គណៈកម្មការផ្សារ និងសាលារាជធានីភ្នំពេញ គ្រោងជួបប្រជុំគ្នានៅថ្ងៃស្អែក ដើម្បីពិភាក្សា និងផ្តល់យោបល់ក្នុងការត្រៀមបើកដំណើរការផ្សាររដ្ឋឡើងវិញ
ភ្នំពេញៈ គណៈកម្មការផ្សារ និងសាលារាជធានីភ្នំពេញគ្រោងនឹងជួបប្រជុំគ្នានៅថ្ងៃសៅរ៍ស្អែក ដើម្បីពិភាក្សា និងផ្តល់យោបល់ក្នុងការត្រៀមបើកដំណើរការផ្សាររដ្ឋទាំងអស់ឡើងវិញ នៅថ្ងៃចន្ទ ទី ២៤ ខែឧសភា។
ប្រធានគណៈកម្មការផ្សារអូឡាំពិក លោក ឡូយ ស៊ាងអាំង បានថ្លែងប្រាប់អ្នកសារព័ត៌មាននៅថ្ងៃសុក្រទី ២១ ខែឧសភានេះថា គណៈកម្មការផ្សារអូឡាំពិក ក៏ដូចជាគណៈកម្មការផ្សារដទៃទៀតនឹងជួបប្រជុំជាមួយនឹងសាលារាជធានីភ្នំពេញ នៅមុននឹងបើកដំណើរការផ្សារឡើងវិញ នៅក្នុងបរិបទមានការឆ្លងរាលដាលជំងឺកូវីដ១៩។
លោកបានថ្លែងថា៖ «ថ្ងៃសៅរ៍ស្អែកនេះ សាលារាជធានីនឹងហៅគណៈកម្មការផ្សារទាំងអស់ចូលរួមប្រជុំនៅសាលារាជធានីភ្នំពេញ វេលាម៉ោង ៩ [ព្រឹក]។ ចឹងខ្ញុំចាំទទួលការណែនាំផ្ទាល់របស់ឯកឧត្តម អភិបាលរាជធានីក៏ដូចជាថ្នាក់ដឹកនាំ ដើម្បីយកមកអនុវត្តការងារឲ្យបានសមស្រប នៅក្នុងកាលៈទេសៈដែលយើងលក់ដូរកំពុងតែមានហានិភ័យ»។
លោក ឡូយ ស៊ាងអាំង មិនទាន់អាចបញ្ជាក់បានពីវិធានការលម្អិតក្នុងការបើកដំណើរការផ្សារអូឡាំពិកឡើងវិញនោះទេ នៅមុនពេលកិច្ចប្រជុំនោះ។
លោក ម៉េត មាសភក្តី អ្នកនាំពាក្យសាលារាជធានីភ្នំពេញមិនអាចទាក់ទងសុំអត្ថាធិប្បាយលើបញ្ហានេះបានទេ នៅថ្ងៃសុក្រនេះ។
ទោះយ៉ាងណា ក្នុងអំឡុងពេលចុះបាញ់ថ្នាំសម្លាប់មេរោគនៅផ្សារអូឡាំពិកនៅថ្ងៃសុក្រនេះ លោក ឡូយ ស៊ាងអាំង បានថ្លែងថា វិធានការជាចាំបាច់ គឺតម្រូវឲ្យអ្នកលក់ដូរ និងអ្នកចូលផ្សារពាក់ម៉ាស់ទាំងអស់ និងការរក្សាគម្លាតសុវត្ថិភាពជាដើម។
ក្រៅពីនោះគណៈកម្មការក៏កំពុងតែពិចារណាក្នុងការកាត់បន្ថយចំនួនអ្នកលក់ ចំពោះតូបណា ដែលមានគ្នាច្រើនផងដែរ។
លោកបានឲ្យដឹងថា ផ្សារអូឡាំពិកមានតូបលក់ដូរសរុបចំនួន ៥ ៦៨៤ ដែលរួមទាំងតូបដាក់អីវ៉ាន់ខ្លះផងដែរ។
លោកថ្លែងថា៖ «រៀបចំបរិស្ថាននៅក្នុងផ្សារ បាញ់ថ្នាំសម្លាប់មេរោគជាបន្តបន្ទាប់… ធ្វើម៉េចដើម្បីកាត់បន្ថយហានិភ័យ។ បាញ់ថ្នាំសម្លាប់មេរោគជាការងារចាំបាច់ ដែលយើងគិតថា ពេលដែលអាជីវករ ក៏ដូចជាប្រជាពលរដ្ឋចូលមកលក់ដូរគាត់មានទំនុកចិត្ត»។
លោក ឡូយ ស៊ាងអាំង មិនបានចាំពីតួលេខអ្នកលក់ដូរ ដែលឆ្លងជំងឺកូវីដ១៩នោះទេ។ ប៉ុន្តែលោកថា នៅក្នុងដំណាក់កាលដំបូងមានអ្នកវិជ្ជមាននៅក្នុងផ្សារប្រមាណជា ៣ ទៅ ៤ ករណីប៉ុណ្ណោះ។
សាលារាជធានីភ្នំពេញកាលពីថ្ងៃទី ២០ ឧសភា បានចេញសេចក្ដីសម្រេច បើកដំណើរការផ្សាររដ្ឋទាំងអស់ នៅក្នុងមូលដ្ឋានរាជធានីភ្នំពេញឡើងវិញ ចាប់ពីថ្ងៃទី ២៤ ខែឧសភានេះតទៅ។
ប៉ុន្តែមិនអនុញ្ញាតឱ្យបើកដំណើរការផ្សារមិនរៀបរយទាំងអស់ ដូចជា ផ្សារក្រមួន ផ្សារចាត់តាំង ផ្សាររោងចក្រ ផ្សារសហគមន៍ ផ្សារក្នុងដីឡូត៍ឯកជន ផ្សារជុំវិញមន្ទីរពេទ្យ និងផ្សារតាមចិញ្ចើមផ្លូវជាដើម ដើម្បីបង្ការ និងទប់ស្កាត់ការឆ្លងរាលដាលជំងឺកូវីដ១៩ក្នុងសហគមន៍៕
