ភ្នំពេញៈ រដ្ឋបាលរាជធានីភ្នំពេញ នឹងធ្វើការបង្រួមនូវតំបន់ក្រហម ឱ្យមកនៅទំហំតូច ដោយដាក់មកត្រឹមជាខ្នងផ្ទះ និងធ្វើការកែប្រែតំបន់លឿងទុំ មកជាតំបន់លឿង ដើម្បីផ្តល់ភាពងាយស្រួល ដល់អាជ្ញាធរធ្វើការគ្រប់គ្រង ដែលការសម្រេចនេះនឹងធ្វើឡើងចាប់ពីថ្ងៃទី ១៩ ខែឧសភា។
លោក ឃួង ស្រេង អភិបាល និងជាប្រធានគណៈបញ្ជាការឯកភាពរាជធានីភ្នំពេញ នាព្រឹកថ្ងៃទី ១៧ ខែឧសភា បានដឹកនាំកិច្ចប្រជុំគណៈបញ្ជាការឯកភាព រាជធានីភ្នំពេញតាមរយៈអនឡាញ ( Video Conference ) ស្ដីពីការត្រួតពិនិត្យការងារនៃការបិទខ្ទប់ក្នុងមូលដ្ឋាន ដោយសាលារាជធានី នឹងធ្វើការបង្រួមតំបន់ក្រហម ឱ្យមកកាន់តែតូចជាងមុន ដោយដាក់កំណត់តំបន់នេះ មកត្រឹមជាខ្នងផ្ទះ ឬជាអគារតែប៉ុណ្ណោះ។
លោកមានប្រសាសន៍ថា ៖«ការបង្រួមតំបន់ក្រហមដោយកន្លែងមកជាខ្នងផ្ទះនេះ គឺដើម្បីផ្ដល់ភាពងាយស្រួលក្នុងការគ្រប់គ្រង និងការចូលរួមអនុវត្តតាមវិធានការរបស់ក្រសួងសុខាភិបាល និងចូលរួមគោរពតាមអនុសាសន៍ដ៏ខ្ពង់ខ្ពស់របស់សម្ដេចនាយករដ្ឋមន្រ្តី ហ៊ុន សែន គឺ បីការពារ និងបីកុំ»។
បើតាម លោក ឃួង ស្រេង ការបង្រួមតំបន់ក្រហមមកត្រឹមជាខ្នងផ្ទះ ឬអគារនេះ នឹងចាប់ផ្តើមអនុវត្តនៅថ្ងៃ ១៩ ខែឧសភា ដើម្បីផ្តាច់ឫសគល់នៃការចម្លងវីរុសកូវីដ ១៩ នេះ ឱ្យមកនៅកាន់តែតូច។
លោកបញ្ជាក់ថា ៖«អាជ្ញាធរមូលដ្ឋាន ត្រូវមើលការខុសត្រូវឱ្យបានហ្មត់ចត់បំផុត នៅតាមទីតាំងដែលនឹងត្រូវបានបង្រួមមកជាតំបន់ក្រហម ដោយត្រូវតាមដានទាំងបញ្ហាសុខភាព និងស្បៀងអាហាររបស់ប្រជាពលរដ្ឋ ដោយមិនឱ្យមានប្រជាពលរដ្ឋណាម្នាក់ខ្វះស្បៀងនោះឡើយ»។
គួរបញ្ជាក់ផងដែរថា កាលពីថ្ងៃទី ១២ ខែឧសភា រដ្ឋបាលរាជធានីភ្នំពេញ បានប្រកាសសម្រេចបន្តវិធានការរដ្ឋបាលសម្រាប់ភូមិសាស្ត្ររាជធានីភ្នំពេញ រយៈពេល ៧ ថ្ងៃបន្តទៀត ដោយគិតចាប់ពីថ្ងៃទី ១៣ រហូតដល់ថ្ងៃទី ១៩ ខែឧសភា ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ ដោយបែងចែកជា «តំបន់ក្រហម តំបន់លឿងទុំ និងតំបន់លឿង ខណៈតំបន់ក្រហមត្រូវបានបង្រួមមកតូចជាងមុន។
តំបន់មួយចំនួនក្នុងខណ្ឌចំនួន ៤ ដែលត្រូវបានកំណត់ជាតំបន់ក្រហម ក្នុងនោះមានខណ្ឌទួលគោក ខណ្ឌពោធិ៍សែនជ័យ ខណ្ឌឫស្សីកែវ និងខណ្ឌមានជ័យ។
ការដាក់បន្តឱ្យអនុវត្តនូវវិធានការរដ្ឋបាលនេះ នឹងផុតកំណត់នៅថ្ងៃទី ១៩ ខែឧសភា ដែលជាហេតុនាំឱ្យរដ្ឋបាលរាជធានីបានបើកកិច្ចប្រជុំនៅថ្ងៃទី ១៧ ឧសភា ដើម្បីកំណត់នូវការបង្រួមតំបន់ក្រហមឱ្យមកកាន់តែតូច។
ដោយឡែក ទាក់ទងនឹងដំណើរការនៃការចាក់វ៉ាក់សាំងគិតមកដល់ថ្ងៃទី ១៦ ខែឧសភា មានប្រជាពលរដ្ឋកម្ពុជាសរុបចំនួន ២ ០៨២ ២៨២ នាក់ ឬស្មើនឹង ២០,៨២% បានចាក់វ៉ាក់សាំង ក្នុងចំណោម គោលដៅដែលត្រូវចាក់ឱ្យបាន ១០ លាននាក់នៅទូទាំងប្រទេស។
យោងតាមក្រសួងការពារជាតិនៅថ្ងៃទី ១៧ ឧសភាបានឱ្យដឹងថា ក្នុងរយៈពេល ១៦ ថ្ងៃ នៃយុទ្ធនាការចាក់វ៉ាក់សាំង ជូនប្រជាពលរដ្ឋនៅតំបន់ក្រហមក្នុងខណ្ឌទាំង ៦ ក្នុងរាជធានីភ្នំពេញ ចាក់ដូសទី១ បានចំនួន ៦៩៤ ២១៣ នាក់ ឯអ្នកដែលបានចាក់ដូសទី២ ដែលបានចាប់ផ្តើមនៅថ្ងៃទី ១៦ ឧសភា ចាក់បានចំនួន ៣ ៥៩៦ នាក់។
លោក ឥត សារ៉ាត់ អគ្គមេបញ្ជាការរង នាយសេនាធិការចម្រុះនៃកងយោធពលខេមរភូមិន្ទ និងជាប្រធានប្រតិបត្តិក្រុមការងារចាក់វ៉ាក់សាំងនៅតំបន់ក្រហមបានឱ្យដឹងថា ដំណើរការចាក់វ៉ាក់សាំងមានដំណើរការល្អប្រសើរ ក្រោមការយកចិត្តទុកដាក់ខ្ពស់ពីក្រុមការងារ។
លោក ឥត សារ៉ាត់ ក៏បានអំពាវនាវដល់ប្រជាពលរដ្ឋនៅតំបន់ក្រហម ដែលមិនទាន់បានចាក់វ៉ាក់សាំងដូសទី១ ត្រូវទៅចាក់វ៉ាក់សាំង ព្រោះក្រុមការងារនៅតែបន្តចាក់ដូសទី១ដល់ពួកគាត់ដដែល៕
វីដេអូ៖