កងកម្លាំងនគរបាលខេត្តព្រះសីហនុ ជិះរថយន្តល្បាតការពារសន្តិសុខក្នុងក្រុងនៅពេលយប់កាលពីដើមខែនេះ។ រូបថត នគរបាល
ភ្នំពេញៈ ក្រុមមន្ត្រីជំនាញពាក់ព័ន្ធពីក្រសួងមហាផ្ទៃបាននិងកំពុងតែចូលរួមផ្តល់យោបល់ដើម្បីដោះស្រាយបញ្ហាប្រឈមថ្មីដែលកំពុងកើតឡើងនៅខេត្តព្រះសីហនុក្នុងនោះមានបទល្មើសគ្រឿងញៀន និងបទល្មើសប្លន់តាមសម្លាប់រួមទាំងបញ្ហាបរិស្ថាន ខណៈដែលមានសេចក្តីរាយការណ៍ជាច្រើនថា ជនជាតិចិនដែលមានកំណើនកាន់តែច្រើនឡើងតែងតែបង្កបទល្មើសផ្សេងៗធ្វើឲ្យមានការព្រួយបារម្ភនៅខេត្តទេសចរណ៍ជាប់មាត់សមុទ្រមួយនេះ។
លោក ស ខេង ឧបនាយករដ្ឋមន្ត្រី និងជារដ្ឋមន្ដ្រីក្រសួងមហាផ្ទៃបានថ្លែងប្រាប់ក្រុមអ្នកកាសែត បន្ទាប់ពីបញ្ចប់កិច្ចប្រជុំជាមួយគណៈកម្មការទី ៤ នៃរដ្ឋសភា គណៈកម្មការមហាផ្ទៃ ការពារជាតិ និងមុខងារសាធារណៈនៅទីស្ដីការក្រសួងមហាផ្ទៃកាលពីម្សិលមិញថា ក្រុមការងារក្រសួងមហាផ្ទៃដែលទើបតែបញ្ជូនទៅ បាននិងកំពុងជួយផ្តល់យោបល់ដោះស្រាយបញ្ហាប្រឈមនៅខេត្តព្រះសីហនុដែលជារឿងថ្មីដែលកម្ពុជាមិនធ្លាប់ជួបប្រទះពីមុនមកប៉ុន្ដែបញ្ហានេះសមត្ថកិច្ច និងអាជ្ញាធរពាក់ព័ន្ធអាចគ្រប់គ្រងបាន។
ក្រសួងមហាផ្ទៃបានបង្កើតក្រុមការងារមួយបញ្ជូនទៅខេត្តព្រះសីហនុ ដើម្បីស្រាវជ្រាវ និងជួយបង្ក្រាបបទល្មើស បន្ទាប់ពីលេចឡើងនូវសកម្មភាពមិនប្រក្រតី និងបទល្មើសជាច្រើន ហើយក្រុមការងារនេះមានសមាសភាពចូលរួមពីអគ្គនាយកដ្ឋានរដ្ឋបាល អគ្គស្នងការដ្ឋាននគរបាលជាតិ អគ្គនាយកដ្ឋានអន្តោប្រវេសន៍ និងក្រុមអ្នកច្បាប់របស់ក្រសួងមហាផ្ទៃ។
.jpg)
លោក ស ខេង បញ្ជាក់ថា៖ «គាត់ (ក្រុមការងារ) ដោះស្រាយហើយបើគាត់ដោះមិនបានរាយការណ៍មកក្រសួង (មហាផ្ទៃ) ក្រសួងដោះស្រាយហើយបើក្រសួងដោះស្រាយមិនបានរាយការណ៍ទៅប្រមុខរដ្ឋាភិបាល។ ដោយសារតែបញ្ហានេះជាបញ្ហាប្រឈមថ្មីដែលពីមុនមកមិនធ្លាប់ជួបប្រទះអ៊ីចឹងហើយយើងម្ចាស់ការពីដើមទី»។
លោកបានបញ្ជាក់ទៀតថា៖ «ប៉ុន្ដែមកដល់ពេលនេះសភាពការណ៍ដែលថា Control លែងបាននោះវាមិនដល់ថ្នាក់ហ្នឹងទេ ប៉ុន្តែយើងម្ចាស់ការកុំឲ្យមានបញ្ហាថានៅពេលដែល control លែងបានហើយបានយើងទៅវាអាចយឺតពេល។ ខ្ញុំគិតថាមកដល់ពេលនេះមិនមានបញ្ហាអីធំដុំដែលដោះមិនចេញនោះទេ»។
លោក ស ខេង ក៏បានឲ្យដឹងដែរថាបញ្ហាដែលប្រឈមនៅខេត្តព្រះសីហនុ គឺពាក់ព័ន្ធជាមួយបទល្មើសគ្រឿងញៀន បទល្មើសប្លន់ការតាមសម្លាប់គ្នា និងបញ្ហាបរិស្ថានអនាម័យ ប៉ុន្ដែវាមិនមែនជាបញ្ហាធ្ងន់ធ្ងរនោះទេ។ លោកបន្តថាដោយសារតែមានការវិនិយោគច្រើនបានបង្កឲ្យមានបញ្ហាជម្លោះរឿងដីធ្លីកើតឡើងច្រើន។
លោកបញ្ជាក់ថា៖ «យើងនឹងខិតខំដោះស្រាយបញ្ហាហ្នឹង ហើយអាជ្ញាធរក៏គាត់មានលទ្ធភាពដោះស្រាយហើយនេះគ្រាន់តែជាការចូលរួមផ្តល់យោបល់។ ដោយសារតែរឿងនេះ (ប្រជាជនលែងចង់ទៅលេងខេត្ត និងព្រួយបារម្ភ) ហើយបានយើងរៀបចំក្រុមការងារទៅដើម្បីជួយផ្នែកទាំងអស់មានប្រជាជនមួយចំនួនបារម្ភ តែប្រជាជនភាគច្រើនមិនទាន់អីទេ»។
បើតាមលោក ស ខេង ក្រុមការងារដែលចុះទៅសិក្សាស្រាវជ្រាវនៅខេត្តព្រះសីហនុគឺមិនមែនដើរតួនាទីជំនួសឱ្យអាជ្ញាធរខេត្តនោះទេ គ្រាន់តែជាអ្នកចូលរួមផ្តល់យោបល់ប៉ុណ្ណោះ ចំណែកសិទ្ធិសម្រេចកិច្ចការទាំងឡាយគឺជាសមត្ថកិច្ចរបស់អាជ្ញាធរខេត្ត។
លោក ខៀវ សុភ័គ អ្នកនាំពាក្យក្រសួងមហាផ្ទៃបានថ្លែងថាក្រុមការងារដែលដឹកនាំដោយអនុរដ្ឋលេខាធិការ ១ រូប និងមន្ត្រីនគរបាលជាន់ខ្ពស់មួយចំនួនផ្សេងទៀតនោះបានចុះទៅសិក្សាស្រាវជ្រាវនៅខេត្តព្រះសីហនុកាលពី ៣-៤ សប្តាហ៍មុនដើម្បីជួយផ្តល់កម្លាំង និងផ្តល់យោបល់ដោះស្រាយបញ្ហាប្រឈមទាំងនោះហើយនៅពេលដែលសភាពការណ៍ល្អប្រសើឡើងវិញហើយក្រុមការងារនេះនឹងត្រឡប់មកវិញ។
លោកបានបញ្ជាក់ដូច្នេះថា៖ «ទៅបន្ថែមកម្លាំង និងពិភាក្សាគ្នាជួយកម្លាំងគ្នាដោយសារការងារវាធំពេក...យើងជួយដោះស្រាយបញ្ហាបរិស្ថានឲ្យល្អវិញ»។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុកបានថ្លែងថាអាជ្ញាធរខេត្ត និងក្រុមការងារនឹងពិបាកដោះស្រាយបញ្ហាប្រឈមទាំងនោះ ប្រសិនបើក្រសួង និងស្ថាប័នពាក់ព័ន្ធមិនព្រមរឹតបន្តឹងច្បាប់អន្តោប្រវេសន៍ និងច្បាប់ផ្សេងៗទៀតដើម្បីទប់ស្កាត់ការហូរចូលនៃជនជាតិចិនដ៏ច្រើនលើសលប់។
លោកបញ្ជាក់ថា៖ «ដរាបណាយើងនៅតែបណ្តែតបណ្តោយឲ្យជនជាតិចិនហូរចូលដោយលើសលប់បែបនេះពេកវានឹងបង្កឲ្យមានបញ្ហាកាន់តែលំបាកក្នុងការដោះស្រាយដោយសារតែឥរិយាបថជនជាតិចិនមានការលំបាកក្នុងការគ្រប់គ្រងដោយច្បាប់ប្រទេសកម្ពុជា...។ ប្រទេសយើងមានច្បាប់ធូររលុង វារឹតតែផ្តល់ភាពងាយស្រួលដល់ជនជាតិចិនទាំងអស់នោះបន្តប្រព្រឹត្តបទល្មើស»។
មានការប៉ាន់ប្រមាណថានាពេលបច្ចុប្បន្នខេត្តព្រះសីហនុមានជនជាតិចិនកំពុងរស់នៅប្រមាណជាង ៧ ម៉ឺននាក់ដែលនេះជាចំនួនដ៏ច្រើនលើសលប់បើប្រៀបធៀបទៅនឹងជនបរទេសមកពីបណ្តាប្រទេសផ្សេងទៀត។
លោក សែនករុណា បន្ថែមថាក្រសួងពាក់ព័ន្ធគួរពិនិត្យឲ្យបានហ្មត់ចត់នូវការហូរចូលយ៉ាងច្រើននៃជនជាតិចិនមកកម្ពុជា ដើម្បីឲ្យអាជ្ញាធដឹងថា ជនជាតិចិនទាំងនោះមានប្រវតិ្តរូបបែបណាហើយថា តើពួកគាត់ធ្លាប់មានប្រព្រឹត្តបទល្មើសពីមុនមកដែរអត់ ខណៈដែលជនជាតិចិនមួយចំនួនបានប្រព្រឹត្តបទល្មើសធ្វើឲ្យមានការព្រួយបារម្ភដល់ប្រជាពលរដ្ឋកម្ពុជា៕
