ភ្នំពេញៈ ក្រសួងធនធានទឹកនិងឧតុនិយមបានព្រមានថាបាតុភូតផ្គររន្ទះ និងខ្យល់កន្ត្រាក់នៅក្នុងឆ្នាំនេះ នឹងកើតមានច្រើនជាងឆ្នាំមុនៗ និងបានអំពាវនាវឲ្យពលរដ្ឋបង្កើនការប្រុងប្រយ័ត្ន ខណៈបាតុភូតទាំងនេះភាគច្រើនកើតឡើងនៅមុន និងអំឡុងពេលមានភ្លៀងធ្លាក់ ពិសេសភ្លៀងកក់ខែក្នុងរដូវប្រាំងនេះ ។
តាមសេចក្ដីជូនដំណឹងចុះថ្ងៃទី ១៦ ខែ មីនា ឆ្នាំ ២០១៩ ដែលភ្នំពេញប៉ុស្តិ៍ទទួលបានកាលពីម្សិលមិញ ក្រសួងធនធានទឹក និងឧតុនិយមបានបញ្ជាក់ថា ភ្លៀងកក់ខែនឹងចាប់ផ្ដើមធ្លាក់នៅទូទាំងផ្ទៃប្រទេសពីថ្ងៃទី ២១ ដល់ថ្ងៃទី ២៤ ខែមីនា ខាងមុខនេះ ហើយវានឹងនាំមកជាមួយនូវបាតុភូតផ្គររន្ទះ និងខ្យល់កន្ត្រាក់ផងដែរ។
ជាមួយគ្នានេះ សីតុណ្ហភាពនឹងថយចុះបន្តិចដោយខេត្តមួយចំនួននៅភាគខាងកើត ខាងត្បូងនៃប្រទេស កម្ពុជា រួមទាំងតំបន់មាត់សមុទ្រផង សីតុណ្ហភាពអតិបរមានឹងធ្លាក់មកនៅចន្លោះពី ៣០-៣២ អង្សាសេ ខណៈរាជធានីខេត្តខ្លះ សីតុណ្ហភាពនឹងធ្លាក់មកនៅក្នុងរង្វង់ ៣២-៣៥ អង្សាសេ។
កាលពីដើមសប្ដាហ៍មុន សីតុណ្ហភាពទូទៅនៅក្នុងប្រទេសកម្ពុជាបានឡើងដល់រង្វង់ពី ៣៦-៣៨ អង្សាសេគឺខ្ពស់ជាងមធ្យមភាគជាច្រើនឆ្នាំ និងខ្ពស់ជាងសីតុណ្ហភាពកាលពីឆ្នាំ ២០១៨។
ប៉ុន្តែកាលពីថ្មីៗនេះ ក្រសួងក៏បានព្រមានផងដែរពីការកើនកម្ដៅពី ១ ទៅ ២ អង្សាសេបន្ថែមទៀត បើធៀបនឹងមធ្យមភាគនៃបណ្ដាឆ្នាំមុនៗជាពិសេសចាប់ពីខែមេសារហូតដល់ចុងខែឧសភាខាងមុខនេះដែលសីតុណ្ហភាពនឹងឡើងដល់រង្វង់ពី ៤០-៤២ អង្សាសេ។
អ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា ក៏បានបញ្ជាក់ដែរថា៖ «ក្នុងចន្លោះពេលពីខែមេសា ដល់ចុងខែឧសភាខាងមុខនេះភ្លៀងកក់ខែនឹងកើតមានតិចតួច និងមានដោយកន្លែង ប៉ុន្តែបាតុភូតផ្គររន្ទះ និងខ្យល់កន្ត្រាក់នឹងកើតឡើងច្រើន ដូច្នេះសូមបង្កើនការប្រុងប្រយ័ត្នឲ្យបានខ្ពស់ចំពោះបាតុភូតទាំងនេះដែលអាចមានក្នុងអំឡុងពេលមេឃរកកល់ភ្លៀង»។
យោងតាមរបាយការណ៍ពីអាជ្ញាធរស្រុករមាសហែកខេត្តស្វាយរៀងដែលភ្នំពេញប៉ុស្តិ៍ទទួលបានកាលពីម្សិលមិញបានបញ្ជាក់ថា កាលពីយប់ថ្ងៃសុក្រ ទី១៥ ខែ មីនា ឆ្នាំ ២០១៩ មានផ្ទះពលរដ្ឋយ៉ាងតិច ៣ ខ្នងនៅភូមិរំដេង និងភូមិស្រះ ឃុំជ្រៃធំត្រូវបានដួលរលំ ខណៈមួយចំនួនទៀតខូចខាតដោយបានប៉ើងរបើកដំបូលបន្ទាប់ពីមានភ្លៀងកក់ខែលាយឡំនឹងខ្យល់កន្ត្រាក់។ ប៉ុន្តែពុំមានអ្នកស្លាប់ឬរបួសក្នុងហេតុការណ៍នោះទេ។
កាលពីដើមខែ មីនា នេះ លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានប្រាប់ភ្នំពេញប៉ុស្តិ៍ថា យ៉ាងហោចណាស់មានមនុស្សចំនួន ២ នាក់បានរងរបួស និងលំនៅឋានពលរដ្ឋជិត ២៥០ ខ្នងព្រមទាំងសាលារៀនចំនួន ៤ ខ្នង ទៀតបានរងការខូចខាតដោយសារតែបាតុភូតភ្លៀងលាយឡំជាមួយនឹងខ្យល់កន្ត្រាក់បានកើតឡើង ហើយខេត្តមួយចំនួនដែលបានរងផលប៉ះពាល់ខ្លាំងជាងគេ គឺខេត្តបាត់ដំបង ពោធិ៍សាត់ និងខេត្តរតនគិរី៕