ភ្នំពេញៈ គិតចាប់តាំងពីឆ្នាំ ២០១៤ ដល់ខែ កក្កដា ឆ្នាំ ២០១៩ អាជ្ញាធរមានសមត្ថកិច្ចកម្ពុជាបានបណ្តេញចេញជនជាតិចិនដែលប្រព្រឹត្តបទល្មើសជាង ២ ៧០០ នាក់ ដោយធ្វើឡើងផ្អែកតាមកិច្ចព្រមព្រៀងរវាងប្រទេសទាំង ២ និងស្របតាមច្បាប់ស្តីពីអន្តោប្រវេសន៍របស់កម្ពុជា។ នេះបើតាមក្រសួងមហាផ្ទៃ។
សេចក្តីប្រកាសព័ត៌មានរបស់ក្រសួងមហាផ្ទៃដែលធ្វើឡើងដើម្បីបំភ្លឺ និងបដិសេធចំពោះការចុះផ្សាយរបស់សារព័ត៌មានមួយចំនួនជុំវិញការចាប់ខ្លួនជនជាតិចិនកាលពីចុងសប្តាហ៍មុនបានលើកឡើងថា ការចាប់ខ្លួនជនជាតិចិនដែលជាប់ពាក់ព័ន្ធនឹងការប្រព្រឹត្តបទល្មើស និងការបណ្តេញជនជាតិចិនទាំងនេះចេញពីកម្ពុជាត្រូវបានធ្វើឡើងផ្អែកតាមស្មារតីនៃអនុស្សរណៈ និងច្បាប់។
ក្រសួងបន្តថា៖ «ជនល្មើសដែលត្រូវបានចាប់ខ្លួន និងបញ្ជូនចេញពីកម្ពុជា គឺជាជនដែលមានដីកាស្វែងរកចាប់ខ្លួនពីអាជ្ញាធរមានសមត្ថកិច្ចនៃប្រទេសចិនដែលនឹងត្រូវយកទៅអនុវត្តនីតិវិធីបន្តតាមផ្លូវច្បាប់ ដើម្បីស្វែងរកយុត្តិធម៌ជូនជនរងគ្រោះនៅប្រទេស ចិន ពោលគឺមិនដោះលែងឲ្យរួចខ្លួននោះទេ»។
ក្រសួងបញ្ជាក់ថា រាល់ការចុះប្រតិបត្តិការបង្ក្រាបបទល្មើស និងចាប់ខ្លួនជនល្មើស ទោះបីជាជនល្មើសនោះជាពលរដ្ឋខ្មែរ ឬជាជនបរទេសក្តីអាជ្ញាធរមានសមត្ថកិច្ចនៃកម្ពុជាតែងតែធ្វើការស៊ើបអង្កេតស្រាវជ្រាវប្រមូលភ័ស្តុតាងឲ្យបានគ្រប់តាមផ្លូវច្បាប់ជាមុន ហើយប្រសិនបើជនទាំងនេះត្រូវបានឃុំឃាំងនៅប្រទេស កម្ពុជា វាអាចជាអម្រែកដ៏ធ្ងន់មួយនៃថវិកាជាតិ។
ក្រសួងបញ្ជាក់ថា៖ «ជនល្មើសបរទេសទាំងឡាយដែលត្រូវបានចាប់ខ្លួន និងបណ្តេញចេញពីកម្ពុជាស្របតាមច្បាប់ស្តីពីអន្តោប្រវេសន៍នឹងត្រូវដាក់បញ្ចូលឈ្មោះក្នុងបញ្ជីខ្មៅ (Black List) នៃប្រព័ន្ធគ្រប់គ្រងអន្តោប្រវេសន៍ ហើយមិនត្រូវបានអនុញ្ញាតឲ្យធ្វើដំណើរចូលមកកម្ពុជាជាថ្មីទៀតឡើយ»។
កន្លងមកអាជ្ញាធរមានសមត្ថកិច្ចកម្ពុជាធ្លាប់បានចាប់បញ្ជូនខ្លួនជនបរទេសផ្សេងទៀតដែលពាក់ព័ន្ធនឹងការប្រព្រឹត្តបទល្មើសនៅក្នុងប្រទេសរបស់ពួកគេ ឲ្យទៅប្រទេសរបស់ពួកគេវិញផងដែរស្របតាមស្មារតីនៃអនុស្សរណៈរវាងប្រទេសទាំង ២។
ក្រសួងមហាផ្ទៃចាត់ទុកការលើកឡើងរបស់អ្នកវិភាគមួយចំនួនថា ខ្វះមូលដ្ឋានព័ត៌មាន និងមូលដ្ឋានផ្លូវច្បាប់ច្បាស់លាស់ ដែលអាចបណ្តាលឲ្យសាធារណមតិជាតិ-អន្តរជាតិ មានការភ័ន្តច្រឡំចំពោះវិធានការ និងដំណើរការនីតិវិធីរបស់អាជ្ញាធរមានសមត្ថកិច្ចនៃកម្ពុជា។
ការចេញសេចក្តីបំភ្លឺយ៉ាងដូច្នេះធ្វើឡើង បន្ទាប់ពីមានការរិះគន់ពីអ្នកឃ្លាំមើលសង្គមមួយចំនួនជុំវិញការធ្វើបត្យាប័នជនល្មើសជនជាតិចិន ក្រោយពីកម្ពុជាបានចាប់ឃាត់ខ្លួនបន្ទាប់ពីពួកគេបានប្រព្រឹត្តសកម្មភាពល្មើសច្បាប់លើទឹកដីកម្ពុជា ជាពិសេសពាក់ព័ន្ធនឹងបទល្មើសចាប់បង្ខាំងជនជាតិចិនដូចគ្នា ការធ្វើទារុណកម្ម និងបទល្មើសជំរិតទារប្រាក់តាមអ៊ីនធឺណែត។
កាលពីសប្តាហ៍មុនសមត្ថកិច្ចកម្ពុជាបានឃាត់ខ្លួនជនជាតិចិនជាង ១០០ នាក់ ក្នុងខេត្តព្រះសីហនុទាក់ទងនឹងបទល្មើសជំរិតទារប្រាក់ពីជនជាតិចិនដូចគ្នាតាមប្រព័ន្ធអ៊ីនធឺណិត (VOIP)។
លោក ឌី ថេហូយ៉ា ប្រធានកម្មវិធីនៃមជ្ឈមណ្ឌលសម្ព័ន្ធការងារ និងសិទ្ធិមនុស្សហៅថា សង់ត្រាល់ និយាយថាលោកមិនហ៊ានសន្និដ្ឋាននោះទេ ចំពោះការបកស្រាយរបស់ក្រសួងមហាផ្ទៃ។ ប៉ុន្តែក្នុងនាមជាពលរដ្ឋម្នាក់លោកយល់ថា បើសិនជាប្រទេសកម្ពុជាពិតជាមានការគ្រប់គ្រងល្អមែន នោះជនជាតិចិនទាំងនោះនឹងទទួលទោសចំពោះមុខច្បាប់កម្ពុជា ហើយពួកគេក៏មិនហ៊ានប្រព្រឹត្តសកម្មភាពល្មើសដូចពេលនេះនោះដែរ។
យ៉ាងណាលោកនៅតែជំរុញឲ្យកម្ពុជាអនុវត្តច្បាប់ឲ្យបានតឹងរ៉ឹងក្នុងការគ្រប់គ្រងជនអន្តោប្រវេសន៍ដោយលោកថ្លែងថា៖ «(ត្រូវ) គ្រប់គ្រងជនជាតិនេះឲ្យបានច្បាស់លាស់ខុសគឺខុសត្រូវគឺត្រូវ។ ដូចសព្វថ្ងៃនេះមានការរិះគន់ជនជាតិចិនមានសិទ្ធិប្រើប្រាស់ឡានរបស់រដ្ឋ ស្លាកលេខ ខ.ម ន.ប ពាសពេញអ៊ីចឹង។ កាលណាយើងគ្រប់គ្រងមិនមានប្រសិទ្ធភាព ហើយពួកគេចង់ធ្វើអីក៏បានឲ្យតែមានលុយ បង្កអនាធិបតេយ្យដែលធ្វើឲ្យប្រជាពលរដ្ឋមើលឃើញថា អ្នកណាមានលុយ គេចង់ធ្វើអ្វីក៏បានដែរ។ ដូច្នេះហើយខ្ញុំចង់ឲ្យយើងពិនិត្យចំណុចទាំងអស់នេះ បើអាចកែប្រែបាន»។
តាមគេហទំព័រអគ្គស្នងការនគរបាលជាតិដែលបានដកស្រង់សម្តីលោក សុខ ផល រដ្ឋលេខាធិការក្រសួងមហាផ្ទៃបានឲ្យដឹងថាក្នុងចំណោមជនជាតិចិនប្រមាណ ២០ ម៉ឺននាក់ ដែលកំពុងស្នាក់នៅកម្ពុជាមានជាង ៧៨ ០០០ នាក់កំពុងរស់នៅខេត្តព្រះសីហនុ ប៉ុន្ដែពួកគេទាំងនោះមានត្រឹមតែជាង ២ ម៉ឺននាក់ប៉ុណ្ណោះ ដែលមានប័ណ្ណការងារត្រឹមត្រូវ៕