ភ្នំពេញៈ តុលាការកំពូលកាលពីម្សិលមិញបានប្រកាសសាលដីកាតម្កល់ទោស ២ ឆ្នាំ ដល់ស្ត្រីជាប់ចោទម្នាក់ដែលបានជាប់ពាក់ព័ន្ធគប់ស្បែកជើងដាក់ស្លាកគណបក្សប្រជាជនកម្ពុជាប្រព្រឹត្តនៅភូមិអុង ឃុំរាម ស្រុកព្រៃនប់ ខេត្តព្រះសីហនុកាលពីខែមេសា ឆ្នាំ ២០១៧។
លោក ចៅក្រម គង់ ស្រ៊ីម បានអានសាលដីកានៅក្នុងបន្ទប់សវនាការដោយកំបាំងមុខជនជាប់ចោទ និងមេធាវីក្នុងសំណុំរឿងនេះ។ ស្ត្រីជាប់ចោទឈ្មោះ សំ សុខា និង មានមេធាវីរបស់ជនជាប់ចោទឈ្មោះ ឡោ ជុនធី។ ស្ត្រីជាប់ចោទត្រូវបានតុលាការខេត្តកំពង់ស្ពឺចោទ ២ បទល្មើសដែល ១ បទចោទផ្តន្ទាទោស ២ ឆ្នាំ និងពិន័យប្រាក់ ៥ លានរៀល ដូចគ្នាកាលពីខែមករា ឆ្នាំ ២០១៨។
លោក ចៅក្រម បានថ្លែងថា៖ «តុលាការយល់ថា ការដែលឧទ្ធរណ៍សម្រេចតម្កល់ទោស ២ ឆ្នាំដល់ស្ត្រីជាប់ចោទត្រឹមត្រូវតាមច្បាប់ហើយ»។
លោក ឡោ ជុនធី មេធាវីការពារសិទ្ធិឲ្យស្ត្រីជាប់ចោទប្រាប់តាមទូរស័ព្ទថា លោកបានស្នើសុំឲ្យតុលាការកំពូលស្រូបទោស និងពិចារណាទម្លាក់ចោល ១ បទចោទ (បទចោទប្រព្រឹត្តនៅប្រទេសថៃ) ទៅព្រោះបទចោទ ១ មុនគាត់បានអនុវត្តទោស ២ ឆ្នាំផុតកំណត់ហើយ។
លោក មេធាវី ថ្លែងថា៖ «ថ្ងៃប្រកាសសាលដីកាម្សិលមិញនេះតុលាការលើកឡើងថាគ្មានគោលការណ៍ពិចារណាស្រូបទោសបានទេ។ ឥឡូវមិនដឹងថាម៉េចដែរ បើតុលាការកំពូលតម្កល់ហើយនោះ។ សំណុំរឿងគាត់សរុបចូលគ្នាគឺជាប់ទោស ៤ ឆ្នាំ និងពិន័យប្រាក់ ១០ លានរៀល»។
សំណុំរឿងនេះស្ត្រីជាប់ចោទឈ្មោះ សំ សុខា អាយុ ៣៨ ឆ្នាំជាកម្មករកាត់ដេរមានលំនៅភូមិត្រស់ ក្រុងច្បារមន ខេត្តកំពង់ស្ពឺដោយកាលពីអំឡុងខែមេសា ឆ្នាំ ២០១៧ បានយកស្បែកជើងគប់ទៅលើស្លាកគណបក្សប្រជាជនកម្ពុជាប្រព្រឹត្តនៅភូមិអុង ឃុំរាម ស្រុកព្រៃនប់ ខេត្តព្រះសីហនុ។ ក្រោយពីបង្កហេតុ សមត្ថកិច្ចនគរបាលបានស្វែងរកចាប់ខ្លួនតាមដីការបស់សាលាដំបូងខេត្តកំពង់ស្ពឺហើយស្ត្រីជាប់ចោទបានរត់ទៅលាក់ខ្លួននៅប្រទេស ថៃ។
អំឡុងពេលគេចខ្លួនក្នុងប្រទេស ថៃ ស្ត្រីជាប់ចោទបានបង្ហោះសារដែលមានន័យរិះគន់ដល់រដ្ឋាភិបាលកម្ពុជា ប៉ុន្តែក្រោយមកត្រូវបានសមត្ថកិច្ចថៃចាប់ខ្លួនប្រគល់ឲ្យអាជ្ញាធរកម្ពុជាវិញក្នុងអំឡុងឆ្នាំ ២០១៨។ ស្ត្រីនេះជាប់ចោទពីបទជេរប្រមាថជាសាធារណៈ និងបទញុះញង់ឲ្យមានការរើសអើង នាងបានប្តឹងទាស់ទៅសាលាឧទ្ធរណ៍ ប៉ុន្តែត្រូវសាលាឧទ្ធរណ៍សម្រេចតម្កល់ទោសដដែល៕