ជំនន់ទឹកភ្លៀងប៉ះពាល់នៅក្នុងខេត្តកំពត។ រូបថត នគរបាល
ភ្នំពេញៈ ខេត្ដជាប់សមុទ្រចំនួន ៤ និងខេត្ដនៅភាគឥឦសានចំនួន ២ បានរងគ្រោះធ្ងន់ធ្ងរពីគ្រោះទឹកជំនន់ទឹកភ្លៀងចាប់តាំងពីដើមខែសីហារហូតមកដោយបានបង្កផលប៉ះពាល់ជាបន្តបន្ទាប់ដល់ពលរដ្ឋជាង ៥ ០០០ គ្រួសារ និងដំណាំស្រូវជាង ៣ ០០០ ហិកតា រួមទាំងទ្រព្យសម្បត្ដិ ហេដ្ឋារចនាសម្ព័ន្ធ ផ្លូវថ្នល់ សាលារៀនមួយចំនួន។
លោក កែវ វី អ្នកនាំពាក្យគណៈកម្មាធិការគ្រប់គ្រងគ្រោះមហន្តរាយ បានថ្លែងប្រាប់ភ្នំពេញប៉ុស្ដិ៍ កាលពីម្សិលមិញថា តួលេខផលប៉ះពាល់ធ្ងន់ធ្ងរជាងគេចំនួន ៦ ខេត្ដ ពីជំនន់ទឹកភ្លៀង ក្នុងនោះ ២ ខេត្ដនៅតំបន់ភាគឦសាន គឺខេត្ដរតនគិរី និងមណ្ឌលគិរី និងខេត្ដជាប់សមុទ្រ ៤ ទៀត ព្រះសីហនុ កោះកុង កំពត និងខេត្ដកែប។
ខេត្ដទាំង ៦ នោះមានពលរដ្ឋរងផលប៉ះពាល់ចំនួន ៥ ៨៦៩ គ្រួសារ ភាគច្រើនប៉ះពាល់ខ្លាំង គឺនៅក្នុងខេត្តព្រះសីហនុ ខេត្ដកំពត និងខេត្ដរតនគិរី។ ក្នុងនោះសមត្ថកិច្ចបានជម្លៀសពលរដ្ឋចំនួន ១ ៣៤២ គ្រួសារ ទៅទីទួលសុវត្ថិភាព ហើយផលប៉ះពាល់ផ្សេងៗទៀតដូចជាហេដ្ឋារចនាសម្ព័ន្ធ សាលារៀនចំនួន ១៩ សាលា វត្ដអារាមលិចទឹក ៨ វត្ដ ដំណាំស្រូវលិចទឹកចំនួន ៣ ១១៩ ហិកតា ដំណាំរួមផ្សំ និងដំណាំចម្ការចំនួន ៧៥៣ ហិកតា។ ដំណាំលិចទឹកទាំងនេះ មានខ្លះខូចខាត និងខ្លះមិនខូចខាត។ ដោយសារទឹកជំនន់ទឹកភ្លៀងលិចមានរយៈពេលខ្លី ដូច្នេះដំណាំដូចជាដំណាំស្រូវមិនមានការខូចខាតទេ។
.jpg)
លោក វី បានថ្លែងថា៖ «យើងបានបែងចែកជា ២ ច្រក ក្នុងខេត្ដភាគឦសាន និងខេត្ដជាប់សមុទ្រ។ កម្លាំងយោធពលខេមរភូមិន្ទ រួមនឹងកងរាជអាវុធហត្ថ និងកងកម្លាំងមូលដ្ឋាន បានត្រៀមខ្លួនរួចហើយ សម្រាប់ពេលមានហេតុការណ៍កើតឡើង និងសង្គ្រោះដល់ប្រជាពលរដ្ឋភ្លាមៗ»។
លោកឲ្យដឹងថា ពលរដ្ឋរងគ្រោះពីជំនន់ទឹកភ្លៀងនៅខេត្ដរតនគិរីបានជម្លៀសចេញពីលំនៅឋានមួយរយៈពេលខ្លីប៉ុណ្ណោះ ដោយនាំយកសត្វពាហនៈ និងទ្រព្យសម្បត្ដិផ្សេងៗ មករក្សាទុកនៅទីទួលមានសុវត្ថិភាព។
ទាក់ទងនឹងផលប៉ះពាល់សរុបពីជំនន់ទឹកភ្លៀងនៅខេត្ដព្រះសីហនុ លោក កែវ វី នៅមិនទាន់ទទួលបានរបាយការណ៍បូកសរុបនៅឡើយទេ។ ប៉ុន្តែសម្រាប់ស្រុកព្រៃនប់កម្លាំងអន្តរាគមន៍បានជួយសង្គ្រោះពលរដ្ឋពីទឹកជំនន់ចំនួន ២៩៥ គ្រួសារ ដោយជម្លៀសមកកាន់ទីទួលសុវត្ថិភាព ក្នុងនោះផ្ទះពលរដ្ឋលិចទឹកចំនួន ១៤៣ ខ្នងផ្ទះ។ ដោយឡែកចំពោះខេត្ដ កែប និងខេត្ដកោះកុង មានការរងគ្រោះតិចតួចប៉ុណ្ណោះ ព្រោះខេត្ដទាំងនេះ មានប្រព័ន្ធបង្ហូរទឹកចេញច្រើនទៅកាន់ព្រែក និងមានសមុទ្រជាដើម។
លោក កែវ វី បានឲ្យដឹងថា នៅខេត្តកំពតមានផលប៉ះពាល់ច្រើន។ ពលរដ្ឋរងផលប៉ះពាល់នៅក្នុងស្រុកចំនួន ៤ មានចំនួន ៣ ០១២ គ្រួសារ។ ជម្លៀសពលរដ្ឋមកទីទួលសុវត្ថិភាពចំនួន ៦០ គ្រួសារ និងដំណាំស្រូវចំនួន ២៨៦ ហិកតា និងដំណាំទុរេនជាង ២ ហិកតា រងផលប៉ះពាល់ជន់លិច។
ទាក់ទងនឹងជំនន់ទឹកភ្លៀងនេះកាលពីពេលទៀបភ្លឺថ្ងៃទី ១២ ខែ សីហា បានបង្កឲ្យបាក់ទំនប់បង្ហៀរទឹក ឈ្មោះទំនប់កូនសត្វ ឬទំនប់ប្រទាក់ក្រឡា ស្ថិតនៅឃុំកូនសត្វ ស្រុកទឹកឈូ ខេត្តកំពត។ ប៉ុន្ដែមិនមានផលប៉ះពាល់ធ្ងន់ធ្ងរដល់ពលរដ្ឋទេ។
លោក ជាវ តាយ អភិបាលខេត្ដកំពត បានអះអាងថា មិនមានផលប៉ះពាល់ដល់ពលរដ្ឋទេ ព្រោះអាជ្ញាធរបានបិទជិតវិញអស់ហើយ មិនមានហានិភ័យពីទឹកជំនន់ធំដុំទេ។ ទឹកក៏បានចាប់ផ្ដើមស្រកវិញខ្លះហើយ។ ពលរដ្ឋក៏មិនមានលិចលង់គ្រោះថ្នាក់ដល់ជីវិតដែរ។
លោក លឹម គានហោ រដ្ឋមន្រ្ដីក្រសួងធនធានទឹក និងឧតុនិយម យកគ្រឿងចក្រធុនធំប្រមាណ ២០ គ្រឿង និងកម្មករសរុបចំនួន ១០០ នាក់ ប្រើពេលជាង ២០ ម៉ោង ទើបទប់ទំនប់ដែលបាក់នោះបានជោគជ័យ។ ក្រសួងបញ្ជាក់ថា ការងារទប់ទល់ការហូរដាច់នៃទំនប់អាងទឹកកូនសត្វ ទំនប់ត្រូវបានបិទភ្ជិតទាំងស្រុងនៅម៉ោង ៨ ព្រឹកម្សិលមិញនេះ។ ទំនប់អាងទឹកនេះ ជាប្រភេទអាងដែលហៅថា អាងទឹកតភ្ជាប់ភ្នំ ២ ភ្នំតាពក និងភ្នំកូនសត្វ ដែលមានលទ្ធភាពរក្សាទឹកទុកក្នុងបរិមាណ ១០ លានម៉ែត្រគុប ដោយមានរបបជ្រោះទឹកហូរខ្លាំង។
លោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុឲ្យដឹងកាលពីម្សិលមិញថា ជំនន់ទឹកភ្លៀងក្នុងខេត្ដព្រះសីហនុផ្ដើមស្រកចុះខ្លះហើយ ចំណែកទឹកភ្លៀងនៅបន្តធ្លាក់តិចតួចប៉ុណ្ណោះកាលពីម្សិលមិញ នៅតាមក្រុងស្រុកឃើញថា ទឹកមានការស្រកចុះហើយ បើសិនជាភ្លៀងមិនបន្តធ្លាក់ទេ គឺលែងមានបញ្ហាអ្វីទៀតហើយ។
លោក ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ កាលពីម្សិលមិញបានអំពាវនាវឲ្យកងទ័ពទាំងអស់ និងអាជ្ញាធរមូលដ្ឋាន ត្រៀមខ្លួនជួយដល់ប្រជាពលរដ្ឋដែលរងគ្រោះដោយទឹកជំនន់។
លោកបានថ្លែងថា៖ «សូមបងប្អូនកងទ័ពទាំងអស់ ក៏ដូចជាអាជ្ញាធរមូលដ្ឋាន ត្រៀមខ្លួនឲ្យបានល្អ ដើម្បីជួយដល់បងប្អូនប្រជាពលរដ្ឋរបស់យើង»។
លោក យន់ ផល្លី មន្រ្ដីសម្របសម្រួលសមាគមអាដហុកប្រចាំខេត្ដកំពត បានឲ្យដឹងថា ដោយសារភ្លៀងធ្លាក់ចាប់តាំងពីដើមខែសីហា រួមនឹងការបើកទ្វារទឹកទំនប់វារីអគ្គិសនីកំចាយ ទើបបង្កឲ្យមានការជន់លិចខ្លាំងនៅស្រុកឈូក ដោយប៉ះពាល់ដល់ពលរដ្ឋចំនួន ៤ ឃុំ។
លោកបន្តថា៖ «ប៉ុន្ដែពេលនេះ ទឹកជំនន់មានការថយចុះហើយ។ ជំនន់ទឹកភ្លៀង និងទឹកជំនន់ពីការបាក់ទំនប់នេះ វាមានការជន់លិចរយៈពេលខ្លី ដូច្នេះមិនបានបង្កផលប៉ះពាល់ធ្ងន់ធ្ងរដល់ពលរដ្ឋទេ»។ យ៉ាងហោចណាស់មនុស្ស ៤ នាក់បានស្លាប់ ដោយគ្រោះជំនន់ទឹកភ្លៀង ដែលបានធ្លាក់ភ្លៀងខ្លាំងនៅក្នុងខេត្តព្រះសីហនុ និងរតនគិរី ព្រោះរងឥទ្ធិពលខ្យល់ព្យុះតាំងពីដើមខែសីហា៕
