មន្ត្រីចុះបង្ក្រាបស្ថានីយប្រេងនៅខេត្តតាកែវលក់លើសតម្លៃកំណត់ក្នុងខែនេះ។ រូប FB
ភ្នំពេញៈ ក្រុមមន្ត្រីជំនាញបានរកឃើញស្ថានីយប្រេងឥន្ធនៈចំនួន ៧ ទីតាំង មិនបានអនុវត្តស្របតាមសេចក្តីជូនដំណឹងរបស់រដ្ឋដោយក្រុមការងារបានផាកពិន័យ និងធ្វើកិច្ចសន្យាផងដែរក្នុងពេលបើកយុទ្ធនាការផ្សព្វផ្សាយ និងត្រួតពិនិត្យតម្លៃប្រេងតាមបណ្តាខេត្តរបស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (កបប) តាមសេចក្តីជូនដំណឹងរបស់ក្រសួងពាណិជ្ជកម្មស្តីពីការបញ្ចុះតម្លៃប្រេងទូទាំងប្រទេស។
ក្រៅពីធ្វើការផាកពិន័យប្រាក់ និងធ្វើកិច្ចសន្យាជាមួយស្ថានីយប្រេងឥន្ធនៈទាំងនោះក្នុងនោះក្រុមការងារក៏បានកសាងសំណុំរឿងតាមច្បាប់ចំពោះស្ថានីយមួយចំនួនទៀតដែលបានលក់ក្លែងបន្លំគុណភាពប្រេង និងកម្រិតបរិមាណលីត្រផងដែរ។
លោក ផាន អូន អគ្គនាយកនៃអគ្គនាយកដ្ឋាន ក.ប.ប. ថ្លែងពីម្សិលមិញថា ក្រោយពេលក្រសួងចេញសេចក្ដីជូនដំណឹងស្ដីពីការលក់បញ្ចុះតម្លៃប្រេងឥន្ធនៈតាមស្ថានីយនានាទូទាំងប្រទេស មន្ត្រីអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំបានបើកយុទ្ធនាការផ្សាព្វផ្សាយ និងត្រួតពិនិត្យតម្លៃប្រេងឥន្ធនៈតាមបណ្តាខេត្តទូទាំងប្រទេស ដើម្បីឱ្យស្ថានីយប្រេងឥន្ធនៈអនុវត្ដឱ្យបានត្រឹមត្រូវផ្ដល់ប្រយោជន៍ដល់ប្រជាពលរដ្ឋ។
.jpg)
លោកថ្លែងថា៖ «យើងបានផាកស្ថានីយប្រេងឥន្ធនៈក្នុងខេត្ដកំពង់ស្ពឺចំនួន ៤ ស្ថានីយ និងខេត្ដតាកែវចំនួន ៣ ស្ថានីយ។ យើងបានណែនាំ [ស្ថានីយ] ទាំងនោះឱ្យធ្វើកិច្ចសន្យា និងបានធ្វើការផ្សព្វផ្សាយតាមស្ថានីយប្រេងឥន្ធនៈទាំងអស់ ហើយទូទាំងប្រទេស។ យើងក៏បានជូនដំណឹងតាមគេហទំព័រហ្វេសប៊ុកក្រុមការងារ ក.ប.ប. សហការជាមួយមន្ទីរពាណិជ្ជកម្មខេត្ដក្នុងការផ្សព្វផ្សាយការជូនដំណឹងរបស់ក្រសួងពាណិជ្ជកម្មពីតម្លៃប្រេងឥន្ធនៈនេះផងដែរ»។
លោក ផាន អូន បន្ថែមថាទាំងការចុះទៅអប់រំ ផ្សព្វផ្សាយ និងធ្វើលិខិតអំពាវនាវផងនេះ គឺដើម្បីបម្រើផលប្រយោជន៍ប្រជាពលរដ្ឋក្នុងកាលៈទេសៈដែលប្រេងសាំងកំពុងតែធ្លាក់ថ្លៃ ប៉ុន្ដែបងប្អូនអាជីវករមួយចំនួន ពួកគាត់នៅតែលក់ក្នុងតម្លៃថ្លៃ។ អគ្គនាយកដ្ឋាន ក.ប.ប. ក៏មើលឃើញផងដែរថា ក្នុងការអនុវត្ដរបស់ស្ថានីយប្រេងឥន្ធនៈនាពេលកន្លងមកគឺមានការអនុវត្ដល្អ។ ប៉ុន្ដែលើកនេះមានភាពយឺតយ៉ាវក្នុងការអនុវត្ដនោះនឹងដោះស្រាយតាមការស៊ើបអង្កេតរបស់មន្ដ្រីតែម្ដងដែលបានចុះអនុវត្ដ។
លោក អូន បញ្ជាក់ថា៖ «និយាយឱ្យចំទៅក្រោយពីការប្រកាសតម្លៃរបស់ក្រសួងលើសរយៈពេលតែ ១ ថ្ងៃទៅ ២ ថ្ងៃគឺយើងមិនឱ្យកើតមានការមិនអនុវត្ដយឺតយ៉ាវលើសទៀតនោះទេ។ ក្នុងរយៈពេល ១ ថ្ងៃទៅ ២ ថ្ងៃវាគឺជារយៈពេលឆកល្វែងមួយចំនួន ព្រោះសេចក្ដីជូនដំណឹងរបស់ក្រសួងមិនទាន់អាចទៅដល់ស្ថានីយដែលនៅឆ្ងាយៗតាមបណ្ដាខេត្ដមួយចំនួន។ ចំណែកស្ថានីយប្រេងឥន្ធនៈដែលមានស្ដង់ដាល្អនោះ ក្រោយចេញសេចក្ដីជូនដំណឹងភ្លាមគឺពួកគេប្ដូរតម្លៃភ្លាម»។
លោកឱ្យដឹងថាការបញ្ចុះតម្លៃប្រេងឥន្ធនៈនេះគឺបានកំណត់ចាប់ពីថ្ងៃទី ១ ដល់ ១៥ ខែមេសា។ ដូច្នេះចាប់ពីថ្ងៃទី ១៦ រហូតដល់ថ្ងៃទី ៣០ ខែមេសាក្រសួងនឹងមានសេចក្ដីជូនដំណឹងថ្មីមួយទៀត។ សេចក្ដីជូនដំណឹងនេះមានរយៈពេល ២ សប្ដាហ៍ម្ដងក្នុងការចេញផ្សាយតម្លៃប្រេងឥន្ធនៈនេះ។
តាមរបាយការណ៍របស់អគ្គនាយកដ្ឋាន ក.ប.ប. ឲ្យដឹងថា មន្ដ្រីអគ្គនាយកដ្ឋាន ក.ប.ប. បានបើកយុទ្ធនាការផ្សាព្វផ្សាយ និងត្រួតពិនិត្យតម្លៃប្រេងឥន្ធនៈតាមបណ្តាខេត្តទូទាំងប្រទេស។ យុទ្ធនាការនេះដើម្បីត្រួតពិនិត្យ និងផ្សាព្វផ្សាយឱ្យម្ចាស់ស្ថានីយ និងដេប៉ូទាំងអស់ត្រូវតែអនុវត្តឱ្យបានត្រឹមត្រូវតាមគោលការណ៍កំណត់ដូចជា ត្រូវលក់ប្រេងជូនប្រជាពលរដ្ឋតាមតម្លៃដែលកំណត់ដោយក្រសួងពាណិជ្ជកម្ម។ ប្រេងឥន្ធនៈដែលដាក់លក់ត្រូវមានគុណភាពតាមស្តង់ដាកំណត់ និងបរិមាណលក់ប្រេងត្រឹមត្រូវតាមខ្នាតរង្វាស់រង្វាល់។
អគ្គនាយកដ្ឋាន ក.ប.ប. បញ្ជាក់ថាក្នុងករណីមិនអនុវត្តតាមការណែនាំ អគ្គនាយកដ្ឋាន ក.ប.ប នឹងអនុវត្តតាមនីតិវិធីដែលមានចែងនៅក្នុងច្បាប់ស្តីពីកិច្ចការពារអ្នកប្រើប្រាស់ និងប្រកាសអន្តរក្រសួងលេខ ១៧២ ចុះកាលពីថ្ងៃទី ២២ ខែមិថុនាឆ្នាំ ២០១៨ ស្តីពីការកំណត់រូបមន្តសម្រាប់កែសម្រួលថ្លៃលក់រាយប្រេងឥន្ធនៈនៅកម្ពុជា។
របាយការណ៍របស់អគ្គនាយកដ្ឋាន ក.ប.ប. ឲ្យដឹងថាស្ថានីយប្រេងសាំងចំនួន ៣ ក្នុងស្រុកព្រៃកប្បាស និងស្រុកបាទី ខេត្តតាកែវ ដែលបានលក់ខុសពីសេចក្ដីជូនដំណឹងរបស់ក្រសួងពាណិជ្ជកម្ម។
តាមរបាយការណ៍ដដែលបានបញ្ជាក់ថា៖ «បានរកឃើញ ដេប៉ូ និងស្ថានីយប្រេងសាំងចំនួន ៣ ដែលលក់តម្លៃខ្ពស់ដែលខុសពីសេចក្ដីជូនដំណឹងរបស់ក្រសួងពាណិជ្ជកម្ម។ បន្ទាប់មកបានធ្វើការផាកពិន័យក្នុង ១ ស្ថានីយចំនួន ២ លានរៀលព្រមទាំងបានឱ្យម្ចាស់ស្ថានីយទាំង ៣ ខាងលើធ្វើកិច្ចសន្យាដោយកែតម្រូវតម្លៃដែលដាក់លក់ឱ្យត្រឹមត្រូវដោយស្របទៅតាមការណែនាំរបស់ក្រសួងពាណិជ្ជកម្ម»។
កាលពីថ្ងៃទី ២ ខែមេសាមន្ត្រីអគ្គនាយកដ្ឋាន ក.ប.ប. បានចុះត្រួតពិនិត្យបណ្តាស្ថានីយ/ដេប៉ូចែកចាយប្រេងឥន្ធនៈចំនួន ៨ ទីតាំងដែលស្ថិតនៅតាមបណ្តោយផ្លូវជាតិលេខ ៤ ខេត្តកំពង់ស្ពឺ។ ក្នុងការត្រួតពិនិត្យនេះ មន្ត្រីជំនាញបានធ្វើការវិភាគលើកម្រិតសន្ទស្សន៍សេតានរបស់ប្រេងសាំង ម៉ាស៊ូត និងត្រួតពិនិត្យលើរង្វាស់រង្វាល់របស់បណ្តាស្ថានីយ/ដេប៉ូចែកចាយទាំង ៨ ផងដែរ។
លទ្ធផលនៃការត្រួតពិនិត្យមន្ត្រីជំនាញបានរកឃើញដេប៉ូចែកចាយប្រេងឥន្ធនៈចំនួន ៤ ទីតាំងដែលបានលក់ប្រេងជូនអតិថិជនដោយមិនមានអនុលោមភាពផ្នែកបរិមាណគុណភាព និងតម្លៃ។
បន្ទាប់មកមន្ត្រីជំនាញក៏បានធ្វើកំណត់ហេតុ និងអនុវត្តនីតិវិធីពិន័យអន្តរការណ៍ទៅលើដេប៉ូទាំង ៤ ទីតាំងដោយដេប៉ូចំនួន ៣ ត្រូវបានពិន័យជាប្រាក់ចំនួន ២ លានរៀលក្នុង ១ ដេប៉ូ និងដេប៉ូ ១ ផ្សេងទៀតត្រូវបានពិន័យជាប្រាក់ចំនួន ១ លានរៀល៕
