កំណាត់ឈើដែលពលរដ្ឋប្រទះឃើញលាក់ទុកក្នុងព្រៃជិតភូមិក្នុងស្រុកអូររាំងកាលពីថ្មីៗនេះ។ ហ្វេសប៊ុក
មណ្ឌលគិរីៈ ឈើជ្រុងប្រភេទដើមស្រឡៅ និងគគីរជិត ៣០ កំណាត់ មានប្រវែងប្រហែល ៣ ម៉ែត្រ និងមានមុខកាត់ចាប់ពី ៣០ ទៅ ៤០ សង់ទីម៉ែត្រ ត្រូវបានពលរដ្ឋរស់នៅក្នុងភូមិពូត្រែង ឃុំដាក់ដាំ ស្រុកអូររាំង ខេត្តមណ្ឌលគិរី ប្រទះឃើញគេកាប់ និងលាក់ទុកក្នុងព្រៃកាលពីថ្ងៃទី ៧ ខែ ឧសភា នៅក្បែរផ្ទះពលរដ្ឋមានចម្ងាយប្រហែល ១ គីឡូម៉ែត្រ។
លោក ទឺយ ធិ សមាជិកសហគមន៍ការពារព្រៃឈើនៅក្នុងភូមិពូត្រែង បានប្រាប់ភ្នំពេញប៉ុស្ដិ៍កាលពីម្សិលមិញថា ក្រុមក្មេងឃ្វាលគោបានប្រទះឃើញឈើទាំងនេះ និងបានរាយការណ៍មកប្រាប់លោក ហើយក្រោយមកលោកបានជិះម៉ូតូចុះទៅមើលក៏បានឃើញឈើទាំងនោះ ដែលត្រូវបានគេអារជាជ្រុងៗ និងលាក់ទុកដោយគ្របស្លឹកឈើ និងតង់ចំនួន៣កន្លែងស្ថិតនៅជិតៗគ្នា ស្របពេលឈើចំនួន ២ ទីតាំងទៀតត្រូវបានគេដឹកចេញអស់។
លោក ទឺយ ធិ បានអះអាងថា ឈើទាំងនោះអាចត្រូវគេកាប់ចេញពីដីព្រៃសហគមន៍ប៉ុន្តែលោកមិនដឹងថា នឹងត្រូវដឹកចេញទៅកន្លែងណាឡើយ។
.jpg)
លោកថា៖ «អត់ឃើញគ្រឿងចក្រដែលត្រៀមដឹកឈើចេញអីទេ ប៉ុន្តែឈើហ្នឹងកាប់ចេញពីព្រៃសហគមន៍។នៅព្រឹកថ្ងៃទី ៧ ក្មេងឃ្វាលគោក្នុងភូមិពូត្រែងហ្នឹងបានឃើញ ហើយក៏វាបានមកប្រាប់ខ្ញុំ»។
លោក ទឺយ ធិ បានទូរស័ព្ទទៅប្រាប់លោក គ្រើង តុលា ដែលតំណាងសហគមន៍ការពារព្រៃឈើខេត្តមណ្ឌលគិរី អំពីការប្រទះឃើញឈើទាំងនេះហើយក្រោយមក លោក តុលា ក៏បានទូរស័ព្ទជូនដំណឹងនេះបន្ត ទៅលោក អ៊ុំ វណ្ណសុភ័គ ប្រធានរដ្ឋបាលព្រៃឈើខេត្តមណ្ឌលគិរី។
ប៉ុន្តែលោក គ្រើង តុលា បានលើកឡើងតាមហ្វេសប៊ុករបស់លោកនៅថ្ងៃទី ៨ ខែ ឧសភា ថា ប្រធានរដ្ឋបាលព្រៃឈើបានប្រាប់លោកថាមិនមានលទ្ធភាពទៅដឹកជញ្ជូនឈើទាំងនោះមករក្សាទុកឡើយ ដោយសារពុំមានកម្លាំងគ្រប់គ្រាន់។
លោកថា៖ «គឺនាយខណ្ឌរដ្ឋបាលព្រៃឈើខេត្ត គាត់ថាគ្មានអ្នកជួយលើកដាក់ឡាន។ ចុះកម្លាំងទៅណាអស់ហើយឬមួយចាំខ្ញុំរាយការណ៍ទៅឯកឧត្តមគណៈនៃគណៈអភិបាលខេត្តគ្រប់រឿង ទើបមានអ្នកលើកឈើដាក់ឡាន»។
ទោះជាយ៉ាងណា លោក អ៊ុំ វណ្ណសុភ័គ បានប្រាប់ភ្នំពេញប៉ុស្ដិ៍ថា លោក គ្រើង តុលា ពុំបានហៅទូរស័ព្ទទៅប្រាប់លោកពីករណីនេះឡើយ ហើយខាងរដ្ឋបាលព្រៃឈើក៏ពុំខ្វះកម្លាំងដើម្បីដឹកឈើមករក្សាទុកដែរ។
លោក វណ្ណសុភ័គ បន្តថា លោកទើបដឹងរឿងនេះនៅព្រឹកថ្ងៃទី ៩ ខែ ឧសភា នេះប៉ុណ្ណោះ ហើយការលើកឡើងរបស់លោក គ្រើង តុលា គឺជាការបំផ្លើស និងមិនមែនសហការគ្នាឡើយ។
លោកថា៖ «ខ្ញុំកំពុងតែខឹងថាតេមកខ្ញុំហើយថាខ្ញុំអត់មានកម្លាំងអីណា គាត់តេមកខ្ញុំពីអង្កាល់ បើខ្ញុំអត់ដឹងរឿងអីផង ហើយគាត់មកចុះអ៊ីចឹង។ គាត់មានតេមកខ្ញុំពីអង្កាល់ ពីម្សិលមិញខ្ញុំចូលព្រៃតាំងពីព្រឹកដល់ម៉ោង ៧-៨ យប់បានចេញមកវិញ»។
លោកបន្ថែមថា៖ «ខ្ញុំគ្រាន់តែដឹងថា (ឈើ) នៅក្បែរៗភូមិពូត្រែង ប៉ុន្តែបើចង់ដឹង យើងត្រូវសហការគ្នាចុះទៅមើល និងចង្អុលបង្ហាញ ហើយបើត្រឹមតែរាយការណ៍តាមមាត់ និងឱ្យពួកខ្ញុំទៅរក គឺរកមិនឃើញទេ»។
ប្រធានរដ្ឋបាលព្រៃឈើរូបនេះបញ្ជាក់ថា ខាងលោកមានកម្លាំងគ្រប់គ្រាន់ និងមានលទ្ធភាពជួលរថយន្តទៅដឹកយកឈើទាំងនោះនៅពេលណាដឹងទីតាំងច្បាស់ ប៉ុន្តែលោកមិនទាន់អាចបញ្ជាក់ថា តើឈើនោះខុសច្បាប់ឬយ៉ាងណាឡើយ។
ចំណែកមេឃុំដាក់ដាំលោក ចាស់ ណា បានលើកឡើងដែរថា លោកក៏ពុំបានដឹងពីការលាក់ទុកឈើនៅក្បែរភូមិពូត្រែងដែរ ប៉ុន្តែលោកអះអាងថា ម្ដុំឃុំរបស់លោកពុំមានសកម្មភាពកាប់ទ្រង់ទ្រាយធំឡើយ។
ប៉ុន្តែលោក ទឺយ ធិ សមាជិកសហគមន៍ការពារព្រៃឈើនៅក្នុងភូមិពូត្រែងបានអះអាងថា កន្លងមកនៅពេលរកឃើញមានការកាប់ឈើខុសច្បាប់នៅក្នុងឃុំ លោកតែងតែបានរាយការណ៍ប្រាប់ទៅអាជ្ញាធរឃុំ ប៉ុន្តែអាជ្ញាធរមិនដែលចុះទៅមើលឡើយ៕
