកមកពីគណបក្សច្រើននោះដែរ។
លោកបន្ថែមថា៖ «បើមានភាគីច្រើនដូចក្នុងសភាអីបានមានការសួរដេញដោលប្រកបដោយឥទ្ធិពលខ្លាំង។ បើទោះមានការយកចិត្តទុកដាក់ខ្លះ ប៉ុន្តែសម្រាប់ឧត្តមក្រុមប្រឹក្សាពិគ្រោះ និងផ្តល់យោបល់នេះគឺយើងឃើញពួកគេធ្វើការងារមិនស្ថិតក្នុងកម្រិតនៃការប្រកួតប្រជែងនោះទេ»៕