ជន​ជាប់ចោទ​ពី​បទ​រំលោភ​សុំ​ឲ្យ​តុលាការ​កំពូល​ជួយ​រក​យុត្តិធម៌

Content image - Phnom Penh Post
ជន​ជាប់ចោទ​ជនជាតិ​អង់គ្លេស David John Fletcher ឡើង​តុលាការ​កំពូល​។ ផា លីណា

ភ្នំពេញ: ជនជាប់ចោទ វ័យ​ ៦៩ ​ឆ្នាំ David Jonh Fletcher ជាតិ​អង់គ្លេស និង​អតីត​ម្ចាស់​ហាង​មួយ​ក្នុង​ក្រុង​ភ្នំពេញ​ដែល​ត្រូវ​តុលាការ​ថ្នាក់​ក្រោម​ផ្ដន្ទាទោស​ដាក់​ពន្ធនាគារ​ ១០ ​ឆ្នាំ​ពី​បទ​រំលោភ​សេពសន្ថវៈ​នារី​ម្នាក់​កាលពី​ ៨ ​ឆ្នាំ​មុន​បាន​ទទូច​សុំ​ឲ្យ​តុលាការ​កំពូល​ធ្វើការ​វិចារណា​រឿងក្តី​ឲ្យ​គាត់​ឡើង​វិញ​។

នៅ​ក្នុង​សវនាការ​ជន​ជាប់ចោទ ឈ្មោះ David និយាយ​ទាំង​កំហឹង​ដោយ​យក​ដៃ​គោះ​តុ​នៅ​ចំពោះ​មុខ​ចៅក្រម​ដោយ​និយាយ​ថា​រូបគាត់​មាន​ឱកាស​ប្រាប់​ការពិត​ថា​បាន​រំលោភ​លើ​នារី​រងគ្រោះ​ម្តង ហើយ​ពីរ​សប្តាហ៍​ក្រោយ​មក​ក៏​រំលោភ​នាង​បាន​ម្តង​ទៀត​។

ទោះ​ជា​យ៉ាង​ណា David ថ្លែង​ថា​ការ​កាត់ទោស​ដោយ​តុលាការ​ថ្នាក់​ក្រោម​មិន​មាន​យុត្តិធម៌​ទេ​។ តែ​តុលាការ​​កម្ពុជា​ពុករលួយ​មិន​កាត់​ក្តី​ទៅ​តាម​ច្បាប់​ឡើយ​។

ជនជាប់ចោទ​និយាយ​ថា​៖ «​ខ្ញុំ​មិន​ទទួល​យក​ការ​កាត់ក្តី​នោះ​ទេ​តាមពិត​ទៅ​នាង​ជា​នារី​រកស៊ី​ផ្លូវ​ភេទ​ហើយ​នាង​អស់​ព្រហ្មចារី​តាំងពី​ប៉ុន្មាន​ខែ​មុន ថ្ងៃ​ចោទ​ខ្ញុំ​​ម្ល៉េះ​។ ខ្ញុំ​មិន​ទាមទារ​ឲ្យ​តុលាការ​ដោះលែង​ខ្ញុំ​ទេ ​តែ​សូម​កាត់ក្តី​ឲ្យ​យុត្តិធម៌​ទៅ​ព្រោះ​ខ្ញុំ​ជាប់​ឃុំ​ ៧ ​ឆ្នាំ​ហើយ​»​។

ក្រោយ​ជំនុំជម្រះ​លោកស្រី​ចៅក្រម គឹម សត្ថាវី ថ្លែង​ថា​សាលដីកា​ប្រឆាំង​ជនបរទេស​រូប​នេះ​នឹង​ប្រកាស​នៅ​ថ្ងៃ​ទី​ ២ ​សីហា​ខាង​មុខ​។

របាយការណ៍​បង្ហាញ​ទៀត​ថា​ជន​ជាប់ចោទ​បាន​ប្តឹង​ទាស់​សាលាឧទ្ធរណ៍​តែ​ត្រូវ​សាលាឧទ្ធរណ៍​ប្រកាស​សាលដីកា​នៅ​ថ្ងៃ​ទី​ ១៦ ​ឧសភា​ឆ្នាំ​ ២០១៤ សម្រេច​តម្កល់​សាលក្រម​របស់​សាលា​ដំបូង​រាជធានី​ភ្នំពេញ​ដដែល​។ ជន​ជាប់ចោទ​ត្រូវ​សាលា​ដំបូង​រាជធានី​ភ្នំពេញ​ជំនុំជម្រះ​កំបាំង​មុខ និង​ប្រកាស​សាលក្រម​​នៅ​ថ្ងៃ​ទី​ ៩ ឧសភា ឆ្នាំ​ ២០១១ ​ដោយ​ផ្តន្ទាទោស​ដាក់​ពន្ធនាគារ​ ១០ ​ឆ្នាំ​ចោទ​ពីបទ «​រំលោភ​សេពសន្ថវៈ​» ​តាម​បញ្ញត្តិ​មាត្រា​ ២៤១ នៃ​ក្រម​ព្រហ្មទណ្ឌ (​ចន្លោះ​ពី​ ៧-១៥ ​ឆ្នាំ​) ​និង​បង្គាប់​សង​សំណង​ទៅ​ជនរងគ្រោះ​ ២០ ​លាន​រៀល​។

ជន​ជាប់ចោទ​បាន​បង្ក​បទល្មើស​នៅ​ថ្ងៃ​ទី​ ១៥ ខែ​មីនា ឆ្នាំ​ ២០០៩ និង​នៅ​អំឡុង​ខែ​ឧសភា ឆ្នាំ​ ២០១០ បន្ទាប់មក​បាន​គេច​ខ្លួន​ទៅ​ប្រទេស​ថៃ​។

ដោយ​មាន​បណ្តឹង​ពី​នារី​រងគ្រោះ​អាជ្ញាធរ​កម្ពុជា​ក៏​សុំ​ធ្វើ​បត្យាប័ន​ពី​ប្រទេស​ថៃ​មក​កម្ពុជា​វិញ​បន្ទាប់ពី​តម្រួត​ថៃ​ចាប់​ឃុំ​ខ្លួន​បាន​មួយ​រយៈពេល​ខ្លី​។ លោក​ព្រះរាជអាជ្ញា នៅ មុនីជោត តំណាង​មហាអយ្យការ​បាន​ស្នើសុំ​ក្រុម​ប្រឹក្សា​ពិចារណា​តាម​ច្បាប់​។

អ្នកស្រី មុំ វិមានចំប៉ា មេធាវី​ការពារ​សិទ្ធិ​ឲ្យ​លោក David បាន​ហៅ​រឿង​នេះ​ថា​អយុត្តិធម៌​ព្រោះ​ចៅក្រម​តុលាការ​ថ្នាក់​ក្រោម​អាន​សាលក្រម​ឲ្យ​គាត់​ស្តាប់​ខណៈ​គាត់​គ្មាន​អ្នក​បកប្រែ​។ កូនក្ដី​អ្នកស្រី​បាន​សុំ​ពន្យារពេល​សវនាការ​តែ​មិន​ព្រម​។ កាត់​ម្តង​ទៀត​ក៏​មិន​បាន​ជូន​ដំណឹង​ឲ្យ​គាត់​ដឹង​។

លោកស្រី​មេធាវី​ថ្លែង​ថា​៖ «​លិខិត​កោសល្យវិច័យ​ពី​មន្ទីរពេទ្យ​ថា​សន្ទះ​ព្រហ្មចារី​នារី​រងគ្រោះ​នៅ​ល្អ​ទេ ហើយ​កូនក្តី​ខ្ញុំ​ថា​បើ​គាត់​ប្រព្រឹត្ត​មែន​គាត់​ព្រម​ទទួល​ទោស​។ យ៉ាង​ណា​សូម​ក្រុមប្រឹក្សា​ពិចារណា​»៕

ព័ត៌មានថ្មីៗ