តាកែវ៖ យុវជន ៤ នាក់ ដែលបាននាំគ្នាផឹកគ្រឿងស្រវឹង និងចាក់ធុងបាស់រាំលេងសប្បាយ ល្មើសទៅនឹងវិធានការពារការឆ្លងរាលដាលនៃជំងឺកូវីដ ១៩ ត្រូវបានសមត្ថកិច្ចចាប់ខ្លួនបញ្ចូនទៅតុលាការនៅថ្ងៃចន្ទនេះ។ នេះបើតាមលោក អ៊ូច ភា អភិបាលខេត្តតាកែវ។
លោក អ៊ូច ភា បានថ្លែងប្រាប់ ភ្នំពេញ ប៉ុស្តិ៍ថា លោកបានបញ្ជាឲ្យកម្លាំងកងរាជអាវុធហត្ថខេត្តឃាត់ខ្លួនយុវជនចំនួន ៤ នាក់ ដែលបាននាំគ្នាផឹកស៊ីចាក់ធុងបាស់រាំលេងសប្បាយផ្គើនល្មើសទៅនឹងវិធានការពារការឆ្លងរាលដាលនៃជំងឺកូវីដ ១៩ របស់រាជរដ្ឋាភិបាល។
លោកបានថ្លែងថា៖ «យើងបានចាប់បញ្ចូនទៅតុលាការហើយ ឥឡូវទុកឲ្យតុលាការធ្វើតាមនីតិវិធីរបស់គាត់។ យើងនឹងបន្តអនុវត្តវិធានការតឹងរ៉ឹងបែបនេះ បើសិនជានៅតែមានអ្នកបំពាន»។
បើតាមលោក អ៊ូច ភា លោកបានបញ្ជាឱ្យសមត្ថកិច្ចកងរាជអាវុធហត្ថខេត្ត ចាប់ខ្លួនបុរស ៤ នាក់ នេះកាលពីល្ងាចថ្ងៃទី ១៨ ខែ មេសា ឆ្នាំ ២០២១ នៅចំណុចភូមិអង្គរាំង ឃុំបឹងត្រាញ់ខាងជើង ស្រុកសំរោង ខេត្តតាកែវ។
លោកថ្លែងថា មូលហេតុដែលសមត្ថកិច្ចសម្រេចឃាត់ខ្លួនយុវជនទាំង ៤ នាក់ខាងលើ គឺបន្ទាប់ពីពួកគេមិនស្តាប់តាមការណែនាំរបស់អាជ្ញាធរ និងសេចក្ដីជូនដំណឹងរបស់ក្រសួងសុខាភិបាលដែលមិនឱ្យមានការជួបជុំ ផឹកស៊ី ដែលនាំឱ្យមានការឆ្លងរីករាលដាលជំងឺកូវីដ ១៩៕