ជនសង្ស័យរឿងឃាតកម្ម។ រូបថត នគរបាល
បាត់ដំបងៈ អាជ្ញាធរថៃបានចាប់បុរសជាជនជាតិខ្មែរ ២ នាក់បញ្ជូនមកឲ្យអាជ្ញាធរខ្មែរនៅក្នុងខេត្តបាត់ដំបងកាលពីថ្ងៃទី ១៨ ខែសីហាក្រោយពីពួកគេត្រូវបានសង្ស័យថា បានបាញ់សម្លាប់មនុស្សកាលពីដើមខែ ហើយគេចចេញពីស្រុកខ្មែរទៅលាក់ខ្លួននៅប្រទេសថៃ។
លោក ជេត វណ្ណនី ស្នងការរងទទួលផែនព្រហ្មទណ្ឌបានថ្លែងឲ្យដឹងកាលពីម្សិលមិញថា ជនសង្ស័យខាងលើឈ្មោះ ប៊ុន ពន្លក ភេទប្រុសអាយុ ២១ ឆ្នាំ និងឈ្មោះ ហួន វាសនា ភេទប្រុសអាយុ ២២ ឆ្នាំបានបាញ់សម្លាប់គូទំនាស់កាលពីថ្ងៃទី ៥ សីហា ឆ្នាំ ២០១៨ នៅភូមិក្រពើជើង ឃុំភ្នំសំពៅ ស្រុកបាណន់ ខេត្តបាត់ដំបង។ ពេលនេះរូបគេកំពុងឃុំខ្លួននៅស្នងការដ្ឋាននគរបាលខេត្តបាត់ដំបងដើម្បីស៊ើបអង្កេតបន្តទៀត។ ជនរងគ្រោះឈ្មោះ ពេជ្រ ភីសា ភេទប្រុស អាយុ ២៥ ឆ្នាំ។
លោក ជេត វណ្ណនី បានថ្លែងបញ្ជាក់ថា៖ «យើងបន្តសាកសួរជនសង្ស័យនៅឡើយដោយសាររឿងឃាតកម្មនេះផ្តើមចេញពីរឿងស្នេហាត្រីកោណ។ ពួកគេបានបាញ់សម្លាប់ជនរងគ្រោះហើយគេចខ្លួនទៅខេត្តចាន់បូរីនៃប្រទេសថៃហើយយើងបានទំនាក់ទំនងឲ្យគេបញ្ជូនមកឲ្យយើងវិញនៅម៉ោង ៧ យប់ថ្ងៃទី ១៨ សីហា»។
.jpg)
លោក ថោង ភិន អធិការរងនគរបាលស្រុកបាណន់បានអះអាងថាមុននឹងឈានដល់ការបាញ់សម្លាប់គ្នានេះជនសង្ស័យឈ្មោះ ប៊ុន ពន្លក ជានិស្សិត និងជាអ្នករស់នៅខេត្តព្រៃវែងបានមកសិក្សាជំនាញពេទ្យនៅរាជធានីភ្នំពេញ និងសិក្សាពេទ្យជាមួយនារីម្នាក់ដែលនារីនោះជាសង្សាររបស់ឈ្មោះ ពេជ្រ ភីសា (ជនរងគ្រោះ)។
លោកបន្តថាដោយសារតែឪពុករបស់ឈ្មោះ ពេជ្រ ភីសា ជាបងបង្កើតរបស់ម្តាយនារីនោះក៏ផ្សំផ្គុំភ្ជាប់ពាក្យរវាងជនរងគ្រោះ និងនារីនោះជាអនាគតប្តីប្រពន្ធនឹងគ្នា ខណៈដែលនារីនោះក៏កំពុងបន្តសិក្សាជំនាញពេទ្យមិនទាន់ចប់នៅឡើយផង។
លោកអធិការរងបន្តថានៅពេលនោះជនសង្ស័យឈ្មោះ ប៊ុន ពន្លក បានដកកាំភ្លើងប្រាហាបាញ់សំដៅជនរងគ្រោះក្រោយពីបានប្រកែកគ្នារឿងបើករថយន្តប៉ះគ្នា។ ឯគ្នីគ្នា ២ នាក់ទៀតបានរត់គេចខ្លួន។ ក្រោយកើតហេតុសមត្ថកិច្ចបានចុះទៅកន្លែងកើតហេតុ និងពិនិត្យលើសាកសពឃើញមានស្នាមបាញ់ចំនួន ៥ គ្រាប់ត្រូវដងខ្លួនត្រូវកញ្ចក់រថយន្ត ១ គ្រាប់ និងជ្រុះគ្រាប់លើដីមិនផ្ទុះ ២ គ្រាប់។ សមត្ថកិច្ចបើកការស្រាវជ្រាវ និងឈានដល់កំណត់បានអត្តសញ្ញាណចាប់ជនសង្ស័យតែម្តង៕
