ភ្នំពេញៈ មន្ត្រីនគរបាលបានអះអាងថា ក្រុមជនជាតិចិន ១០៥ នាក់ក្នុងនោះមានស្ដ្រី ១០ នាក់ដែលត្រូវបានឃាត់ខ្លួនកាលពីល្ងាចថ្ងៃទី ៩ កញ្ញានៅក្នុងអគារជួលមួយកន្លែងក្នុងខណ្ឌសែនសុខ រាជធានីភ្នំពេញនោះគឺដោយសារពួកគេជាប់ពាក់ព័ន្ធនឹងបទល្មើសជាច្រើនករណី ហើយមានអ្នកខ្លះកំពុងស្ថិតក្រោមការតាមចាប់ខ្លួនពីអាជ្ញាធរចិនទៀតផង។
លោក ឆាយ គឹមខឿន មន្ត្រីនាំពាក្យអគ្គស្នងការនគរបាលជាតិបានប្រាប់ភ្នំពេញប៉ុស្ដិ៍កាលពីថ្ងៃម្សិលមិញថា ជនជាតិចិនទាំងនោះត្រូវបានចាប់ និងបញ្ជូនខ្លួនមកកាន់អគ្គស្នងការដ្ឋាននគរបាលជាតិដើម្បីសាកសួរបន្ថែម។
លោកបន្តថា ជនសង្ស័យទាំងនោះបានប្រព្រឹត្តបទល្មើសចម្រុះគ្នាដូចជា ករណីជំរិតទារប្រាក់ ការស្នាក់នៅខុសច្បាប់ ខ្លះជាប់ពាក់ព័ន្ធនឹងបទល្មើសពាណិជ្ជកម្ម និងខ្លះកំពុងត្រូវបានអាជ្ញាធរចិនតាមចាប់ខ្លួនជាដើម។
លោកថា៖ «ដោយសារឥឡូវយើងកំពុងសាកសួរ អ៊ីចឹង!ខ្ញុំមិនអាចប្រាប់ឱ្យអស់ថា ជាប់ពាក់ព័ន្ធនឹងបទល្មើសអីខ្លះទេ។
ពួកហ្នឹង! ប្រាកដជាត្រូវបញ្ជូនចេញ (ទៅចិន) ហើយនៅពេលយើងហើយនីតិវិធី»។
បើយោងតាមគេហទំព័រអគ្គស្នងការដ្ឋាននគរបាលជាតិ ជនជាតិចិនទាំង ១០៥ នាក់នោះត្រូវបានឃាត់ខ្លួននៅក្នុងអគារពាណិជ្ជកម្ម SUNTOWN នៅសង្កាត់អូរបែកក្អម ខណ្ឌសែនសុខ រាជធានីភ្នំពេញក្នុងប្រតិបត្តិការដឹកនាំដោយ លោក វឌ្ឍនៈ មង្គល ប្រធាននាយកដ្ឋានស៊ើបអង្កេត និងអនុវត្តនីតិវិធី សហការដោយលោក សេង ហៀង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ។
ក្នុងប្រតិបត្តិការនេះសមត្ថកិច្ចបានរឹបអូសវត្ថុតាងមួយចំនួនដូចជា ទូរស័ព្ទដៃ ១៩១ គ្រឿង កុំព្យូទ័រយួរដៃ (Laptop) ៤ គ្រឿង,iPad២ គ្រឿង,កាមេរ៉ា ២ គ្រឿង រថយន្តម៉ាកឡិចស៊ីសចំនួន ១ គ្រឿងពាក់សា្លកលេខភ្នំពេញ 2-J9168, Moniter ចំនួន ៩៥ គ្រឿង លិខិតឆ្លងដែនចំនួន ៤៧ ក្បាល និង Case ចំនួន ៨០ (ចាស់) ហើយបានរកឃើញថា ពួកគេរស់នៅខុសច្បាប់ និងសង្ស័យប្រព្រឹត្តបទល្មើសល្បែងអនឡាញដែលពាក់ព័ន្ធនឹងការជំរិតទារប្រាក់តាមអ៊ីនធឺណិត (VOIP) ។
លោក អាត់ ប៊ុននី មន្ត្រីនាំពាក្យអគ្គនាយកដ្ឋានអន្តោប្រវេសន៍បានឱ្យដឹងថា លោកមិនទាន់ទទួលបានរបាយការណ៍អំពីករណីចាប់ខ្លួនក្រុមជនជាតិចិនទាំងនេះទេ ដោយសារជាសំណុំរឿងដែលដឹកនាំអនុវត្តដោយអគ្គស្នងការនគរបាលជាតិ។
កាលពីថ្ងៃទី ២៨ ខែសីហាកន្លងទៅ ប៉ូលិសនៃក្រសួងសន្ដិសុខសាធារណៈរបស់ចិនបានបញ្ជូនយន្តហោះចំនួន ២ គ្រឿងមកដឹកពលរដ្ឋខ្លួនចំនួន ១៥០ នាក់ ពីព្រលានយន្តហោះអន្តរជាតិភ្នំពេញត្រឡប់ទៅកាន់ប្រទេសចិនវិញ បន្ទាប់ពីពួកគេត្រូវបានសមត្ថកិច្ចខេត្តកំពង់ស្ពឺ និងខេត្តព្រះសីហនុចាប់ខ្លួនពីបទជាប់ពាក់ព័ន្ធនឹងបទល្មើសជំរិតទារប្រាក់តាមប្រព័ន្ធអ៊ីនធឺណិត (VOIP)។
លោក សន ជ័យ នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជាបានថ្លែងថា អាជ្ញាធរគួរតែបើកការស៊ើបអង្កេតអំពីរបៀបដែលជនជាតិចិនមួយចំនួនអាចឆ្លងដែនចូលមករស់នៅកម្ពុជាដោយខុសច្បាប់ដើម្បីបញ្ជាក់ថា តើពួកគេចូលមកតាមវិធីណា ឬក៏មានជាប់ពាក់ព័ន្ធនឹងអំពើពុករលួយ។
លោកថា៖ «ហើយមួយទៀតការកើតមានបទល្មើសប្រព្រឹត្តឡើងជាក្រុម (ជនជាតិចិន) នេះគឺដោយសារភាពខ្វះចន្លោះរបស់អាជ្ញាធរនៅក្នុងការត្រួតពិនិត្យទៅលើការរស់នៅ និងការស្នាក់នៅរបស់ជនជាតិចិនហើយយើងឃើញហើយថា ពួកឧក្រិដ្ឋជន (ចិន) ហ្នឹងច្រើនប្រើមធ្យោបាយទំនើបៗជាច្រើនដើម្បីបាំងភ្នែកមហាជន និងអាជ្ញាធរដូចជាការជួលនៅក្នុងខុនដូ និងវីឡាជាក្រុមៗដែលខុសពីជនជាតិបរទេសផ្សេងៗទៀត»៕