ភ្នំពេញ: រដ្ឋសភា នៅថ្ងៃនេះ បើកកិច្ចប្រជុំ ក្រោមអធិបតីភាពប្រធានរដ្ឋសភា លោកហេង សំរិន ដើម្បីពិភាក្សា និងអនុម័ត លើរបៀបវារៈចំនួន៦ ក្នុងនោះមានការអនុម័តសេចក្តីព្រាងច្បាប់ទាក់ទងនឹងការគ្រប់គ្រងប្រេងកាត ព្រមទាំងកិច្ចព្រមព្រៀងរវាងកម្ពុជានិងប្រទេសមួយចំនួន និងក៏មានការសម្រេច អំពីសុពលភាពនៃអាណត្តិរបស់លោកសុខ ផេង ជាតំណាងរាស្ត្រមណ្ឌលព្រៃវែងផងដែរ។
ក្នុងកិច្ចប្រជុំថ្ងៃនេះ ដែលមានសមាជិកចូលរួមចំនួន១០៨រូប រដ្ឋសភា ក៏បានទទួលស្គាល់លោកសុខ ផេង ជាតំណាងរាស្ត្រថ្មីមណ្ឌលខេត្តព្រៃវែងជំនួសសមាជិករដ្ឋសភាដែលទទួលមរណភាព។ លោកហេង សំរិន ប្រធានរដ្ឋសភា បានអានសេចក្តីប្រកាសថា៖«ប្រកាសទទួលស្គាល់លោកសុខ ផេង ជាតំណាងរាស្រ្តថ្មីមណ្ឌលខេត្តព្រៃវែង ជំនួសលោកពៅ សាមី ដែល ទទួលមរណភាព»។
អគ្គលេខាធិការរដ្ឋសភាបានជូនដំណឹងថា របៀបវារៈដែលរដ្ឋសភាត្រូវពិភាក្សា និងអនុម័តនោះមានសេចក្តីព្រាងច្បាប់ស្តីពីការគ្រប់គ្រងប្រេងកាត និងផលិតផលប្រេងកាត។ សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងរវាងព្រះ រាជាណាចក្រកម្ពុជា និងរដ្ឋាភិបាលនៃសាធារណរដ្ឋប្រជាមានិតបង់ក្លាដេស ស្តីពីការជំរុញនិងការការពារទៅវិញទៅមក នៃវិនិយោគ។ ការពិភាក្សា និងអនុម័តសេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងរវាងព្រះរាជាណាចក្រកម្ពុជា និងសហភាពអារ៉ាប់អេមីរ៉េត ស្តីពីការជំរុញនិងការការពារទៅវិញទៅមកនៃវិនិយោគ។
.jpg)
ការពិភាក្សា និងអនុម័តសេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀងរវាងព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋតួកគី ស្តីពីការជំរុញនិងការការពារទៅវិញទៅមកនៃវិនិយោគ។ របៀបវារៈចុងក្រោយ គឺ ការពិភាក្សានិងអនុម័តសេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀងស្តីពីការបង្កើតអង្គការបណ្តាញអន្តរជាតិសម្រាប់ឫស្សី និងផ្តៅ៕
