មន្ត្រី គ.ជ.ប ចាក់សន្លឹកឆ្នោតចេញពីហិប ក្រោយពីការបោះឆ្នោតរួច។ ហុង មិនា
ភ្នំពេញៈ មួយថ្ងៃបន្ទាប់ពីការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) រិះគន់ថាពលរដ្ឋកម្ពុជាមួយផ្នែកធំមិនត្រូវបានផ្តល់ឲ្យនូវតំណាងរបស់ខ្លួន បន្ទាប់ពីគណបក្សសង្គ្រោះជាតិត្រូវបានរំលាយមិនឲ្យចូលរួមបោះឆ្នោតជាតិនោះស្ថានបេសកកម្មកម្ពុជាប្រចាំការិយាល័យអង្គការសហប្រជាជាតិបានប្រតិកម្មដោយថា ការចោទប្រកាន់របស់ OHCHR គឺគ្មានមូលដ្ឋាន ខណៈការបោះឆ្នោតជា «ព្រឹត្តិការណ៍មិនធ្លាប់មានពីមុនក្នុងប្រវត្តិសាស្ត្រទំនើបរបស់កម្ពុជា»។
កាលពីថ្ងៃសុក្រសប្ដាហ៍មុនអ្នកនាំពាក្យការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) លោកស្រី Ravina Shamdasani បានចេញសេចក្តីថ្លែងការណ៍មួយដោយនិយាយថា ប្រជាជនកម្ពុជាមួយផ្នែកធំមិនត្រូវបានផ្តល់ឲ្យនូវតំណាងរបស់ខ្លួន បន្ទាប់ពីគណបក្សសង្គ្រោះជាតិត្រូវបានរំលាយមិនឲ្យចូលរួមការបោះឆ្នោតជាតិកាលពីចុងខែកក្កដា។
សេចក្ដីថ្លែងការណ៍ដដែលថាដំណើរការមុនការបោះឆ្នោតមានការបំភិតបំភ័យ ការទិញសន្លឹកឆ្នោត ការដាក់កំហិតលើអង្គការសង្គមស៊ីវិល ហើយគេហទំព័រ ១៧ ត្រូវបានបិទនៅជុំវិញថ្ងៃបោះឆ្នោត ហើយចំណាត់ការផ្លូវច្បាប់ត្រូវបានធ្វើលើអ្នកអំពាវនាវ ឬបង្ហាញការធ្វើពហិការមិនទៅបោះឆ្នោត។
.jpg)
លោកស្រីបានអំពាវនាវឲ្យរដ្ឋាភិបាលកម្ពុជាបង្កើតបរិយាកាសសម្រាប់ការពិភាក្សានយោបាយដោយចំហ និងមានលក្ខណៈរួមបញ្ចូលដែលអនុញ្ញាតឲ្យសំឡេងទាំងអស់នៅកម្ពុជាត្រូវបានឮ។
លោកស្រីថា៖ «យើងជំរុញរដ្ឋាភិបាលកម្ពុជាដោះលែងគូបដិបក្ខនយោបាយ អ្នកកាសែត អ្នកការពារសិទ្ធិមនុស្ស និងពលរដ្ឋសាមញ្ញដែលត្រូវបានឃុំខ្លួនដោយសារការអនុវត្តសិទ្ធិមនុស្សរបស់ពួកគេ ជាពិសេសសិទ្ធិចំពោះសេរីភាពនៃការបញ្ចេញមតិ»។
លោកស្រីថា៖ «ការគោរពសិទ្ធិមនុស្ស និងសង្គមស៊ីវិលរស់រវើកដែលឲ្យមានលំហសម្រាប់ពិភាក្សាបញ្ហាស្មុគស្មាញ និងចម្រូងចម្រាសគឺជាគ្រឿងសំខាន់ ប្រសិនបើចង់បញ្ចៀសជម្លោះដូចអតីតកាល និងប្រសិនបើចង់ឲ្យមានការអភិវឌ្ឍដោយសន្តិភាព និងចីរភាព»។
ប្រទេសកម្ពុជាបានរៀបចំការបោះឆ្នោតជាតិកាលពីថ្ងៃទី ២៩ ខែកក្កដា ក្នុងនោះគណបក្សប្រជាជនកម្ពុជាបានឈ្នះអាសនៈទាំងអស់ ១២៥ ក្នុងរដ្ឋសភា។ ប៉ុន្តែគណបក្សប្រឆាំងដ៏ធំគឺគណបក្សសង្គ្រោះជាតិដែលធ្លាប់ឈ្នះអាសនៈ ៥៥ ក្នុងចំណោមអាសនៈសភា ១២៣ ក្នុងឆ្នាំ ២០១៣ ត្រូវបានរំលាយកាលពីឆ្នាំមុន ខណៈលោក កឹម សុខា មេដឹកនាំគណបក្សនេះត្រូវបានចាប់ខ្លួនពីបទក្បត់ជាតិហើយសមាជិកបក្ស ១១៨ នាក់ត្រូវបានហាមប្រាមមិនឲ្យធ្វើនយោបាយ។
យ៉ាងណាក្ដីមួយថ្ងៃក្រោយមកស្ថាប័នបេសកកម្មកម្ពុជាប្រចាំការិយាល័យអង្គការសហប្រជាជាតិ (UN) បានចេញសេចក្ដីប្រកាសប្រតិកម្មដោយថ្លែងថា ការចោទប្រកាន់របស់ OHCHR គឺគ្មានមូលដ្ឋាន និងថាការបោះឆ្នោតខែកក្កដាអាចត្រូវបានចាត់ទុកថាជា «ព្រឹត្តិការណ៍មិនធ្លាប់មានពីមុនក្នុងប្រវត្តិសាស្ត្រទំនើបរបស់កម្ពុជា»។
សេចក្ដីប្រកាសបានបញ្ជាក់ថា៖ «ចំនួនអ្នកទៅបោះឆ្នោតខ្ពស់ ដំណើរការរលូន និងការមិនមានហិង្សាមុនក្នុងអំឡុងពេល និងបន្ទាប់ពីថ្ងៃបោះឆ្នោតបង្ហាញយ៉ាងច្បាស់អំពីរបៀបដែលសិទ្ធិមនុស្ស និងប្រជាធិបតេយ្យបានចាក់ឫសគល់យ៉ាងជ្រៅ និងរីកដុះដាលទូលំទូលាយក្នុងសង្គមកម្ពុជាដែល OHCHR គួរតែអបអរ និងសរសើរ ឬលើកទឹកចិត្តបន្ថែមទៀត»។
ដោយសំដៅទៅអតីតគណបក្សសង្គ្រោះជាតិស្ថានបេសកកម្មនេះថា ការអវត្តមានគណបក្សតែមួយ OHCHRមើលឃើញបរិយាកាសការបោះឆ្នោតកម្ពុជាតែចំណុចអាក្រក់ និងបន្ទាប់កិច្ចខិតខំប្រឹងប្រែងរបស់គណបក្សចំនួន ២០ ព្រមទាំងចំណេះដឹងសិទ្ធិមនុស្សរបស់ប្រជាជនកម្ពុជា។
ឆ្លើយតបនឹងការអំពាវនាវឲ្យមានការជជែកនយោបាយ ស្ថានបេសកកម្មនេះបានថ្លែងថា រដ្ឋាភិបាលថ្មីបានបង្កើតវេទិកាសន្ទនាសម្រាប់គណបក្សដែលបានចូលរួមការបោះឆ្នោតដោយសំដៅទៅលើការប្រកាសរបស់លោកនាយករដ្ឋមន្ត្រី ហ៊ុន សែន កាលពីសប្តាហ៍មុនដែលលោកថានឹងប្រឹក្សាយោបល់ជាមួយគណបក្សទាំងអស់។
ដោយការពារចំណាត់ការផ្លូវច្បាប់របស់កម្ពុជាទៅលើអ្នកកាសែត អ្នកនយោបាយ និងអ្នកការពារសិទ្ធិមនុស្ស ស្ថានបេសកកម្មនេះបានថ្លែងថា ការអំពាវនាវឲ្យមានការដោះលែងពួកគេ «គឺមិនខុសពីការអំពាវនាវឲ្យរដ្ឋាភិបាលជ្រៀតជ្រែកទៅក្នុងសមត្ថកិច្ចតុលាការដែលជាស្ថាប័នឯករាជ្យ»ឡើយ៕ PS
