បាតុកម្ម​នៅ បាវិត GMAC ចោទ​ប្រកាន់​តែ​មេ​សហជីព​បដិសេធ


20140428_10
កម្មកររោងចក្រកាត់ដេរនៅតំបន់សេដ្ឋកិច្ចពិសេសបាវិត ធ្វើកូដកម្មកន្លងមក ម៉ៃ វីរៈ

ភ្នំពេញៈ សមាគម​រោងចក្រ​កាត់ដេរ​នៅ កម្ពុជា បាន​ចោទ​មេ​ដឹក​នាំ​សម្ព័ន្ធ​សហជីព​ចលនា​កម្មករ ដែល​ដឹក​នាំ​ដោយ​លោក ប៉ាវ ស៊ីណា ថា​បាន​បង្ខំ​ឲ្យ​និយោជក​ផ្តល់​ប្រាក់​ចំនួន ៥០ ដុល្លារ ទៅ​ឲ្យ​កម្មករ​ម្នាក់ៗ ប៉ុន្តែ​ការ​ចោទ​នេះ​ត្រូវ​បាន​មេ​សហជីព​នេះ​បដិសេធ ខណៈ​ដែល​កម្មករ​រាប់​ពាន់​នាក់​នៅ ខេត្ត​ស្វាយរៀង ថា នឹង​បន្ត​ការ​ទាម​ទារ​នៅ​ថ្ងៃ​ចន្ទ​នេះ​ទៀត។

សមាគម​រោងចក្រ​កាត់​ដេរ​កម្ពុជា (GMAC) បាន​ចេញ​សេចក្តី​ថ្លែង​ការណ៍​ពិសេស​មួយ កាល​ពី​ថ្ងៃ ទី​២៥ ខែ​មេសា ស្តី​ពី​កូដកម្ម​ដែល​កំពុង​កើត​ឡើង​នៅ ក្រុង​បាវិត ខេត្ត​ស្វាយរៀង និង​បាន​ចោទ​លោក ប៉ាវ ស៊ីណា ថា​បង្វែរ​ទិស​ដៅ​ពី​ការ​ដឹក​នាំ​កម្មករ​នៅ ទីក្រុង​ភ្នំពេញ ទៅ​ធ្វើ​សកម្មភាព​នៅ​តំបន់​សេដ្ឋកិច្ច​ពិសេស ក្រុង​បាវិត។

លិខិត​បន្ត​ទៀត​ថា៖ «វា​ជា​ការ​គួរ​ឲ្យ​ភ្ញាក់​ផ្អើល​ដែល​សហជីព​នេះ​បង្ខំ​ឲ្យ​និយោជក​ផ្តល់​ប្រាក់​ចំនួន ៥០ ដុល្លារ​ទៅ​កម្មករ-កម្មការិនី​ម្នាក់ៗ ដោយ​ចោទ​និយោជក​ថា បាន​សន្យា​ផ្តល់​ប្រាក់​នេះ​ទៅ​ពួកគេ​ជា​ការ​ដោះដូរ​មិន​ឲ្យ​ពួក​គេ​ចូល​រួម​ធ្វើ​កូដកម្ម​ដែល​សហព័ន្ធ សហជីព​ចំនួន ៨ បាន​បំផុស​នា​ពេល​កន្លង​មក ហើយ​ថា នេះ​ជា​ការ​បំផ្លើស និង​ជា​សកម្មភាព​ខុស​ច្បាប់​ដែល​មិន​ខុស​ពី​ការ​ជំរិត​ទារ​ប្រាក់​ឡើយ»។

សមាគម​រោងចក្រ​កាត់​ដេរ​មាន​សេចក្តី​សោក​ស្តាយ ដែល​រាជ​រដ្ឋាភិបាល ក៏​ដូច​អាជ្ញាធរ​ដែន​ដី​បាន​បណ្តែត​បណ្តោយ​ឲ្យ​សកម្មភាព​ល្មើស​ច្បាប់​នេះ កើត​មាន​ឡើង និង​គ្មាន​វិធានការ​ទប់​ស្កាត់។

GMAC បន្ត​ទៀត​ថា៖ «បាតុភាព​នេះ​នឹង​រីក​រាល​ដាល​ទៅ​តំបន់​នានា​ដែល​មាន​រោងចក្រ​កាត់ដេរ​ខោ​អាវ​និង​ស្បែក​ជើង​ប្រសិន​បើ​មិន​មាន​វិធានការ​ទប់​ស្កាត់​ទេ។ សមាគម​សូម​អំពាវនាវ​យ៉ាង​ទទូច​ដល់​ក្រសួង​ក៏​ដូច​ជា ស្ថាប័ន​ពាក់​ព័ន្ធ​ទាំង​អស់​និង​អាជ្ញាធរ​ដែន​ដី​មេត្តា​អនុវត្ត​តួនាទី​របស់​ខ្លួន​ក្នុង​ការ​ទប់​ស្កាត់​បាតុភាព​នេះ ដើម្បី​ធានា​សន្តិសុខ សុវត្ថិភាព​ដល់​អ្នក​វិនិយោគ និង​កម្មករ​ដែល​មាន​បំណង​ចង់​ធ្វើ​ការងារ»។

លោក ប៉ាវ ស៊ីណា ដែល​ត្រូវ​បាន GMAC ធ្វើ​ការ​ចោទ​យ៉ាង​ចាស់​ដៃ​នោះ ក៏​បាន​បដិសេធ​ដាច់​អហង្ការ​ដែរ​ថា សហជីព​របស់​លោក​មិន​បាន​ធ្វើ​ដូច​ដែល​សមាគម​រោងចក្រ​បាន​និយាយ​ចោទ​នោះ​ទេ។

លោក ប៉ាវ ស៊ីណា និយាយ​ថា៖ «អ្វី​ដែល GMAC ចោទ​ប្រកាន់​ខ្ញុំ គឺ​ខុស​ស្រឡះ​ពី​ការ​ពិត​ទាំង​ស្រុង។ ខ្ញុំ​គិត​ថា មុន​នឹង​ចោទ​ខ្ញុំ សមាគម GMAC គួរ​តែ​សិក្សា​ស្រាវជ្រាវ​ពី​រឿង​នេះ​ឲ្យ​បាន​ច្បាស់​និង​ដិត​ដល់​ជា​មុន​សិន»។

លោក ស៊ីណា ពន្យល់​ថា កម្មករ​រាប់​រយ​នាក់​បាន​ធ្វើ​ការ​តវ៉ា​មុន​ពេល​ដែល​សហជីព​របស់​លោក​បាន​ចុះ​ជួយ​អន្តរាគមន៍​ជួយ​ពួក​គេ​តាម​ការ​ស្នើ​សុំ​របស់​កម្មករ។ ដូច​នេះ​ខាង GMAC មិន​ត្រូវ​ចោទ​មក​លើ​សហជីព​លោក​ខុស​ពី​ការ​ពិត​នោះ​ទេ។

កាល​ពី​ថ្ងៃ​សុក្រ និង​ថ្ងៃ​សៅរ៍​សប្តាហ៍​មុន​នេះ កម្មករ​រាប់​ពាន់​នៅ​ក្នុង​តំបន់​សេដ្ឋកិច្ច​ពិសេស មេនហាតធេន និង​រោងចក្រ​មួយ​ចំនួន​ទៀត​នៅ​តំបន់​សេដ្ឋកិច្ច​ពិសេស តាយសេង បាន​នាំ​គ្នា​ដើរ​ចេញ​ពី​ការងារ​ដោយ​ធ្វើ​ការ​ទាមទារ​ប្រាក់ ៥០ ដុល្លារ​ពី​ថៅកែ ហើយ​ការ​តវ៉ា​នេះ​នឹង​បន្ត​មក​ដល់​ថ្ងៃ​ចន្ទ​នេះ។

គួរ​បញ្ជាក់​ថា បន្ទាប់​ពី​ចូល​ឆ្នាំ​ខ្មែរ​កម្មករ​រោងចក្រ​ចំនួន ៣ បាន​នាំ​គ្នា​ធ្វើ​ការ​តវ៉ា​ទាមទារ​ប្រាក់ ៥០ ដុល្លារ និង​សុំ​ឲ្យ​ទទួល​យក​តំណាង​ពួក​គេ ៤៣ នាក់​ចូល​ធ្វើ​ការ​វិញ ប៉ុន្តែ​មាន​កម្មករ​ខ្លះ​បាន​ចូល​ធ្វើ​ការ​វិញ​ដោយ​សារ​រោងចក្រ​យល់​ព្រម​ផ្តល់​ប្រាក់ ៥០ ដុល្លារ តាម​សំណើ​ពួក​គេ។

លោក ខាត់ ឡូត អនុ​ប្រធាន​សម្ព័ន្ធ​សហជីព​ចលនា​កម្មករ​បាន​ឲ្យ​ដឹង​ថា ដើម​ហេតុ​នៃ​ការ​ទាមទារ​លុយ ៥០ ដុល្លារ​នេះ​គឺ​ចេញ​មក​ពី​រោងចក្រ A&J ដែល​បាន​ផ្តល់​លុយ​ជូន​កម្មករ​មុន​ចូល​ឆ្នាំ​ខ្មែរ​ជា​ការ​លើក​ទឹក​ចិត្ត​និង បំពេញ​នូវ​ការ​សន្យា​ដែល​ពួក​គេ​មិន​បាន​ធ្វើ​ការ​តវ៉ា​ជាច្រើន​ខែ​ពី​មុន​មក៕

ព័ត៌មានថ្មីៗ