មន្ត្រី​សហជីព​ពីរ​នាក់​ថា ត្រូវ​បាន​ឃាត់​ខ្លួន​ក្នុង​កូដកម្ម​នៅ​រោងចក្រ Cambo


20140523_05
កូដកម្មកម្មកររោងចក្រកាត់ដេរ នៅខណ្ឌពោធិ៍សែនជ័យកន្លងមក ម៉ៃ វីរៈ

ភ្នំពេញៈ មេ​ដឹក​នាំ​សហជីព​ចំនួន​ពីរ​នាក់​ស្ទើរ​មិន​អាច​គេច​ផុត​ពី​ការ​ចាប់​ខ្លួន កាល​ព្រឹក​ម្សិលមិញ​បើ​កុំ​តែ​បាន​កម្មករ​ធ្វើ​កូដកម្ម​នៅ​រោងចក្រ​កាត់ដេរ​មួយ​ក្នុង​រាជធានី​ភ្នំពេញ​នាំ​គ្នា​បង្ខំ​ឲ្យ​នគរបាល និង​សន្តិសុខ​ឯកជន​ដោះលែង​ពួក​គេ។ នេះ​បើ​តាម​ការ​អះអាង​របស់​មន្រ្តី​សហជីព​កាល​ពី​ម្សិលមិញ។

លោក សៀង សម្បត្តិ ប្រធាន​សហព័ន្ធ​សហជីព​មិត្តភាព​កម្មករ (WFUF) បាន​ថ្លែង​ថា លោក ម៉ៅ វណ្ណៈ អនុ​ប្រធាន​សហព័ន្ធ​សហជីព​របស់​លោក និង​អគ្គ​លេខាធិការ លោក យី យ៉េត ត្រូវ​បាន​ឃាត់​ខ្លួន​នៅ​វេលា​ម៉ោង​ប្រហែល ៩ ព្រឹក​នៅ​ក្រៅ​រោងចក្រ Cambo Handsome ក្នុង ខណ្ឌ​ពោធិ៍​សែន​ជ័យ ដែល​មាន​កម្មករ​ជាង ៣ ពាន់​នាក់​កំពុង​ធ្វើ​កូដកម្ម។

លោក​បន្ត​ថា៖ «មន្រ្តី​នគរបាល ខណ្ឌ​ពោធិ៍​សែន​ជ័យ និង​សន្តិសុខ​ឯកជន...បាន​ចាប់​មន្រ្តី​សហជីព​ខ្ញុំ​ពីរ​នាក់​ដែល​ចុះ​ទៅ​ទី​នោះ ដើម្បី​អន្តរាគមន៍​ជួយ​កម្មករ​ដែល​កំពុង​តវ៉ា​អស់​ជាង ១ សប្តាហ៍​មក​ហើយ»។

បើ​តាម​លោក សៀង សម្បត្តិ កម្មករ​ដែល​កំពុង​ធ្វើ​កូដកម្ម​បាន​ដណ្តើម​យក​មន្រ្តី​សហជីព​ទាំង​ពីរ​នេះ​ពី​នគរបាល​និង​ពី​កង​សន្តិសុខ​ឯកជន។

លោក​បន្ត​ថា៖ «ពួក​គេ​បាន​រួច​ខ្លួន​វិញ​ហើយ និង​បាន​ផ្ញើ​លិខិត​មួយ​ទៅ​រោងចក្រ​ដើម្បី​កំណត់​កាលបរិច្ឆេទ​សម្រាប់​ការ​ចរចា​ស្វែង​រក​ដំណោះស្រាយ​ឲ្យ​កម្មករ ប៉ុន្តែ​រោងចក្រ...មិន​ទទួល​យក​លិខិត​របស់​យើង​ទេ»។ លោក​បាន​បន្ត​ថា កម្មករ​នឹង​ធ្វើ​ការ​តវ៉ា​ម្តង​ទៀត​នៅ​ថ្ងៃ​សុក្រ​នេះ។

មន្រ្តី​នគរបាល ខណ្ឌ​ពោធិ៍​សែន​ជ័យ ម្នាក់​ដែល​សុំ​មិន​ឲ្យ​បញ្ចេញ​ឈ្មោះ បាន​ប្រាប់​ថា ការ​ចោទ​ប្រកាន់​នេះ គឺ​មិន​ពិត​ទាល់​តែ​សោះ។

លោក​បន្ត​ថា៖ «យើង​បាន​ចុះ​ទៅ​ទី​នោះ ដើម្បី​ការពារ​ពួក​គេ​ក្រែងលោ​មាន​ហិង្សា​ណា​មួយ​កើត​ឡើង។ យើង​មិន​បាន​ចាប់​ខ្លួន​នរណា​ម្នាក់​ទេ»។

ប៉ុន្តែ​អ្នក​នាង ផង់ លក្ខិណា មន្រ្តី​សហជីព WFUF ថ្លែង​ថា សន្តិសុខ​ឯកជន​ប្រមាណ ១០ នាក់​និង​នគរបាល​ពីរ​នាក់​បាន​ព្យាយាម​ចាប់​ខ្លួន​តំណាង​សហជីព ២ នាក់​នោះ។

អ្នក​នាង​បន្ត​ថា៖ «ខ្ញុំ​ចង់​តាម​សន្តិសុខ​ទាំង​នោះ ប៉ុន្តែ កម្មករ​ប្រាប់​ថា កុំ​ទៅ​ហើយ​ពួក​គេ​បាន​ស្រែក​ថា ពួក​គេ​មិន​ឲ្យ​សន្តិសុខ​ចាប់​ខ្លួន​មន្រ្តី​សហជីព​ទេ ព្រោះ​ពួក​គេ​ជា​អ្នក​សុំ​ឲ្យ​មន្រ្តី​សហជីព​មក​ជួយ»។

អ្នក​នាង លក្ខិណា បន្ថែម​ថា ការ​ទាមទារ​របស់​កម្មករ​រួម​មាន ប្រាក់​ឧបត្ថម្ភ​ធ្វើ​ដំណើរ ២០ ដុល្លារ ហើយ​ទាមទារ​បណ្តេញ​ប្រធាន​ផ្នែក​ដេរ​ដែល​ប្រើ​សម្តី​មិន​សមរម្យ​មក​លើ​កម្មករ។

តំណាង​ក្រុមហ៊ុន Cambo Handsome មិន​អាច​ទាក់​ទង​សុំ​ការ​អត្ថាធិប្បាយ​បាន​ទេ។

លោក Joel Preston អ្នក​ប្រឹក្សា​យោបល់​នៃ​មជ្ឈមណ្ឌល​អប់រំ​ច្បាប់​សម្រាប់​សហគមន៍​បាន​ថ្លែង​ថា រោងចក្រ Cambo Handsome មាន​ប្រវត្តិ​រើស​អើង​សហជីព​ពី​មុន​មក។

កាល​ពី​អំឡុង ឆ្នាំ​២០១១ កូដកម្ម​មួយ​នៅ​រោងចក្រ​នេះ​ក៏​មាន​ពាក់​ព័ន្ធ​នឹង​ការ​បណ្តេញ​មន្រ្តី​សហជីព​ហើយ​បាន​ឈាន​ដល់​ការ​ប៉ះទង្គិច​ដោយ​ហិង្សា​ជាមួយ​នឹង​កម្លាំង​សមត្ថកិច្ច​នគរបាល។

លោក Preston បន្ត​ឲ្យ​ដឹង​ថា ការ​ហាម​ប្រាម​លើ​ការ​ចុះ​បញ្ជិកា​សហជីព​បច្ចុប្បន្ន​មាន​ន័យ​ថា «មិន​មាន​ការ​ការពារ» មន្រ្តី​សហជីព​ទេ៕ PS

ព័ត៌មានថ្មីៗ