ភ្នំពេញៈ ក្នុងរយៈពេល ១ ថ្ងៃរថយន្តធុនធំជាង ៤០ គ្រឿង ដែលបើកចូលក្រុងភ្នំពេញ ខុសម៉ោងកំណត់ ត្រូវបានសមត្ថកិច្ចឃាត់ឲ្យធ្វើកិច្ចសន្យា និងផាកពិន័យតាមច្បាប់ ដែលចំណាត់ការនេះ ក៏ធ្លាប់ត្រូវបានពលរដ្ឋរិះគន់ដែរថា អាជ្ញាធរអនុវត្តមិនមានប្រសិទ្ធភាពក្នុងការទប់ស្កាត់រថយន្តធុនធំចូលក្រុង នាពេលកន្លងមក។
នាយកការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ លោក សែម សុគន្ធា បានប្រាប់ភ្នំពេញប៉ុស្ដិ៍ ពីម្សិលមិញថា បន្ទាប់ពីមានបញ្ជាពីលោកឃួង ស្រេង អភិបាលរាជធានីភ្នំពេញ និងលោក ស ថេត ស្នងការនគរបាលរាជធានីភ្នំពេញ សមត្ថកិច្ចបានបើកយុទ្ធនាការចុះចាប់រថយន្តដឹកទំនិញធុនធំ នៅតាមផ្លូវ ២០០៤ បានជាង ៤០ គ្រឿង នាថ្ងៃទី ១៣ មីនា ដែលរថយន្តទាំងនេះបានបើកចូលក្រុងខុសម៉ោងកំណត់។
លោកបន្តថា រដ្ឋបាលរាជធានីភ្នំពេញបានដាក់ម៉ោងកំណត់ ដោយមិនអនុញ្ញាតឲ្យរថយន្តធុនធំបើកចូលក្រុង ចាប់ពីម៉ោង ៦ ទៅ ៩ ព្រឹកនិងនៅម៉ោង ៤ រសៀល ដល់ម៉ោង ៨ យប់។
ក្នុងនោះ រថយន្ដធុនធំទាំងឡាយត្រូវហាមការបើកចូលក្នុងទឹកដីខណ្ឌធំៗចំនួន ៤ រួមមានខណ្ឌដូនពេញ ខណ្ឌ ៧ មករា ខណ្ឌ ទួលគោក និងខណ្ឌ ចំការមន រីឯនៅតាមខណ្ឌមួយចំនួនទៀត អាជ្ញាធរ នឹងវាស់ចម្ងាយផ្លូវសម្រាប់អនុញ្ញាតឲ្យបើកបរ។
លោក សុគន្ធា បញ្ជាក់ថា៖ «សាលាក្រុងបានហាមហើយ គាត់នៅតែចូលមកទាំងបំពានទៀត ឥឡូវយើងចាប់ឃាត់ពួកគាត់ឲ្យធ្វើកិច្ចសន្យា និងពិន័យតាមច្បាប់ គឺក្នុងឡាន ១ គ្រឿង ១០ ម៉ឺនរៀល រួមទាំងអប់រំ ណែនាំបន្ថែម បើគាត់មិនកែនៅតែប្រព្រឹត្តដដែលទៀត យើងនឹងមានវិធានការធ្ងន់ជាងនេះទៀត»។
លោកបន្ថែមថា នៅដើមឆ្នាំ ២០១៩ នេះ សមត្ថកិច្ចបានឃាត់រថយន្តធុនធំចំនួន ៥០៣ គ្រឿងដែលបើកបរខុសម៉ោងកំណត់របស់សាលារាជធានីភ្នំពេញ ដោយតម្រូវឲ្យម្ចាស់រថយន្តទាំងអស់យកឯកសាររថយន្តមកផ្ទៀងផ្ទាត់ និងធ្វើកិច្ចសន្យាឡើងវិញចំពោះការបើកចូលក្រុង ផាកពិន័យ អប់រំ និងណែនាំផ្សេងទៀត។
លោក សេង ហុង រស់នៅម្តុំបឹងទំពុន និងជាអ្នកធ្វើដំណើរតាមផ្លូវ ៣៧១ ជារៀងរាល់ថ្ងៃប្រាប់ថា លោកមានការបារម្ភជាខ្លាំង ពេលដែលរថយន្តធំៗបើកនៅក្បែរ ដោយសារតែខ្លាចធ្លាក់ថ្ម ដី ឬដែកមកលើខ្លួន។
លោកបន្តថា ដោយសារធ្លាប់បានឃើញគ្រោះថ្នាក់បណ្តាលមកពីរថយន្តធំៗនៅលើទំព័រសារព័ត៌មានជាច្រើន ទើបលោកមានការប្រុងប្រយ័ត្នខ្ពស់នៅពេលធ្វើដំណើរជិតរថយន្តធំៗទាំងនោះ។
លោកក៏បានសំណូមពរទៅសាលារាជធានីភ្នំពេញជួយពង្រឹងច្បាប់ និងបទបញ្ជាដែលខ្លួនបានដាក់ចេញជាបន្តបន្ទាប់នាពេលកន្លងមក ដើម្បីទប់ស្កាត់រថយន្តធំៗចូលក្នុងក្រុង។
លោកបញ្ជាក់ថា៖ «ឡានដឹកដីជួនកាលឃើញថ្មធ្លាក់លើយើង ដីខ្សាច់អីបើគាត់គ្របធ្លាក់តិចតួច តែបើគាត់អត់គ្របធ្លាក់ម៉ាស្រឡាញ់ពេលខ្លះ ហើយបើឡានកុងតឺន័រ ឡានដឹកដែក ដឹកអីច្រងេងច្រងាងអី យើងបារម្ភបំផុត។ យើងខ្លាចរបស់ហ្នឹងធ្លាក់លើយើង ព្រោះធ្លាប់ឃើញមានធ្លាក់ខ្លះ។ ក្នុងករណីពួកគេប្រហែស អត់ចាប់វីស ធ្លាក់មកគ្រោះថ្នាក់ណាស់ហ្នឹង ហើយយើងអត់ហ៊ានទៅជិតគាត់ទេ ខ្លាច»។
លោកស្រី លឹម សុខជា ទីប្រឹក្សាជាន់ខ្ពស់អង្គការសម្ព័ន្ធដើម្បីសុវត្ថិភាពចរាចរណ៍ផ្លូវគោក ថ្លែងថា អាជ្ញាធរគួរផ្សព្វផ្សាយឲ្យទូលាយជាងនេះពីប្រភេទរថយន្តបែបណាខ្លះដែលហាមមិនឲ្យចូលក្រុងខុសម៉ោងកំណត់ ឬប្រភេទណាខ្លះអាចចល័តចូលក្រុង ហើយតើគួរពិន័យកម្រិតណាចំពោះរថយន្តដែលបំពានបម្រាមនេះ។
លោកស្រីបន្តថា សមត្ថកិច្ចត្រូវតែរឹតបន្ដឹងច្បាប់តឹងរឹុងបំផុត ព្រោះមួយរយៈចុងក្រោយនៃឆ្នាំ ២០១៩ នេះ គ្រោះថ្នាក់ចរាចរណ៍ជាច្រើនករណីបង្កឡើងដោយរថយន្តធុនធំនៅតាមដងវិថីមួយចំនួនក្នុងក្រុងភ្នំពេញ បើសិនសមត្ថកិច្ចមិនព្រមអនុវត្តច្បាប់ឲ្យតឹងរឹុងទេ បញ្ហាវានៅតែកើតមានឡើងដដែលៗរាល់ថ្ងៃ។
លោកស្រីបញ្ជាក់ថា៖ «រថយន្តធុនធំទាំងឡាយហ្នឹង ប្រសិនចាំបាច់ត្រូវតែដឹកចូលក្នុងក្រុងនោះ គឺគួរតែផ្ទេរទំនិញពីរថយន្តធំមកដាក់រថយន្តតូចវិញ ប៉ុន្ដែបើមិនសូវចាំបាច់ខ្លាំង គួររង់ចាំពេលយប់ ឬម៉ោងមិនសូវមានមនុស្សធ្វើចរាចរណ៍។ ម្យ៉ាងទៀតក្រុមហ៊ុនផ្លាស់ប្ដូរឃ្លាំងទៅជាយក្រុងវិញ នេះជាយោបល់ខ្ញុំ សម្រាប់ចូលរួមជាមួយអាជ្ញាធរ»។
របាយការណ៍របស់នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈនៃអគ្គស្នងការដ្ឋាននគរបាលជាតិបានបង្ហាញក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆ្នាំ ២០១៨ និងលើកទិសដៅការងារឆ្នាំ ២០១៩ កាលពីថ្ងៃទី ១៨ មករា ឆ្នាំ ២០១៩ ឲ្យដឹងថា មនុស្សចំនួន ១ ៧៦១ នាក់បានស្លាប់ និង ៤ ៧៧០ នាក់ផ្សេងទៀតរងរបួស ក្នុងគ្រោះថ្នាក់ចរាចរណ៍នៅកម្ពុជា ឆ្នាំ ២០១៨។
របាយការណ៍បញ្ជាក់ថា នៅឆ្នាំ ២០១៨ គ្រោះថ្នាក់ចរាចរណ៍កើតឡើង ៣ ២៦៧ ករណី ធ្លាក់ចុះ ៧ ភាគរយ បើធៀបនឹងឆ្នាំ ២០១៧ ។ ចំណែកចំនួនអ្នកស្លាប់ បានធ្លាក់ចុះ ១ ភាគរយ ខណៈចំនួនអ្នករងរបួសបានធ្លាក់ចុះ ១៤ ភាគរយ ហើយតាមរយៈតួលេខនេះមធ្យមក្នុង ១ ថ្ងៃ មនុស្សប្រហែល ៥ នាក់ បានស្លាប់ដោយគ្រោះថ្នាក់ចរាចរណ៍៕