ភ្នំពេញៈ ក្នុងឆ្នាំ ២០២០ ថវិកាអភិវឌ្ឍន៍ឃុំ សង្កាត់នីមួយៗនឹងកើនឡើងទ្វេដងដល់ជាង ៧ ម៉ឺនដុល្លារ ដោយមិនរាប់បញ្ចូលថវិកាផ្នែករដ្ឋបាលហើយចំនួននេះនឹងឡើងជាង ៣ ដងក្នុងឆ្នាំ ២០២៣ សម្រាប់ឆ្លើយតបតាមតម្រូវការអភិវឌ្ឍន៍ជាអ្វីដែលសង្គមបានសាទរ ប៉ុន្តែស្នើឲ្យមានតម្លាភាពថវិកាទាំងនេះ ខណៈបច្ចុប្បន្នថវិកាអភិវឌ្ឍន៍ឃុំ សង្កាត់ទទួលបាន ត្រឹមតែ ៣,៥ ម៉ឺនដុល្លារ។
លោក ស ខេង រដ្ឋមន្ត្រីក្រសួងមហាផ្ទៃបានថ្លែងនៅក្នុងសន្និបាតត្រួតពិនិត្យលទ្ធផលការងារកាលពីម្សិលមិញថា ក្នុងឆ្នាំ ២០១៩ នេះ ថវិកាដែលឃុំ សង្កាត់នីមួយៗទទួលបានគឺត្រឹមតែ ៣៥ ០០០ ដុល្លារប៉ុណ្ណោះ ហើយចំពោះនេះ នឹងកើនឡើងដល់ ៧៣ ០០០ ដុល្លារ ក្នុងឆ្នាំ ២០២០ ហើយកើនដល់ ៨៥ ០០០ ដុល្លារក្នុងឆ្នាំ ២០២១ និងឆ្នាំ ២០២២ កើនដល់ ១០ ម៉ឺនដុល្លារខណៈចំនួននេះនឹងកើនដល់ ១១ ម៉ឺនដុល្លារក្នុងឆ្នាំ ២០២៣ ខាងមុខ។
លោកបន្តថា ការសម្រេចដំឡើងថវិកាសម្រាប់អភិវឌ្ឍន៍ឃុំ សង្កាត់ទូទាំងប្រទេសនេះ គឺទទួលបានការឯកភាពរួចហើយពីនាយករដ្ឋមន្ត្រី ហ៊ុន សែននិងក្រសួងសេដ្ឋកិច្ច ដែលទាំងនេះគឺជាឆន្ទៈរបស់រដ្ឋាភិបាលក្នុងការធ្វើឲ្យប្រសើរឡើង។
លោកបន្តថា៖ «នេះជាមហិច្ឆតា និងឆន្ទៈនយោបាយរបស់រដ្ឋាភិបាលដើម្បីនឹងផ្តល់លទ្ធភាពទៅឲ្យរដ្ឋបាលថ្នាក់ឃុំ-សង្កាត់ ដែលជាអ្នកនៅជិតស្និទ្ធជាមួយប្រជាពលរដ្ឋ មានថវិកាក្នុងការអភិវឌ្ឍមូលដ្ឋានរបស់ខ្លួនតាមការចាំបាច់របស់ប្រជាពលរដ្ឋ»។
ជាមួយគ្នានេះ លោក ស ខេង ក៏បានសង្កត់ធ្ងន់ដែរថា ចំពោះកំណែទម្រង់ឲ្យមានការិយាល័យច្រកចេញចូលតែមួយ នៅតាមឃុំ សង្កាត់ ក៏ជាយន្តការដ៏មានប្រយោជន៍មួយសម្រាប់ឆ្លើយតបនឹងតម្រូវការជាមូលដ្ឋានរបស់ប្រជាពលរដ្ឋផងដែរ ព្រោះការិយាល័យនេះ បានបង្ហាញពីតម្លាភាព កាត់បន្ថយអំពើពុករលួយ កាត់បន្ថយការចំណាយពេលវេលា ហើយចំណូលចូលរដ្ឋក៏មានការកើនឡើងផងដែរ។
តាមរបាយការណ៍ស្តីពីលទ្ធផលការងារឆ្នាំ ២០១៨ និងលើកទិសដៅការងារបន្ដឆ្នាំ ២០១៩ គិតត្រឹមឆ្នាំ ២០១៨ កម្ពុជាមានឃុំចំនួន ១៤១០ សង្កាត់ចំនួន ២៣៦ ខណៈរាជធានីមាន ១ ខេត្តចំនួន ២៤ ក្រុងចំនួន ២៦ ស្រុក ១៥៩ ខណ្ឌមាន ១២ និងភូមិទូទាំងប្រទេសមានចំនួន ១៤ ៣៨៣។
មេឃុំរកា ស្រុកសង្កែ ខេត្តបាត់ដំបង អ្នកស្រី ស៊ឹម ពៅ បានសាទរចំពោះការសម្រេចដំឡើងថវិកា ដែលអាចឲ្យពួកគេឆ្លើយតបនឹងតម្រូវការរបស់ប្រជាពលរដ្ឋ ក្នុងការអភិវឌ្ឍហេដ្ឋារចនាសម្ព័ន្ធ និងផ្នែកអភិវឌ្ឍន៍ធនធានមនុស្សជាដើម ខណៈកន្លងទៅកញ្ចប់ថវិកាមិនគ្រប់គ្រាន់ បណ្តាលឲ្យរាំងស្ទះដល់ការអភិវឌ្ឍក្នុងឃុំរបស់ខ្លួន។
ជាមួយនេះ អ្នកស្រីក៏រំពឹងដែរថា ថវិកាដែលកើនឡើងនេះនឹងអាចដោះស្រាយបញ្ចប់បញ្ហាប្រឈមធំៗរបស់ឃុំ ដូចជា បញ្ហាផ្លូវ បញ្ហាជីកប្រឡាយ និងការសាងសង់ផ្សេងៗដែលកំពុងបន្តអូសបន្លាយ។
អ្នកស្រីបន្តថា៖ «យើងនឹងបែងចែកដោះស្រាយការងារជាអាទិភាពមុន មើលថា ការងារជាតម្រូវការចាំបាច់ជាមុន និងមើលតាមថវិកាហ្នឹងសិន ថាកន្លែងណាដែលត្រូវធ្វើមុន ដើម្បីឲ្យយើងប្រើប្រាស់ឲ្យចំគោលដៅរបស់យើង»។
លោក តឹក វណ្ណារ៉ា នាយកប្រតិបត្តិវេទិកានៃអង្គការមិនមែនរដ្ឋាភិបាលស្តីពីកម្ពុជា (NGO forum) ប្រាប់ភ្នំពេញប៉ុស្តិ៍ពីម្សិលមិញថា វាពិតជាល្អ ដែលរដ្ឋបាលថ្នាក់ឃុំ សង្កាត់ អាចទទួលបានថវិកាអភិវឌ្ឍន៍ទ្វេដងនេះ ហើយទាំងនេះគឺជាអ្វីដែលពួកគាត់ស្នើឡើង ដើម្បីអាចមានថវិកាគ្រប់គ្រាន់ក្នុងការបំពេញតម្រូវការនានា។
លោកបានបន្តថា ជាមួយនឹងការទទួលបានការដំឡើងថវិកាឃុំ-សង្កាត់ក្នុងការអភិវឌ្ឍនេះជំហានបន្ទាប់ដែលអាជ្ញាធរថ្នាក់ក្រោមត្រូវត្រៀមគឺគួរមានយន្តការច្បាស់លាស់ ក្នុងការបែងចែកថវិកាទាំងនេះឲ្យមានតម្លាភាព។
លោកបញ្ជាក់ថា៖ «ដើម្បីឲ្យថវិកាឃុំចំនួនជាង ៧ ម៉ឺនមួយឃុំហ្នឹងប្រកបដោយប្រសិទ្ធភាព ត្រូវកសាងសមត្ថភាពឃុំ-សង្កាត់ ក្នុងការគ្រប់គ្រង និងប្រើប្រាស់យន្តការឲ្យបានត្រឹមត្រូវតាមផែនការដែលបានលើកឡើង។ បង្កើតឲ្យមានការជជែកពិភាក្សានៅថ្នាក់មូលដ្ឋានហ្នឹង អំពីការធ្វើថវិកានៅក្នុងឃុំ សង្កាត់ហ្នឹង ដោយបើកឱកាសឲ្យមានការចូលរួមដោយទូលាយក្នុងថ្នាក់ឃុំហ្នឹង សម្រាប់ធ្វើផែនការរួម ហើយឲ្យប្រជាពលរដ្ឋនៅក្នុងឃុំហ្នឹង បានដឹងបានឮ និងមានការចូលរួម ឆ្លើយតបនឹងតម្រូវការជាក់ស្តែង»៕