ភ្នំពេញៈ សាលាឧទ្ធរណ៍ពីម្សិលមិញបានប្រកាសសាលដីកាផ្តន្ទាទោសបុរស ២ នាក់ ដាក់ពន្ធនាគារម្នាក់ៗ ១០ ឆ្នាំដដែល បន្ទាប់ពីជំនុំជម្រះកាលពីថ្ងៃទី ២៥ ខែ កុម្ភៈ ក្រោយពីជនជាប់ចោទទាំង ២ នាក់ត្រូវតុលាការខេត្តកោះកុងផ្តន្ទាទោសដាក់ពន្ធនាគារម្នាក់ៗ ១០ ឆ្នាំពាក់ព័ន្ធនឹងការជួញដូរគ្រឿងញៀនមេតំហ្វេតាមីន ៩ ថង់តូច និងទោសមិនរាងចាល។
ដោយអវត្តមានជនជាប់ចោទនៅក្នុងបន្ទប់សវនាការ ពីម្សិលមិញ លោកស្រីចៅក្រម គឹម ដានី បានអានសាលដីកាថា សំណុំរឿងគ្រឿងញៀនដែលមានជនជាប់ចោទឈ្មោះសំ ភារម្យ អាយុ ២៥ ឆ្នាំ ឈ្មោះពោធិ វ៉ាន់វិធូ អាយុ ៣៣ ឆ្នាំគឺជាសំណុំរឿងដែលបានជំនុំជម្រះកាលពីថ្ងៃទី ២៥ ខែ កុម្ភៈ ឆ្នាំ ២០១៩។
លោកស្រីចៅក្រមថ្លែងថា៖ «ប៉ុន្តែពេលនេះក្រុមប្រឹក្សាអានតែសេចក្តីសម្រេចទេហើយក្រុមប្រឹក្សាតម្កល់សាលក្រមនិងសាលដីការបស់ជនជាប់់ចោទឲ្យជាប់ពន្ធនាគារម្នាក់ ១០ ឆ្នាំដដែល»។
.jpg)
បើតាមកំណត់ហេតុរបស់តុលាការបង្ហាញថា សំណុំរឿងនេះត្រូវបានសាលាឧទ្ធរណ៍ជំនុំជម្រះម្តងរួចមកហើយ។ ក្រោយពីជំនុំជម្រះសាលាឧទ្ធរណ៍សម្រេចតម្កល់សាលក្រមរបស់សាលាដំបូងខេត្តកោះកុងឲ្យជនជាប់ចោទទាំង ២ នាក់ជាប់ពន្ធនាគារ ១០ ឆ្នាំម្នាក់ដដែល។
ប៉ុន្តែជនជាប់ចោទទាំង ២ នាក់មិនសុខចិត្តក៏បន្តប្តឹងសារទុក្ខទៅតុលាការកំពូលបន្តទៀតហើយត្រូវបានតុលាការកំពូលកាលពីថ្ងៃទី ២៧ ខែ មេសា ឆ្នាំ ២០១៦ ប្រកាសសាលដីកាតម្កល់ទោសដល់ជនជាប់ចោទទៀត។ ប៉ុន្តែតុលាការកំពូលបង្វិលសំណុំរឿងនេះមកឲ្យសាលាឧទ្ធរណ៍ពិនិត្យ និងពិចារណាម្តងទៀតនៅត្រង់មាត្រា ៨៨ នៃក្រមព្រហ្មទណ្ឌ (ទោសពាក់ព័ន្ធការមិនរាងចាល) ពីព្រោះតុលាការកំពូលយល់ថា សាលាឧទ្ធរណ៍បកស្រាយត្រង់មាត្រានេះមានការភាន់ច្រឡំ។
ជនជាប់ចោទ សំ ភារម្យ ធ្លាប់ជាប់ពន្ធនាគារ ២ ដង កាលពីឆ្នាំ ២០១០ ដែលក្នុង ១ បទល្មើសជាប់ ១ ឆ្នាំទាក់ទងនឹងបទលួចនិង ១ ឆ្នាំកន្លះពីបទទទួលផលចោរកម្ម។ រីឯឈ្មោះ ពោធិ វ៉ាន់វិធូ ក៏ធ្លាប់ជាប់ពន្ធនាគាររយៈពេល ១ ឆ្នាំពីបទឆបោក និង ៥ ឆ្នាំពាក់ព័ន្ធនឹងបទប្លន់ផងដែរ។
កំណត់ហេតុតុលាការដដែលបង្ហាញថា កាលពីថ្ងៃទី ១៥ មិថុនា ឆ្នាំ ២០១៥ មុនពេលកើតហេតុជនជាប់ចោទឈ្មោះសំ ភារម្យ អាយុ ២៥ ឆ្នាំ រស់នៅភូមិ ៣ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង បានទូរស័ព្ទទៅបុរសម្នាក់ឈ្មោះ លឿន មុំ ដើម្បីទាក់ទងបន្តរកទិញថ្នាំញៀនពីបុរសឈ្មោះពោធិវ៉ាន់វិធូ អាយុ ៣៣ ឆ្នាំក្នុងតម្លៃ ៨០ ម៉ឺនរៀល។
បន្ទាប់មកឈ្មោះ ពោធិ វ៉ាន់វិធូ បានជិះម៉ូតូយកថ្នាំញៀន ៩ កញ្ចប់តូចមកឲ្យឈ្មោះ សំ ភារម្យ តាមការប្រាប់របស់ឈ្មោះ លឿន មុំ នៅចំណុចភូមិ-សង្កាត់ វាលវែង ក្រុង ខេមរភូមិន្ទ ខេត្ត កោះកុង តែក៏ត្រូវសមត្ថកិច្ចឃាត់ខ្លួនបាន ២ នាក់តែម្ដង៕
