ភ្នំពេញ/ក្រចេះ មន្ត្រីនាំពាក្យមន្ទីរប្រឆាំងគ្រឿងញៀនក្រសួងមហាផ្ទៃបានឱ្យ កាលពីម្សិលមិញ បុរសជនជាតិឡាវ សញ្ជាតិកាណាដា ម្នាក់ត្រូវបានសាលាដំបូងរាជធានីភ្នំពេញ បញ្ជាឱ្យឃុំខ្លួនបណ្ដោះអាសន្នក្នុងពន្ធនាគារព្រៃ ស ដោយចោទប្រកាន់ពីបទ «ជួញដូរសារធាតុញៀនឆ្លងដែន» ខណៈនគរបាលខេត្តក្រចេះ ក៏កំពុងបន្ដនីតិវិធីករណី អ្នកប្រើគ្រឿងញៀន ១៩ នាក់ ក្រោយឃាត់ខ្លួន កាលពីថ្ងៃសៅរ៍។
លោកមាស វរិទ្ធ អ្នកនាំពាក្យមន្ទីរប្រឆាំងគ្រឿងញៀននៃក្រសួង មហាផ្ទៃ បានថ្លែងថា កាលពីរសៀលថ្ងៃ ទី ១៥ ខែ សីហា ឆ្នាំ ២០១៨ កម្លាំងនគរបាលការិយាល័យ «ក ៦» នៃមន្ទីរប្រឆាំងគ្រឿងញៀនក្រសួងមហាផ្ទៃ បានចុះប្រតិបត្តិការបង្ក្រាបករណីគ្រឿងញៀនមួយនៅចំណុចផ្លូវ លេខ ៤៦០ សង្កាត់ទួលទំពូងទី១ ខណ្ឌចំការមន រាជធានីភ្នំពេញ ដោយបានឃាត់ខ្លួនបុរសជនជាតិឡាវសញ្ជាតិកាណាដាម្នាក់ឈ្មោះ CHAO XIENG អាយុ ៥០ ឆ្នាំ និង រឹបអូសបានថ្នាំញៀនប្រភេទ អៃស៍មេតំហ្វេតាមីន (Ice Methamphetamine) ជិត ៤ គីឡូក្រាម ។
លោកបានថ្លែងថា ៖ «បច្ចុប្បន្នជនសង្ស័យត្រូវបានតុលាការបញ្ជាឲ្យឃុំខ្លួនជាបណ្ដោះអាសន្ន កាលពីថ្ងៃសុក្រ ដោយចោទប្រកាន់ពីបទជួញដូរ និងដឹកជញ្ជូនគ្រឿងញៀនដោយខុសច្បាប់ចូលក្នុងប្រទេសកម្ពុជា»។
ដោយឡែក កម្លាំងនគរបាលការិយាល័យប្រឆាំងគ្រឿងញៀនខេត្តក្រចេះបានចាប់ខ្លួនបុរស-ស្ត្រី១៩នាក់ដែលបានទៅពពាក់ពពូនគ្នាប្រើប្រាស់គ្រឿញៀនក្នុងបន្ទប់ផ្ទះសំណាក់សុភមង្គលដែលមានទីតាំងស្ថិតក្នុងភូមិ ជ្រោយថ្មក្រោម ឃុំឆ្លូង ស្រុកឆ្លូង ខេត្តក្រចេះ កាលពីរសៀលថ្ងៃសៅរ៍។
លោក លន់ សុផាត ស្នងការខេត្តក្រចេះ បានឲ្យដឹងកាលពីម្សិលមិញថា ក្នុងប្រតិបត្តិការចុះធ្វើរដ្ឋបាលនិងបង្ក្រាបចាប់បុរស-ស្ត្រីទាំងនោះសមត្ថកិច្ចបានរកឃើញនិងដកហូតនូវវត្ថុតាងមួយចំនួនរួមមាន ម្សៅក្រាមពណ៌សចំនួន៧កញ្ចប់តូច, សម្ភារសម្រាប់ជក់គ្រឿងញៀនមួយចំនួន, ម៉ូតូ ២គ្រឿង និងទូរស័ព្ទដៃចំនួន៨គ្រឿង។
លោក សុផាត បានបញ្ជាក់ថា៖«នៅពេលនេះបុរស-ស្ត្រីទាំង១៩នាក់នោះកំពុងស្ថិតក្រោមការសាកសួររបស់ក្រុមមន្ត្រីនគរបាលជំនាញនៃការិយាល័យបង្ក្រាបគ្រឿងញៀននៃស្នងការដ្ឋាននគរបាលខេត្តដើម្បីកសាងសំណុំរឿងបញ្ជូនឲ្យតុលាការ ចាត់ការបន្តតាមនីតិវិធីច្បាប់»៕