ការដុតសំរាមនៅខេត្តព្រះសីហនុកាលពីពេលថ្មីៗកន្លងមកនេះ។ រូបថត សហការី
ព្រះសីហនុៈ ប្រភពមួយបានប្រាប់ភ្នំពេញប៉ុស្ដិ៍ថានៅក្នុងសង្កាត់ ២ ក្រុងព្រះសីហនុ គឺមានការដ្ឋានសាងសង់សំណង់អគារខ្ពស់មួយចំនួនបានលួចដុតកាកសំណល់សំរាមជារៀងរាល់ថ្ងៃដែលបាននិងកំពុងធ្វើឱ្យប៉ះពាល់សុខភាពពលរដ្ឋ។ ប៉ុន្តែអាជ្ញាធរមូលដ្ឋានបានអះអាងថា មិនមានអ្នករាយការណ៍ពីផលប៉ះពាល់សុខភាពទេ ខណៈមន្ត្រីខេត្តថា ករណីបែបនេះធ្លាប់កើតមានយូរៗម្ដង។
កាលពីថ្ងៃទី ៧ តុលា នៅក្នុងសារអ៊ីមែលមួយផ្ញើមកកាន់ភ្នំពេញប៉ុស្ដិ៍គឺបានលើកឡើងថានៅគ្រប់ទីកន្លែងក្នុងក្រុងព្រះសីហនុ ជាពិសេសនៅសង្កាត់លេខ ២ គឺមានការដ្ឋានសំណង់អគារខ្ពស់ៗមួយចំនួនដែលគ្រប់គ្រងដោយជនជាតិចិនបានដុតកាកសំណល់សំណង់ និងប្លាស្ទិកក្នុងបរិមាណច្រើនដោយខុសច្បាប់ជារៀងរាល់ថ្ងៃ និងយប់ដើម្បីសន្សំប្រាក់ដែលធ្វើឱ្យប៉ះពាល់សុខភាពជាពិសេសដល់ក្មេងៗ និងមនុស្សចាស់។
ប្រភពនេះបន្តថា៖ «ផ្សែងបណ្ដាលឱ្យឈឺក្បាល ក្អួតចង្អោរ ឈឺបំពង់កសម្រាប់អ្នករាល់គ្នាដែលរស់នៅទីនេះ។ ការដុតសំណល់សំណង់ និងប្លាស្ទិកគឺខុសទៅនឹងច្បាប់កម្ពុជាពីព្រោះផ្សែងរបស់វាធ្វើឱ្យកើតជំងឺមហារីក ជំងឺសរសៃប្រសាទ និងជំងឺសួត»។
.jpg)
ប្រភពដដែលបានបញ្ជាក់ថា នគរបាលនៅក្នុងសង្កាត់លេខ ២ ត្រូវបានស្នើសុំឱ្យមានវិធានការចំពោះករណីនេះជាច្រើនដង ប៉ុន្តែបានព្រងើយកន្ដើយជាហេតុធ្វើឱ្យសកម្មភាពដុតកាកសំណល់ខុសច្បាប់ទាំងនេះ បន្តកើតមានរហូតដល់បច្ចុប្បន្ន។
ប៉ុន្តែលោក គឹម សៀ ចៅសង្កាត់លេខ ២ ក្រុងព្រះសីហនុបានប្រាប់ភ្នំពេញ-ប៉ុស្ដិ៍កាលពីថ្ងៃចន្ទថា អាជ្ញាធរតែងចុះពង្រឹងដោយផាកពិន័យចំពោះការលួចដុតសំរាមខុសច្បាប់ ទាំងសំរាមធម្មតាប្រើប្រាស់ដោយពលរដ្ឋ និងសំណល់នៅតាមការដ្ឋានសាងសង់អគារ។
លោកបន្តថាចាប់តាំងពីការរឹតបន្តឹងចុះផាកពិន័យគឺបានធ្វើឱ្យម្ចាស់ការដ្ឋានសំណង់ភាគច្រើនបានជួលឱ្យមានការដឹកជញ្ជូនកាកសំណល់ចេញពីការដ្ឋានរបស់ខ្លួនយកទៅចាក់ចោលនៅកន្លែងចោលសំណល់សំណង់។
ចៅសង្កាត់រូបនេះបន្តថា ថ្វីដ្បិតនៅមានការដ្ឋានខ្លះបន្តលួចដុតសំណល់សំណង់ក្ដី ប៉ុន្តែកន្លងមកពុំមានពលរដ្ឋណាម្នាក់រាយការណ៍មកអាជ្ញាធរពីការប៉ះពាល់សុខភាពដោយសារការលួចដុតកាកសំណល់ទាំងនោះឡើយ។
លោកថា៖ «អាហ្នឹងយើងអត់បានដឹងដែរ ហើយបើមានអ្នករាយការណ៍មកយើង (អំពីផលប៉ះពាល់សុខភាព) គឺយើងដឹងនឹងចុះធ្វើការដោះស្រាយភ្លាម»។
បើតាមលោក គឹម សៀ កាកសំណល់សំណង់គឺមានដូចជា កម្ទេចឈើថ្មស័ង្កសី ប្លាស្ទិក និងសំណល់ជាដីភក់ល្បាប់ ជាដើម។
ជាមួយគ្នានេះលោក អ៊ី សុខឡេង អភិបាលក្រុងព្រះសីហនុបានថ្លែងថាការលួចដុតសំរាមគឺកើតឡើងយូរៗម្ដងប៉ុណ្ណោះ ប៉ុន្តែមិនមែនកើតឡើងជាទូទៅនៅក្នុងក្រុងព្រះសីហនុឡើយ។ លោកបន្តថាកន្លងមកអាជ្ញាធរតែងចុះទៅអប់រំ ហើយចំពោះការបន្តលួចដុតកាកសំណល់ខុសច្បាប់គឺត្រូវផាកពិន័យទៅតាមច្បាប់ស្ដីពីបរិស្ថាន។
លោកថា៖ «ខ្ញុំដូចជាអត់ទទួលបានព័ត៌មានថា មានការលួចដុតហ្នឹងទេ ប៉ុន្តែកន្លងមក វាមាន វាមិនអត់សោះទេ ដូចជា ១ ខែ ខ្ញុំទទួលព័ត៌មានបាន ១ កន្លែង ឬ ២ កន្លែងហ្នឹង។ ខ្ញុំឱ្យមន្ត្រីក្រុងជាមួយមន្ត្រីបរិស្ថានចុះទៅពន្លត់ និងពិន័យអ៊ីចឹងទៅ»។
ប្រធានមន្ទីរបរិស្ថានខេត្តព្រះសីហនុលោក សាមុត សុធារិទ្ធ មិនអាចទាក់ទងសុំការអត្ថាធិប្បាយបានទេកាលពីថ្ងៃអង្គារដោយសារមិនមានអ្នកទទួលទូរស័ព្ទ។
កាលពីខែមេសាគំនរសំរាមដ៏ធំមួយត្រូវគេដុតនៅលើចិញ្ចើមផ្លូវកៅស៊ូ ១ ខ្សែក្នុងសង្កាត់លេខ ២ ក្រុងព្រះសីហនុ ហើយកាលនោះអាជ្ញាធរបានអះអាងថា ករណីនោះគឺជាការលួចដុត។
លោក សុខ សុខុម ប្រធានអង្គការស្រាវជ្រាវជាតិកម្ពុជាប្រចាំខេត្តព្រះសីហនុបានលើកឡើងថា លោកមិនចង់និយាយអំពីការដុតសំរាមខុសច្បាប់នៅតាមទីសាធារណៈនេះទេ ថ្វីដ្បិតវានៅតែបន្តកើតឡើងក្ដី។
លោកថា៖ «ខ្ញុំមិនចង់និយាយទេ ព្រោះរឿងសំរាមហ្នឹង ឥឡូវហ្នឹងរឿងតូចទេ»៕
