នគរបាលខេត្តកណ្តាលត្រួតពិនិត្យទំនិញនាំចូលពីវៀតណាមកន្លងមក។ រូបថត នគរបាល
ភ្នំពេញៈ ក្រុមការងារ ១០០ រាត្រី បានអះអាងថា ទំនិញភាគច្រើនដែលនាំចូលពីប្រទេស វៀតណាម មកកម្ពុជាជាទំនិញអន់ អស់ជម្រើស គ្មានគុណភាព លួចបន្លំស្លាក និងមានសារជាតិគីមី ក៏ប៉ុន្តែក្រុមមន្ត្រីជំនាញត្រួតពិនិត្យទំនិញតាមច្រកព្រំដែនបានច្រានចោលការអះអាងនេះ។
ក្រុមការងារ ១០០ រាត្រី បានចេញផ្សាយរបាយការណ៍សិក្សាស្រាវជ្រាវមួយដោយបានផ្សព្វផ្សាយក្នុងហ្វេសប៊ុកកាលពីថ្ងៃទី ៩ ខែ កញ្ញា ដែលភ្នំពេញប៉ុស្តិ៍ទើបទទួលបានកាលពីថ្ងៃចន្ទថា៖ «ចំណីអាហារមានសារធាតុគីមីជាអ្នកបំផ្លាញសុភមង្គលសេដ្ឋកិច្ចរបស់ពលរដ្ឋខ្មែររយៈពេលវែង។ ភាគច្រើននៃចំណីអាហារក្នុងប្រទេសកម្ពុជាសម្បូរទៅដោយសារធាតុគីមី ព្រោះគ្មានការគ្រប់គ្រងត្រឹមត្រូវពីសំណាក់រាជរដ្ឋាភិបាល»។
បើតាមរបាយការណ៍ក្រុមការងារ ១០០ រាត្រី បានធ្វើការសិក្សាស្រាវជ្រាវរយៈពេល ១ ឆ្នាំ នៅតាមបណ្ដោយព្រំដែនកម្ពុជា-វៀតណាម ផ្សារដើមគ និងពលរដ្ឋតាមដងទន្លេមេគង្គ ដើម្បីសិក្សាស្វែងយល់ពីចំណីអាហារ កត្តារួមផ្សំដែលចូលរួមឲ្យមាន (ត្រី សាច់ បន្លែបង្ការ និងគ្រឿងឧបភោគបរិភោគ) ដែលមានសារជាតិគីមី។
.jpg)
របាយការណ៍ដដែលបញ្ជាក់ថាក្រុមការងារ ១០០ រាត្រី បានចុះជួបប្រជាពលរដ្ឋ អាជ្ញាធរមូលដ្ឋានដោយអង្កេតដោយផ្ទាល់ទៅលើស្ថានភាពដាំដុះក្នុង ស្រុក ការនាំចូល (ត្រី សាច់ បន្លែបង្ការនិង គ្រឿងឧបភោគបរិភោគ) ពីប្រទេសវៀតណាម ថៃ ចិន និងតម្រូវការចម្បងដែលរដ្ឋាភិបាលគួរដោះស្រាយជាអាទិភាព និងជាបន្ទាន់។
របាយការណ៍បញ្ជាក់ថា៖ «យើងបារម្ភថា បើស្ថានភាពនេះនៅតែបន្តមានតទៅទៀត ពលរដ្ឋកម្ពុជាប្រាកដជារស់ក្នុងភាពភ័យខ្លាចចំពោះអាហារដែលខ្លួនបរិភោគ ព្រោះសារធាតុគីមីទាំងនោះនឹងនាំមកនូវជំងឺជាច្រើនដល់ពលរដ្ឋដូចជា មហារីក ទឹកនោមផ្អែម។ល។»។
លោក មួង សូនី ប្រធានសមាគមសម្ព័ន្ធនិស្សិតបញ្ញវន្តខ្មែរ ដែលជាអ្នកដឹកនាំក្រុមការងារ ១០០ រាត្រីនេះ បានប្រាប់ភ្នំពេញប៉ុស្តិ៍កាលពីថ្ងៃចន្ទថា ការសិក្សានេះ មិនមែនមានន័យថា រាល់ទំនិញទាំងអស់សុទ្ធតែមានសារធាតុគីមីនោះទេ តែលោកចង់សំដៅថា ភាគច្រើននៃទំនិញមានសារធាតុគីមី។
លោកបញ្ជាក់ថា ពេលវេលានៃការត្រួតពិនិត្យពីមន្ត្រីនៅព្រំដែនមិនបានធ្វើឡើង ២៤ ម៉ោងនោះទេ ហើយឧបករណ៍ត្រួតពិនិត្យក៏មិនមានគ្រប់គ្រាន់ដែរ។ លោក សូនី បន្ថែមថា៖ «វៀតណាមយើងសិក្សាទៅឃើញថា គឺគេបាញ់ (ថ្នាំ) ហើយគេដក។ គេដកហើយ គេដាក់ថ្នាំត្រាំទៀតដើម្បីរក្សា (គុណភាព) ហើយយកមកដល់អាជីវករយើងដាក់ទៀត។ ដល់ពេលដាក់ហើយដែលចែកទៅតាមខេត្តហ្នឹង អាជីវករយើងហ្នឹងដាក់ទៀត»។
ប៉ុន្តែលោក លីវ សុផាណារិទ្ធ ប្រធានលេខាធិការដ្ឋាននៃគណៈកម្មាធិការប្រយុទ្ធប្រឆាំងផលិតផលក្លែងក្លាយប្រាប់ភ្នំពេញប៉ុស្តិ៍ពីថ្ងៃអាទិត្យថា គណៈកម្មាធិការរបស់លោកគឺគណៈកម្មាធិការអន្តរក្រសួងដែលមានស្ថាប័នពាក់ព័ន្ធជាច្រើនបានធ្វើការត្រួតពិនិត្យទំនិញនៅក្នុងស្រុកហើយកិច្ចការនៅខាងព្រំដែនគឺមន្ត្រីគយ និងរដ្ឋាករជាអ្នកធ្វើការគ្រប់គ្រងរាល់ទំនិញនាំចូលនៅតាមច្រកព្រំដែន។
លោកបន្តថា រាល់ទំនិញមកពីវៀតណាមគឺមិនអាចសន្និដ្ឋានជាទូទៅថា សុទ្ធតែមានសារធាតុគីមី និងជាទំនិញក្លែងក្លាយបានទេ ព្រោះមន្ត្រីដែលធ្វើការនៅតាមព្រំដែនក៏ខិតខំគ្រប់គ្រង និងត្រួតពិនិត្យរាល់ទំនិញនាំចូលយ៉ាងសកម្មដែរ។ លោកបានបញ្ជាក់ថា៖ «ហើយនៅតាមព្រំដែនក៏គេមានគណៈកម្មការចម្រុះគ្រប់គ្រងច្រកទ្វារព្រំដែននីមួយៗហ្នឹងក៏គាត់ធ្វើការរួមគ្នាទៀត»។
លោក មួង តារា ប្រធានក្រុមការងារគយចល័ត ប្រចាំច្រកទ្វារព្រំដែនអន្តរជាតិជ្រៃធំក្នុងខេត្តកណ្តាលបានប្រាប់ភ្នំពេញប៉ុស្តិ៍កាលពីថ្ងៃចន្ទថា ក្រុមការងាររបស់លោកតែងតែធ្វើពិសោធន៍ និងនៅតែពិនិត្យមើលរាល់ការនាំចូលបន្លែ និងទំនិញផ្សេងៗទៀតពីប្រទេស វៀតណាម មុននឹងអនុញ្ញាតឲ្យធ្វើការបង់ពន្ធចូល។ ក្រោយពិនិត្យរួច ទំនិញទាំងនេះមិនឃើញមានជាតិគីមីនោះទេ។ ទាំងប្រជាជននៅព្រំដែន និងប្រជាជននៅភ្នំពេញក៏ទទួលទានបន្លែ និងអាហារទាំងនេះដូចគ្នា។
លោក មួង តារា ថ្លែងថា៖ «វាមានយកដាក់នៅព្រំដែនមួយចំនួន។ ពេលបង់ពន្ធចូលហើយ យើងយកមកញ៉ាំនៅព្រំដែនដូចគ្នា ហើយយកទៅភ្នំពេញដូចគ្នា។ អ៊ីចឹង វាអត់មានអីជាតិគីមីទេ»៕
