បន្ទាយមានជ័យ៖ ចៅក្រមសាលាដំបូងខេត្តបន្ទាយមានជ័យ សម្រេចឃុំខ្លួនជនត្រូវជាប់ចោទម្នាក់ឈ្មោះ អៀក ថៃសេង កាលពីថ្ងៃទី ១៨ មេសា ពីបទរំលោភសេពសន្ថវៈ បន្ទាប់ពីអយ្យការអមសាលាដំបូងខេត្តបានចោទប្រកាន់ពីបទរំលោភសេពសន្ថវៈ។
លោក សេង សម័យ ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងខេត្តបន្ទាយមានជ័យ ឲ្យដឹងថា ក្រោយពីទទួលបានសំណុំរឿងដែលកម្លាំងអាវុធហត្ថខេត្តបន្ទាយមានជ័យបញ្ជូនមក កាលពីថ្ងៃទី ១៨ មេសា លោកបានសួរនាំរួច ហើយបានចោទប្រកាន់ពីបទរំលោភសេពសន្ថវៈ ព្រមទាំងបានបញ្ជូនសំណុំរឿងទៅចៅក្រមដើម្បីសម្រេច។ ជនត្រូវចោទត្រូវបានលោកចៅក្រម ព្រុំ ម៉ូនីន ឃុំខ្លួនហើយ។
លោកថ្លែងថា៖ «ការចោទប្រកាន់ហ្នឹង គឺតាមក្រមព្រហ្មទណ្ឌស្តីពីបទល្មើសរំលោភសេពសន្ថវៈ មិនមែនទាក់ទងករណីរួមភេទជាមួយអនីតិជនអីទេ ព្រោះពាក់ព័ន្ធធាតុផ្សំនៃអំពើរំលោភហ្នឹង មានប្រើអំពើហិង្សាដែលខុសពីឆន្ទៈរបស់ជនរងគ្រោះ ដែលគេមិនព្រមព្រៀង»។
ករណីរំលោភសេពសន្ថវៈនេះ លោក នួន នីណារ៉ូ មេបញ្ជាការកងរាជអាវុធហត្ថក្រុងប៉ោយប៉ែតបានឲ្យដឹងថា បន្ទាប់ពីទទួលបានពាក្យបណ្តឹងរបស់ជនរងគ្រោះនៅថ្ងៃទី ១៧ មេសា លោកបានចាត់កម្លាំងជំនាញចុះទៅដល់កន្លែងកើតហេតុ ហើយសួរនាំ និងឃាត់ខ្លួនជនសង្ស័យឈ្មោះ អៀក សេងថៃ ភេទប្រុស អាយុ ៣៥ ឆ្នាំ មុខរបរជាងជួសជុលរថយន្ត រស់នៅភូមិក្បាលស្ពាន សង្កាត់ព្រះពន្លា ក្រុងសិរីសោភណ្ឌ ហើយបញ្ជូនមកអាវុធហត្ថក្រុង ដើម្បីសាកសួរអំពីរឿងហេតុដែលកើតឡើង។
លោកថ្លែងថា៖ «រឿងហ្នឹង គឺជនសង្ស័យ និងនារីរងគ្រោះនោះ ជាអ្នកស្គាល់គ្នា ហើយជនសង្ស័យបានប្រើល្បិចធ្វើជាឈឺឲ្យជនរងគ្រោះជួយទៅទិញថ្នាំមកឲ្យខ្លួន។ តែពេលទៅដល់បន្ទប់ ជនសង្ស័យបានចាប់ទាញដៃអូសចូលបន្ទប់ច្របាច់កគំរាមសម្លាប់ រួចធ្វើសកម្មភាពចាប់រំលោភទាល់តែបានសម្រេច"។
បើតាមលោក នីណារ៉ូ ពាក្យបណ្តឹងរបស់ជនរងគ្រោះឈ្មោះ អ.វ អាយុ ៣២ ឆ្នាំ ឲ្យដឹងថា ការចាប់រំលោភនេះកើតឡើង នៅវេលាម៉ោង ២ រំលងអធ្រាត្រ ចូលថ្ងៃទី ១៧ មេសា នៅភូមសាគ្គីមានជ័យ សង្កាត់-ក្រុងប៉ោយប៉ែត ខេត្តបន្ទាយមានជ័យ៕