ក្រចេះ: តុលាការខេត្តក្រចេះកាលពីម្សិលមិញបានសម្រេចឃុំខ្លួនបុរស ២ នាក់ នៅក្នុងពន្ធនាគារខេត្ត ក្រោយពីពួកគេត្រូវបានចាប់ខ្លួនពេលដែលកំពុងប្រើឧបករណ៍ឆក់ត្រីខុសច្បាប់នៅក្នុងតំបន់អភិរក្សអន្លង់ផ្សោត។
លោក ទីវ វុធធេន អ្នកនាំពាក្យសាលាដំបូងខេត្តក្រចេះបានឲ្យដឹងកាលពីម្សិលមិញថា៖ «ចៅក្រមស៊ើបសួរលោក ម៉េង សូនី បានសម្រេចឃុំជនសង្ស័យទាំង ២ នាក់ នៅពន្ធនាគារខេត្តបណ្ដោះអាសន្ន ដោយចោទប្រកាន់ពីបទនេសាទត្រីដោយប្រើឧបករណ៍ឆក់ក្នុងតំបន់អភិរក្សអន្លង់ផ្សោត»។
មន្ត្រីជាន់ខ្ពស់ខណ្ឌរដ្ឋបាលជលផលខេត្តក្រចេះបានប្រាប់ភ្នំពេញប៉ុស្តិ៍ថា បុរស ២ នាក់ ត្រូវបានចាប់ខ្លួនកាលពីយប់ថ្ងៃអង្គារ ខណៈពួកគេកំពុងលួចធ្វើសកម្មភាពនេសាទត្រី ដោយប្រើឧបករណ៍ឆក់ខុសច្បាប់នៅចំណុចអន្លង់ផ្សោតជ្រោយអំពិលស្ថិតក្នុងភូមិកាំពី ឃុំសំបុក ស្រុកចិត្របុរី ខេត្តក្រចេះ។
លោក ម៉ុក ពន្លក នាយរងខណ្ឌជលផលខេត្តក្រចេះបានប្រាប់ភ្នំពេញប៉ុស្តិ៍ថា ជនសង្ស័យដែលត្រូវបានចាប់ខ្លួនក្នុងបទល្មើសនេសាទនោះមានឈ្មោះ រស់ ពេជ្រ អាយុ ២៣ ឆ្នាំ និងឈ្មោះ រស់ ចាន់រតនា អាយុ ៣៣ ឆ្នាំ ជាអ្នករស់នៅភូមិក្បាលជួរ ឃុំសំបុក ស្រុកចិត្របុរី ខេត្តក្រចេះ។ ក្នុងប្រតិបត្តិការនាយប់នោះ ក្រុមឆ្មាំទន្លេក៏បានរឹបអូសវត្ថុតាងមួយចំនួនផងដែរ រួមមានអាគុយ ១ គ្រឿង, ក្បាលឆក់ ១ គ្រឿង, កន្ត្រងដួសត្រី ១, ទូកនេសាទប្រវែង ៦ ម៉ែត្រចំនួន ១ គ្រឿង។
លោកបានបញ្ជាក់ថា៖ «ជនសង្ស័យទាំង ២ ត្រូវបានមន្ត្រីជំនាញខណ្ឌរដ្ឋបាលជលផល កសាងសំណុំរឿងចោទប្រកាន់តាមមាត្រា ៩៨ នៃច្បាប់ជលផលជាបទល្មើសថ្នាក់លេខ ១ ដែលត្រូវផ្ដន្ទាទោសដាក់ពន្ធនាគារពី ៣ ឆ្នាំទៅ ៥ ឆ្នាំហើយវត្ថុតាងនៃបទល្មើសត្រូវរឹបអូសដាក់ជាសម្បត្តិរដ្ឋ ឬបំផ្លាញចោល»។
លោក ពន្លក បានឲ្យដឹងថា ជនសង្ស័យទាំង ២ នាក់ត្រូវបានមន្ត្រីជំនាញ ខណ្ឌរដ្ឋបាលជលផលបញ្ជូនខ្លួនទៅកាន់សាលាដំបូងខេត្តក្រចេះ ដើម្បីធ្វើចំណាត់ការបន្តតាមនីតិវិធីច្បាប់។
កាលពីថ្ងៃទី ២៧ ខែ វិច្ឆិកា ឆ្នាំ ២០១៩ កម្លាំងសមត្ថកិច្ចនគរបាលស្រុកចិត្របុរី បានចាប់ឃាត់ខ្លួនជនសង្ស័យ ២ នាក់ ក្នុងសំណុំរឿងឆក់ត្រីខុសច្បាប់នៅអន្លង់អភិរក្សសត្វផ្សោតកាំពីតាមដីកាបង្គាប់ឲ្យនាំខ្លួនរបស់ចៅក្រមស៊ើបសួរ អេង ចំនាប់។
ជនសង្ស័យទាំង ២ នោះរួមមានឈ្មោះ ជីន បូម៉ា អាយុ ៣៨ ឆ្នាំ និង នុត សំអូន អាយុ ២៨ ឆ្នាំ ជាអ្នករស់នៅភូមិក្បាលជួរ ឃុំសំបុក ស្រុកចិត្របុរី ខេត្តក្រចេះ។ ការនេសាទត្រីក្នុងតំបន់ការពារ និងអភិរក្សសត្វផ្សោត ដោយប្រើប្រាស់ឧបករណ៍មង និងឧបករណ៍ឆក់ត្រូវបានហាមឃាត់។
កាលពីដើមខែវិច្ឆិកាកន្លងទៅសត្វផ្សោតញី ១ ក្បាលត្រូវបានគេប្រទះឃើញងាប់នៅអន្លង់ព្រះសង្ឃក្នុងទន្លេមេគង្គខេត្តក្រចេះដោយសារជាប់មងអ្នកនេសាទ ហើយកាលពីចុងខែមិថុនា ឆ្នាំ ២០១៨ កន្លងទៅសត្វផ្សោតឈ្មោល ១ ក្បាល ទម្ងន់ ៩២ គីឡូក្រាមក៏បានងាប់នៅតំបន់អន្លង់កាំពីក្នុងខេត្តក្រចេះដោយសារជាប់មងអ្នកនេសាទដូចគ្នានេះដែរ។
បើតាមលោក ពន្លក មកទល់ពេលនេះទន្លេមេគង្គខេត្តក្រចេះមានសត្វផ្សោតរស់នៅចន្លោះពី ៥៥ ទៅ ៦០ ក្បាល។ សត្វផ្សោតទាំងអស់នោះកំពុងតែរស់នៅក្នុងអន្លង់អភិរក្ស ៥ ទីតាំងផ្សេងគ្នារួមមាន អន្លង់ខ្សាច់ម្កាក់ អន្លង់កោះដំបង អន្លង់កោះផ្ដៅ អន្លង់កន្ទុយកោះរងាវ និងអន្លង់ផ្សោតកាំពីក្នុងអាងទន្លេមេគង្គ៕