ភ្នំពេញ៖ មន្ត្រីជំនាញខាងសុខភាពសត្វនៃក្រសួងកសិកម្ម រុក្ខាប្រមាញ់និងនេសាទបានបញ្ជាក់ថា ជំងឺប៉េស្ដជ្រូក អាហ្វ្រិក បានរាលដាលមកដល់ខេត្តព្រំដែនរបស់ប្រទេសវៀតណាម ដែលជាប់គ្នាជាមួយខេត្ត រតនគិរីនិងខេត្តក្រចេះរបស់ប្រទេសកម្ពុជាហើយ។
លោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វនិងផលិតកម្មសត្វបានលើកឡើង នៅក្នុងសិក្ខាសាលាពិគ្រោះយោបល់មួយ នៅថ្ងៃទី១៥ ខែមីនានេះថា តាមព័ត៌មានមិនផ្លូវការដែលលោកទទួលបានពីខាងក្រុមហ៊ុនលក់ចំណីសត្វ និងសមាគមចិញ្ចឹមសត្វជាដើម គឺបញ្ជាក់ថា ជំងឺប៉េស្ដជ្រូកអាហ្វ្រិកដែលរាលដាលនៅក្នុងប្រទេសវៀតណាម កំពុងតែខិតជិតមកដល់ប្រទេសកម្ពុជាហើយ ដោយលោកបានអំពាវនាវឱ្យមន្ទីរខេត្ត រតនគីរី និងក្រចេះ ត្រូវបង្កើនការតាមដាននិងប្រុងប្រយ័ត្ននៅពេលណាមានសត្វជ្រូកឈឺ។
លោកនិយាយថា «ដោយសារកាលពីពេលថ្មីៗនេះ ខ្ញុំទទួលបានព័ត៌មានថា នៅបណ្ដារខេត្តទល់ដែនជាប់ប្រទេសកម្ពុជាដែលជាប់នឹងខេត្ត ក្រចេះនិងរតនគីរី គឺមានបញ្ហានេះ (ជំងឺប៉េស្តជ្រូកអាហ្វ្រិក) ហើយពីពេលនេះទៅ ខ្ញុំក៏សូមសំណមពរលោក-លោកស្រីដែលជាប្រធានការិយាល័យដែរថា ប្រសិនបើមានសត្វឈឺក្នុងករណីមួយណាក៏ដោយ ត្រូវប្រុងប្រយ័ត្ន»។
វៀតណាម គឺជាប្រទេសអាស៊ីទី ៣ បន្ទាប់ពីប្រទេសចិននិងប្រទេស ម៉ុងហ្គោលី ដែលបានផ្ទុះជំងឺប៉េស្តជ្រូកអាហ្វ្រិកនៅក្នុងដើមខែកុម្ភៈ។ យោងតាមសារព័ត៌មានវៀតណាម VN Express ចុះផ្សាយនៅថ្ងៃទី១៥ ខែមីនា បញ្ជាក់ថា ជំងឺប៉េស្តជ្រូកអាហ្វ្រិកកំពុងវាយប្រហារឧស្សាហកម្មជ្រូកប្រទេសវៀតណាម ដែលមានតម្លៃស្មើរ ១០ ពាន់លានដុល្លារសហរដ្ឋអាមេរិក និងកំពុងធ្វើឱ្យវៀតណាមរងការគំរាមកំហែងកាន់តែធ្ងន់ធ្ងរ ចំពោះការនាំចេញជ្រូក។
សារព័ត៌មាននេះបន្តថា ក្រោយពីខេត្តក្រុងរបស់វៀតណាមចំនួន ១៧ បានផ្ទុះឡើងជំងឺប៉េស្ដជ្រូកអាហ្វ្រិកជាបន្តបន្ទាប់ គឺបានធ្វើឱ្យប្រទេសមួយចំនួន ដូចជា កោះតៃវ៉ាន់ ទីក្រុងឌូបៃរបស់អារ៉ាប់រួម សហរដ្ឋអាមេរិក និងប្រទេសអង់គ្លេស បានចេញបំរាមចំពោះការនាំចូលសាច់ជ្រូកពីប្រទេសវៀតណាម ហើយជនណាល្មើសនឹងបំរាមនោះ នឹងត្រូវផាកពិន័យឬត្រូវជាប់ពន្ធនាគារ។
លោក ញ៉ែម សំអឿន អភិបាលរងខេត្តរតនគីរីបានបញ្ជាក់ថា លោកមិនបានទទួលព័ត៌មានថាជំងឺប៉េស្ដជ្រូកអាហ្វ្រិកបានរាលដាលតំបន់ព្រំដែនប្រទេសវៀតណាមជាប់គ្នាជាមួយខេត្តរតនគីរីឡើយ ប៉ុន្តែលោកបញ្ជាក់ថា ក្នុងខេត្តរតនគីរីគឺពុំមានការនាំជ្រូកចូលពីប្រទេសវៀតណាមនោះទេ។
លោកថា «ភាគច្រើន (នាំជ្រូកចូល) តាមពីខេត្តកំពង់ចាមទៅវិញទេ។ យើងបានជូនដំណឹងដល់អ្នករកស៊ីទាំងអស់ មិនឱ្យដឹកជញ្ជូន (ជ្រូកពីវៀតណាម) ចូលខេត្តយើងទេ»។
ភ្នំពេញប៉ុស្ដិ៍មិនអាចសុំការបកស្រាយបន្ថែមពីលោក លី សូវ៉ាន់ មន្ត្រីនាំពាក្យក្រសួងសុខាភិបាលបានទេនៅថ្ងៃទី១៥ មីនានេះ ដោយទូរស័ព្ទចូលច្រើនដងតែគ្មានអ្នកទទួល។
ប៉ុន្តែលោក តាន់ ផាន់ណារ៉ា បានអះអាងថា មានបទល្មើសដឹកជ្រូកចូលខុសច្បាប់ជាច្រើនពីប្រទេសវៀតណាម ប៉ុន្តែលោកថា ខាងអគ្គនាយកដ្ឋានសុខភាពសត្វនិងផលិតកម្មសត្វសហការជាមួយអាជ្ញាធរគ្រប់ខេត្ត បានទប់ស្កាត់បទល្មើសទាំងនោះបានយ៉ាងល្អប្រសើរ ហើយរាល់ការវិភាគកន្លងមកក៏បង្ហាញថា កម្ពុជាពុំមានករណីផ្ទុះឡើងជំងឺប៉េស្ដជ្រូកអាហ្វ្រិកនោះទេ៕