ក្រសួង​បាន​ចែក​ប័ណ្ណកម្ម​សិទ្ធិ​ដី​ជូន​ពលរដ្ឋ​បាន​១៤​ម៉ឺន​ក្បាល​ដី


ភ្នំពេញៈ ប័ណ្ណ​កម្មសិទ្ធិ​ដីធ្លី​ចំនួន​១៤​ម៉ឺន​ប័ណ្ណ​បាន​ផ្តល់​ដល់​ដៃ​ប្រជា​ពលរដ្ឋ រួច​ហើយ តាម​គោល​នយោបាយ​ចាស់​សកម្មភាព​ថ្មី។ នេះ​បើ​តាម​ប្រកាស​ព័ត៌មាន​ក្នុង​សន្និបាត​បូក​សរុប​ការងារ​ឆ្នាំ ២០១២ និង​ទិសដៅ​ការ​ងារ​ឆ្នាំ​២០១៣ របស់​ក្រសួង​រៀបចំ​ដែន​ដី នគរូបនីយកម្ម និង​សំណង់ កាល​ពី​ថ្ងៃ​ពុធ​ម្សិលមិញ។

លោក​ឧបនាយក​រដ្ឋ មន្ត្រី ប៊ិន ឈិន ប្រធាន​អាជ្ញាធរ​ជាតិ​ដោះ​ស្រាយ​ទំនាស់​ដី​ធ្លី ដែល​ចូល​រួម​ក្នុង​សន្និបាត​នោះ​ថ្លែង​ថា ការងារ​វាស់​វែង​ដី​ធ្លី គឺជា​ការងារ​ដ៏​សំខាន់​ដែល​មាន​ក្នុង​គោល​នយោបាយ​របស់​រាជរដ្ឋាភិបាល​កម្ពុជា​ក្នុង​ការ​កាត់​បន្ថយ​ភាព​ក្រីក្រ។ ជម្លោះ​ដី​ធ្លី​នៅ​កម្ពុជា គឺ​ជា​រឿង​ស្មុគស្មាញ​យ៉ាង​ខ្លាំង និង​បាន​ចាក់​ឫស​ជ្រៅ​នៅ​ក្នុង​សន្តាន​ចិត្ត​ប្រជាជន​ម្នាក់​ៗ ជា​ពិសេស​អ្នក​រស់​នៅ​ទី​ជន​បទ ក្នុង​តំបន់​ដី​មាន​សក្ដានុពល ដី​ព្រៃ​សម្បទាន ដី​សម្បទាន​សេដ្ឋកិច្ច ដី​គម្រប​ព្រៃ​និង​តំបន់​មាន​ដីកា​ដក​ហូត​ពី​តុលាការ​ជាដើម​។ លោក​មាន​ប្រសាសន៍​ថា បើ​ទោះ​ជា​រាជរដ្ឋាភិបាល​កម្ពុជា​បាន​ចេញ​អនុក្រឹត្យ ០១ បង្កើត​ចលនា​យុវជន​ស្ម័គ្រចិត្ត​ដើម្បី​ជួយ​សម្រួល​សម្រាប់​ការងារ​នេះ​ ក៏​ដោយ ក៏​អង្គការ​និង​សង្គម​ស៊ីវិល​ជា​ច្រើន​នៅ​តែ​សម្តែង​ការ​ព្រួយបារម្ភ​ទាក់ទង​នឹង​បញ្ហា​នេះ​ដដែល។

តាម​របាយការណ៍​សន្និបាត​បង្ហាញ​ថា ក្នុង​ជំហាន​ទី១ នៃ​យុទ្ធនាការ​«ការ​អនុវត្ត​នយោបាយ​ចាស់​សកម្មភាព​ថ្មី លើ​វិស័យ​ដី​ធ្លី​របស់​រដ្ឋាភិបាល» ដែល​ចាប់​ផ្តើម​ពី​ខែ​មិថុនា ឆ្នាំ​២០១២ មក​ដល់​ពេល​នេះ សម្រេច​ការ​វាស់​ដី​បាន​៤៥​ម៉ឺន​ក្បាល​ដី​(ប្រមាណ​៧០​ម៉ឺន​ហិកតា) បិទ​ផ្សាយ​ជា​សាធារណៈ​នូវ​ទិន្នន័យ​ក្បាល​ដី បាន​ជាង​២១​ម៉ឺន​ក្បាល​ដី​ពាក់​ព័ន្ធ​នឹង​១២​ម៉ឺន​គ្រួសារ​និង​បាន​ចែក​ ប័ណ្ណ​កម្មសិទ្ធិ​ដល់​ដៃ​ប្រជា​ពលរដ្ឋ​បាន​ចំនួន​១៤​ម៉ឺន​ប័ណ្ណ។

លោក អ៊ឹម ឈុនលឹម រដ្ឋ​មន្ត្រី​ក្រសួង​រៀបចំ​ដែន​ដី នគរូបនីយកម្ម និង​សំណង់​ បាន​ថ្លែងថា វា​គឺជា​មោទនភាព​ដែល​រាជរដ្ឋាភិបាល​កម្ពុជា ដាក់​ចេញ​នូវ​គោល​នយោបាយ​ចាស់​សកម្មភាព​ថ្មី ដើម្បី​ធ្វើ​យ៉ាង​ណា​ដោះស្រាយ​បញ្ហា​ដី​ធ្លី​ឲ្យ​បាន​ឆាប់​រហ័ស។ លោក​បាន​បន្ត​ថា៖ ​«​បញ្ហា​ដី​ធ្លី​ គឺជា​រឿង​ដែល​មាន​លក្ខណៈ​រសើប​ខ្លាំង​ ដូច្នេះ​ ការ​ខិតខំ​របស់​ក្រុម​យុវជន​ស្ម័គ្រចិត្ត​ជាមួយ​នឹង​មន្ត្រី​ជំនាញ​ គឺ​ពិត​ជា​បាន​រួម​ចំណែក​យ៉ាង​ខ្លាំង​ក្នុង​ការ​ជួយ​បង្កើន​កម្រិត​ជីវភាព​ប្រជាជន និង​កាត់​បន្ថយ​ទំនាស់»។

លោក មាន​ប្រសាសន៍​ដែរ​ថា​៖​ «ជាក់​ស្តែង​តាម​ផែន​ការ​ដែល​បាន​កំណត់​ពី​មុន​មក ​គឺ​ត្រឹម​ចុង​ឆ្នាំ​២០១៣ ក្រសួង​ត្រូវ​សម្រេច​ការ​វាស់​វែង​ដី​ធ្លី​ឲ្យ​បាន​៣២​ភាគរយ ហើយ​នៅ​ចុង​ឆ្នាំ​២០១៥ ​ត្រូវ​សម្រេច​វាស់​វែង​ឲ្យ​បាន​៥៧​ភាគរយ ប៉ុន្តែ​ ជាក់​ស្តែង​គិត​ត្រឹម​ពេល​នេះ​ ក្រសួង​​​សម្រេច​បាន​៥៨​ភាគរយ​រួច​ហើយ»៕

ព័ត៌មានថ្មីៗ