យ៉ាងហោចណាស់មានលំនៅឋានរបស់ពលរដ្ឋប្រមាណជាង ៩០០ ខ្នង បានរងការខូចខាតដោយសារខ្យល់សរទរដូវ។ រូបថត សហការី
ព្រះសីហនុៈ យ៉ាងហោចណាស់មានលំនៅឋានរបស់ពលរដ្ឋប្រមាណជាង ៩០០ ខ្នង បានរងការខូចខាតដោយសារខ្យល់សរទរដូវបានបក់បោកយ៉ាងខ្លាំងចាប់តាំងពីយប់ថ្ងៃអង្គារដល់រសៀលថ្ងៃពុធ ទៅលើភូមិសាស្ត្រឃុំចំនួន ៣ ក្នុងស្រុកព្រៃនប់ ខេត្តព្រះសីហនុ។ នេះបើតាមមន្ត្រីមូលដ្ឋានកាលពីព្រឹកថ្ងៃព្រហស្បតិ៍ម្សិលមិញ។
អ្នកស្រី វាល់ចន្ទ វល័ក្ខ នាយិការដ្ឋបាលស្រុកព្រៃនប់បានប្រាប់ភ្នំពេញប៉ុស្តិ៍ថា ជាមួយអាកាសធាតុត្រជាក់ រដូវរំហើយ បាននាំមកនូវខ្យល់បក់បោកខ្លាំងគួរឲ្យព្រួយកង្វល់ផងដែរសម្រាប់ប្រជាពលរដ្ឋដែលរស់នៅក្នុងឃុំសាមគ្គី ឃុំទឹកល្អក់ និងឃុំទឹកថ្លាក្នុងស្រុកព្រៃនប់។ ជាក់ស្ដែងក្នុងរយៈពេល ២ ថ្ងៃកន្លងមកនេះមានផ្ទះប្រជាពលរដ្ឋចំនួន ៩០៩ ខ្នង នៅក្នុងឃុំទាំង ៣ បានរងការខូចខាតដោយប៉ើងរបើកដំបូល ហើយមានផ្ទះខ្លះបានដួលរលំបាក់រាបដល់ដី ប៉ុន្តែពុំមានរងរបួស ឬស្លាប់នោះទេ។
អ្នកស្រីបានថ្លែងថា៖ «នៅពេលនេះកម្លាំងសមត្ថកិច្ចយើងកំពុងចុះជួយអន្តរាគមន៍ជួសជុលផ្ទះជូនប្រជាពលរដ្ឋរងគ្រោះ។ ជាមួយគ្នានេះមន្ត្រីជំនាញបានផ្សព្វផ្សាយអប់រំណែនាំពីវិធីបង្ការការពារលំនៅឋានពីការបក់បោកដោយខ្យល់រដូវនេះដល់អ្នកភូមិក្នុងតំបន់រងគ្រោះទាំងនោះផងដែរ»។
.jpg)
បើតាមអ្នកស្រី វល័ក្ខ វិធានបង្ការការពារផ្ទះពីខ្យល់រដូវបក់បោកដែលមន្ត្រីជំនាញបានណែនាំដល់អ្នកភូមិនៅក្នុងតំបន់ងាយរងគ្រោះទាំងនោះរួមមាន ការរៀបចំយកខ្សែលួស ឬខ្សែនីឡុងមកចងរឹតដំបូលផ្ទះ បោះស្នឹង ឬដាំបង្គោលទាញខ្សែចងរឹតផ្ទះឲ្យបានរឹងមាំ។
ទាក់ទងនឹងបញ្ហានេះលោក ហាក់ សាន់ មេឃុំទឹកល្អក់បានប្រាប់ភ្នំពេញប៉ុស្តិ៍ពីម្សិលមិញថា ជារៀងរាល់ឆ្នាំក្នុងរដូវរំហើយគឺខ្យល់សមុទ្រតែងបានបក់មកផ្ទប់ខ្នងភ្នំកំចាយ និងភ្នំបូកគោ ហើយច្រានត្រឡប់មកវិញបង្កទៅជាខ្យល់កន្ត្រាក់វាយបក់បោកលើផ្ទះ និងផលដំណាំពលរដ្ឋនៅក្នុងឃុំរបស់គាត់ និងឃុំមួយចំនួនទៀតនៅតាមបណ្ដោយផ្លូវជាតិលេខ ៣។
លោក សាន់ បានបញ្ជាក់ថា៖ «បាតុភូតខ្យល់កន្ត្រាក់ដែលបក់ច្រានពីខ្នងភ្នំទាំង ២ ខាងលើនេះបានបង្កឲ្យផ្ទះប្រជាពលរដ្ឋចំនួន ៧ ខ្នង ដួលរលំបាក់រាបដល់ដី និង ៣១៦ ខ្នងទៀត រងការខូចខាតដោយប៉ើងរបើកដំបូល។ ប៉ុន្តែមិនបង្កគ្រោះថ្នាក់ ឬស្លាប់ពលរដ្ឋណាម្នាក់នោះទេ»។
បើតាមការកត់សម្គាល់របស់លោក សាន់ បាតុភូតខ្យល់បក់ច្រានពីខ្នងភ្នំកំចាយ និងបូកគោនេះបានកើតឡើងជារៀងរាល់ឆ្នាំក្នុងចន្លោះខែធ្នូ និងមករា។
កាលពីព្រឹកម្សិលមិញនៅខេត្តព្រះសីហនុមានសីតុណ្ហភាពអប្បបរមា ២១ អង្សាសេ និងមានខ្យល់បក់ខ្លាំងនៅពេលយប់។ នេះបើលោក ហេងសុភណ្ឌរិទ្ធ ប្រធានមន្ទីរធនធានទឹក និងឧតុនិយមខេត្តព្រះសីហនុ។
លោក សុភណ្ឌរិទ្ធ បានបន្តថា ជាធម្មតានៅក្នុងរដូវរំហើយអាកាសធាតុក្នុងតំបន់ឆ្នេរមានការចុះត្រជាក់បន្តិចបន្តួចប៉ុណ្ណោះ ប៉ុន្តែផ្ទៃមេឃស្រឡះល្អដែលអាចឲ្យអ្នកនិយមដើរកម្សាន្តតាមតំបន់ឆ្នេរ និងតាមប្រជុំកោះនានារៀបចំពេលវេលាមកលម្ហែកាយជាមួយក្រុមគ្រួសារបានយ៉ាងរីករាយ។
ជុំវិញករណីខ្យល់កន្ត្រាក់នេះលោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានបញ្ជាក់កាលពីម្សិលមិញថារយៈពេល ១១ ខែ ក្នុងឆ្នាំនេះបាតុភូតខ្យល់កន្ត្រាក់បានបង្កឲ្យស្លាប់មនុស្ស ៨ នាក់ និង ១៣១ នាក់ទៀតរងរបួស។
រីឯផ្ទះពលរដ្ឋចំនួន ១ ៦៣៨ ខ្នង ត្រូវបានបំផ្លាញទាំងស្រុង ខណៈផ្ទះចំនួន ១៣ ៦០០ ខ្នងទៀត បានប៉ើងរបើកដំបូល។ ក្រៅពីនោះបានបង្កការខូចខាតដំបូលសាលារៀន និងទីចាត់ការសាលាចំនួន ៩៣ អគារ និងប៉ះពាល់អគាររដ្ឋបាលសាធារណៈរួមមានប៉ុស្តិ៍នគរបាល មន្ទីរពេទ្យ និងវត្តអារាមសរុប ៣៩ អគារផងដែរ៕
