រថយន្តរងការខូចខាត និងជនរងគ្រោះក្នុងគ្រោះថ្នាក់ចរាចរណ៍នៅទៀបភ្លឺថ្ងៃទី ១៩ ខែ សីហា។ នគរបាល
កំពតៈ បុរសជាមន្ត្រីនគរបាលអន្តោប្រវេសន៍ប្រចាំច្រកព្រែកចាកនៅខេត្តកំពតចំនួន ៣ នាក់បានស្លាប់នៅកន្លែងកើតហេតុ និងម្នាក់ទៀតស្លាប់នៅមន្ទីរពេទ្យខេត្ត ខណៈជនរងគ្រោះទី ៥ ត្រូវបានបញ្ជូនទៅប្រទេស វៀតណាម ក្នុងគ្រោះថ្នាក់ចរាចរណ៍រថយន្តបុកនឹងរថយន្តកាលពីវេលាទៀបភ្លឺថ្ងៃទី ១៩ ខែ សីហា នៅភូមិ-ឃុំជុំគ្រៀល ស្រុកទឹកឈូ ខេត្តកំពត។
លោក អ៊ឹម ឈួន ស្នងការរងទទួលផែនចរាចរណ៍ប្រាប់ភ្នំពេញប៉ុស្តិ៍ពីម្សិលមិញថា ករណីគ្រោះថ្នាក់ចរាចរណ៍នេះបានកើតឡើងនៅវេលាទៀបភ្លឺថ្ងៃទី ១៩ សីហា ស្ថិតក្នុងភូមិ-ឃុំជុំគ្រៀល ស្រុកទឹកឈូ ខេត្តកំពត។ ជនរងគ្រោះឈ្មោះ ញឹប ភារម្យ ជាវរសេនីយ៍ឯក (ប្រធានត្រួតពិនិត្យលិខិតឆ្លងដែន) ទី២- ឈ្មោះ តាន់ ផេង នាយរងប៉ុស្តិ៍ច្រកទ្វារព្រែកចាក ទី៣- ឈ្មោះ ឃី ឡុក ជាវរសេនីយ៍ឯក ទី៤- ឈ្មោះ ស្ងួន សារ៉ាត់ វរសេនីយ៍ទោ និងទី៥- ឈ្មោះ ថៃវីរៈ សំរិទ្ធសិលាវិបុល ជាអនុសេនីយ៍ឯករងរបួសធ្ងន់ និងត្រូវបានបញ្ជូនទៅសង្គ្រោះបន្ទាន់នៅប្រទេស វៀតណាម។ ពួកគេសុទ្ធតែមន្ត្រីអន្តោប្រវេសន៍ប្រចាំច្រកទ្វារអន្តរជាតិព្រែកចាក ខេត្តកំពត។
លោកបន្តថា៖ «យើងមិនដឹងថាយ៉ាងម៉េចទេក្នុងស្ថានភាពពេលនោះ ប៉ុន្តែបើយើងពិនិត្យមើលជាក់ស្តែងរថយន្តរងគ្រោះបើកបុកពីក្រោយរថយន្តសណ្តោងរ៉ឺម៉ក»។
.jpg)
លោកបញ្ជាក់ថា៖ «រថយន្តរងគ្រោះនោះអាចមានល្បឿនលឿនខ្លាំង ព្រោះក្បាលរថយន្តបានចូលទៅជាប់នឹងកង់ក្រោយរថយន្តធំនោះ»។
លោក សូ ប៊ុនធឿន អធិការរងនគរបាលស្រុកទឹកឈូបានប្រាប់ថា តាមរយៈសាក្សីនៅជុំវិញកន្លែងកើតហេតុបំភ្លឺថា នៅមុនពេលកើតហេតុនៅវេលាម៉ោងប្រហែល ៣ ទៀបភ្លឺឈានចូលថ្ងៃទី ១៩ សីហា គេបានឃើញរថយន្តរងគ្រោះម៉ាក ហាយឡែនដឺ ពណ៌ស ពាក់ស្លាកលេខភ្នំពេញ 2Z-0241 បានបើកស្របគ្នាពីទិសក្រុងកំពតទៅក្រុងកែប។ លុះបើកដល់ចំណុចម្តុំសហគមន៍ស្រែអំបិលស្ថិតក្នុងភូមិ-ឃុំ ជុំគ្រៀល ស្រុកទឹកឈូ ខេត្តកំពត ក៏មានរថយន្តសណ្តោងរ៉ឺម៉ក ១ គ្រឿងទៀតពាក់ស្លាកលេខព្រះសីហនុ 3A-1861 ដឹកកូនគ្រែងបើកស្របទិសគ្នាដែរ ហើយរថយន្តរបស់ជនរងគ្រោះបើកបំបុកចូលគូទរបស់រថយន្តធំនោះ។
ក្រោយកើតហេតុភ្លាមៗ អ្នកបើកបររថយន្តធុនធំក៏បានរត់គេចខ្លួនបាត់ បន្ទាប់ពីសមត្ថកិច្ចចុះទៅដល់កន្លែងកើតហេតុ។ នៅក្នុងរថយន្តរបស់ជនរងគ្រោះវិញសមត្ថកិច្ចឃើញមានមនុស្សប្រុស ៣ នាក់ ត្រូវគាបស្លាប់នៅក្នុងរថយន្ត និងបុរសម្នាក់ទៀតបានស្លាប់ពេលបញ្ជូនដល់មន្ទីរពេទ្យបង្អែកខេត្តកំពត។ ក្រោយពីកម្លាំងសមត្ថកិច្ចរបស់លោកធ្វើអន្តរាគមន៍ និងបានពិនិត្យពីអត្តសញ្ញាណរបស់ក្រុមជនរងគ្រោះ ទើបដឹងថាពួកគេជាមន្ត្រីបម្រើការនៅប៉ុស្តិ៍ច្រកទ្វារអន្តរជាតិព្រែកចាកក្នុងខេត្តកំពត។
លោកបញ្ជាក់ថា៖ «ពេលនោះយើងមិនបានធ្វើការវាស់វែងអីទេ តែបើយើងពិនិត្យស្ថានភាពជាក់ស្តែងគឺរថយន្តរងគ្រោះបុកចូលគូទរថយន្តគេតែម្តង។ យើងពិនិត្យលើសាកសពមិនឃើញមានជាតិអាល់កុលក្នុងខ្លួនទេ»។
លោកថាសាកសពជនរងគ្រោះ ២ នាក់ ដែលមានស្រុកកំណើតនៅភូមិ-ឃុំ ត្រពាំងសង្កែត្រូវបានឪពុកម្តាយយកទៅធ្វើបុណ្យតាមប្រពៃណីហើយ។ រីឯ សាកសព ២ នាក់ទៀត ត្រូវបានក្រុមគ្រួសារដឹកយកមករាជធានីភ្នំពេញ ខណៈបុរសរងគ្រោះម្នាក់ទៀតគេនៅមិនទាន់ដឹងថា ស្ថានភាពជំងឺយ៉ាងម៉េចនៅឡើយទេ បន្ទាប់ពីដឹកយកទៅសង្គ្រោះបន្ទាន់នៅប្រទេសវៀតណាមនោះ។
លោកបន្តថាក្រោយសម្រួលហេតុការណ៍ចប់សព្វគ្រប់អស់ហើយ សមត្ថកិច្ចរបស់លោកបានស្ទូច និងនាំយករថយន្តទាំង ២ គ្រឿង ទៅរក្សាទុកនៅអធិការដ្ឋាននគរបាលស្រុកទឹកឈូ ខេត្តកំពត ដើម្បីធ្វើការដោះស្រាយតាមផ្លូវច្បាប់៕
