លោក យាង សុជាមេត្តា និងលោក អ៊ួន ឈិន។ ហេង ជីវ័ន
ភ្នំពេញៈ បើទោះបីជាមានសេរីភាពនៅក្រៅឃុំក៏ដោយ អតីតបុគ្គលិកវិទ្យុអាស៊ីសេរី ២ នាក់ នៅតែបន្តទទូចសុំឲ្យតុលាការទម្លាក់បទចោទ ពាក់ព័ន្ធករណី រឿងផ្តល់ព័ត៌មានឲ្យបរទេស និងការផលិតភាពយន្តអាសអាភាស ខណៈអង្គជំនុំជម្រះនឹងប្រកាសសេចក្ដីសម្រេចនៅថ្ងៃទី ៣០ ខែ សីហា នេះ។
កាលពីថ្ងៃ សុក្រ ទី ៩ សីហា សប្តាហ៍កន្លងមក សាលាដំបូងរាជធានីភ្នំពេញបានបើកអង្គជំនុំជម្រះរឿងក្តីរបស់លោក យាង សុជាមេត្តា ហៅ យាង សុធារិន្ទ និងលោក អ៊ួន ឈិន អតីតបុគ្គលិកវិទ្យុអាស៊ីសេរី លើសំណុំរឿងសុំទម្លាក់បទចោទ ប៉ុន្តែអង្គជំនុំជម្រះមិនបានសម្រេចសេចក្ដីភ្លាមៗនោះទេ។
លោក យាង សុជាមេត្តា ថ្លែងថា៖ «ពួកខ្ញុំយល់ថា ប្រសិនជាតុលាការផ្អែកលើយុត្តិធម៌ត្រឹមត្រូវនោះគឺពួកខ្ញុំទាំង ២ នាក់ សង្ឃឹមថានឹងទទួលបានយុត្តិធម៌។ ដោយផ្អែកទៅលើអង្គហេតុអង្គច្បាប់កន្លងទៅពួកខ្ញុំសង្ឃឹមថាចៅក្រមជំនុំជម្រះនឹងផ្អែកលើគោលការណ៍យុត្តិធម៌»។
.jpg)
ការជំនុំជម្រះនេះ គឺបន្តពីការជំនុំជម្រះកាលពីខែកក្កដា ដែលមានមេធាវីការពារសិទ្ធិឲ្យពួកគេទាំង ២ នាក់ គឺមានលោកមេធាវី សំ ចំរើន និងលោកមេធាវី គង់ ពិសី។
លោក សុជាមេត្តា ថ្លែងថា៖ «នៅក្នុងអង្គសវនាការជំនុំជម្រះកាលពីថ្ងៃទី ៩ សីហា នោះពួកខ្ញុំសុំឲ្យតុលាការ ទម្លាក់បទចោទប្រកាន់មកលើពួកខ្ញុំ ពីព្រោះថា រឿងនេះពួកខ្ញុំមិនបានប្រព្រឹត្តដូចការចោទប្រកាន់ទេ»។
លោកបន្តថា នៅក្នុងការជំនុំជម្រះនោះដែរមានលោក សេង ហៀង ជាតំណាងអយ្យការបានសន្និដ្ឋានពាក់ព័ន្ធនឹងរឿងក្តីរបស់ពួកលោកគឺមាន ៣ ករណី។
ទី១ ទាក់ទងនឹងការជួលស្ទូឌីយោដែលលោក អ៊ួន ឈិន ជួលនៅជាន់ទី៧ នៃសណ្ឋាគារ ម៉ារ៉ាឌី ក្បែរស្ពានអាកាសស្ទឹងមានជ័យ ដែលជាភាពងាយស្រួលសម្រាប់ក្នុងការបញ្ជូនព័ត៌មានទៅបរទេស និងសម្រាប់ការផ្សាយផ្សេងៗ។
ករណីទី២ តំណាងអយ្យការសន្និដ្ឋានថា លោក អ៊ួន ឈិន នៅពេលដែលបង្កើតស្ទូឌីយោហ្នឹង គឺមិនបានសុំច្បាប់អាជ្ញាធរមូលដ្ឋានទេ ដែលអាចមានចេតនាទុច្ចរិតហើយបានជាមិនសុំច្បាប់អាជ្ញាធរ។
ទី៣ គឺពួកលោកនៅតែផលិតព័ត៌មានហើយបញ្ជូនព័ត៌មានឲ្យវិទ្យុអាស៊ីសេរី បើទោះបីជាក្រោយពីអាស៊ីសេរីបានបិទទ្វារការិយាល័យរបស់ខ្លួននៅរាជធានីភ្នំពេញបានមួយសប្តាហ៍ក្តី គឺពួកលោកនៅតែបានផ្តល់ព័ត៌មានទៅឲ្យវិទ្យុអាស៊ីសេរីទៀត។ នៅក្នុងអង្គជំនុំជម្រះ តំណាងអយ្យការចោទសួរថា ហេតុអីបានជាពួកលោក នៅតែបញ្ជូនព័ត៌មានទៅទៀតបើវិទ្យុអាស៊ីសេរីត្រូវបានបិទហើយនោះ ដោយផ្អែកលើចំណុចទាំងអស់ហ្នឹងហើយទើបតំណាងអយ្យការស្នើសុំទៅចៅក្រមប្រឹក្សាជំនុំជម្រះ ឲ្យរក្សាទុកបទចោទប្រកាន់ដដែល ទៅលើពួកគេទាំង ២ នាក់។
លោកមេធាវី សំ ចំរើន បានថ្លែងកាលពីថ្ងៃទី ៩ សីហា នៅក្នុងអង្គសវនាការ នោះ លោកបានសន្និដ្ឋាន ថា តុលាការបានចោទកូនក្តីរបស់លោកពីបទបញ្ជូនព័ត៌មានទៅរដ្ឋបរទេសដែលធ្វើឲ្យអន្តរាយដល់ការការពារជាតិ ហើយខាងតំណាងអយ្យការក៏មិនបានលើកពាក្យគន្លឹះនៅក្នុងបទល្មើសដែលពាក់ព័ន្ធការចោទប្រកាន់លើកូនក្ដីរបស់លោកដែរ។
លោកមេធាវី សំ ចំរើន បានថ្លែងថា៖ «ខាងតំណាងអយ្យការ មិនដែលបានបង្ហាញឲ្យបានច្បាស់លាស់ ថាតើព័ត៌មានណាខ្លះដែលបញ្ជូនទៅនោះហើយមានខ្លឹមសារបែបណា និងជាព័ត៌មានអ្វីដែលនាំឲ្យអន្តរាយបែបណាមានការខូចខាតបែបណាគឺអត់មាន និងតំណាងអយ្យការមិនដែលបានបង្ហាញដែរ»។
លោកមេធាវី ថ្លែងថាទាក់ទងនឹង រដ្ឋបរទេសវិញ ខាងរដ្ឋាភិបាលកម្ពុជា មិនដែលឃើញធ្វើរឿងហ្នឹងដែរ ដើម្បីបញ្ជាក់ឲ្យបានច្បាស់លាស់ទេ។
លោកមេធាវី សំ ចំរើន និងលោក គង់ ពិសី បានសុំឲ្យតុលាការទម្លាក់ចោលបទចោទដល់ កូនក្តីរបស់លោកទាំង ២ នាក់។ លោកមេធាវី សំ ចំរើន ប្រាប់ថា ចំពោះសំណុំរឿងរបស់លោក អ៊ួន ឈិន និងលោក យាង សុជាមេត្តា ត្រូវបានលោកមេធាវី សំ ចំរើនប្រាប់ថានឹងប្រកាសសាលក្រមនៅថ្ងៃទី ៣០ ខែ សីហា ខាងមុខ៕
