រឿង​ប្តឹង​ប្ដល់​រវាង​អ្នក​ទឹក​ផុស​និង​ចៅក្រម​ម្នាក់​ខាង​ប៉េអឹម​កំពុង​សួរ


កំពង់ឆ្នាំងៈ សំណុំ​រឿង​ប្តឹង​ប្តល់​រវាង​ចៅក្រម​នៅ​សាលា​ដំបូង ខេត្ត​កំពង់ឆ្នាំង ម្នាក់​និង​ប្រជា​ពលរដ្ឋ​នៅ ស្រុក​ទឹកផុស ក្រោម​ការ​ចោទ​ថា បាន​ទៅ​គំរាម​យក​ដី​លំនៅឋាន​ពលរដ្ឋ​ត្រូវ​សមត្ថកិច្ច​កង​រាជ​អាវុធហត្ថ​ខេត្ត​កោះ​ហៅ​ទៅ​សាកសួរ។

លោក លឹម ហាក់ ប្រធាន​ការិយាល័យ​ស្រាវជ្រាវ​ព្រហ្មទណ្ឌ​នៃ​កង​រាជ​អាវុធហត្ថ ខេត្ត​កំពង់ឆ្នាំង ឲ្យ​ដឹង​ថា ករណី​ទំនាស់​ដី​លំនៅឋាន​ដែល​មាន​ការ​ប្តឹង​ប្ដល់​គ្នា​រវាង​ពលរដ្ឋ​និង​លោក​ចៅក្រម ខេត្ត​កំពង់ឆ្នាំង ម្នាក់​នោះ​ឥឡូវ​ខាង​លោក​កំពុង​កោះ​ហៅ​ភាគី​ទាំង​សង​ខាង​មក​ស៊ើប​សួរ​នៅ​ឡើយ។ លោក​ប្រាប់​ថា៖ «ខ្ញុំ​កំពុង​ហៅ​ខាង​ចុង​ចោទ​ជា​ប្រជា​ការពារ​និង​មេភូមិ​មក​សួរ​នាំ​ពី​ទំនាស់​នេះ»។

លោក នឹង ណាក់ ប្រជា​ការពារ​ដែល​ពាក់ព័ន្ធ​ក្នុង​បណ្តឹង​នោះ​ប្រាប់​ថា ទំនាស់​នេះ​គាត់​បាន​ប្តឹង​ទៅ​ក្រុម​ប្រឹក្សា​នៃ​អង្គ​ចៅក្រម​ហើយ ប៉ុន្តែ មិន​ទាន់​ឃើញ​មាន​ចំណាត់ការ​នៅ​ឡើយ ហើយ​បណ្តឹង​នៅ​សាលា​ដំបូង​ខេត្ត ក៏​នៅ​មិន​ទាន់​កោះ​ហៅ​សួរ​នាំ​ដែរ។ លោក​ថា ទំនាស់​នេះ​មាន​ពលរដ្ឋ​មិន​ដល់ ១០ គ្រួសារ​ទេ តែ​អ្នក​ភូមិ​ជាង ៤០ គ្រួសារ​បាន​គាំទ្រ។

លោក​បន្ត​ថា កាល​ពី​ថ្ងៃ​អង្គារ​មាន​អ្នក​មក​អះអាង​ថា មក​ពី​ក្រសួង មហាផ្ទៃ មក​ហៅ​គាត់​ឲ្យ​ទៅ​បំភ្លឺ​រឿង​ទំនាស់​នេះ​នៅ ភ្នំពេញ ហើយ​ថា បើ​គាត់​មិន​ទៅ​ទេ គេ​នឹង​មក​ចាប់​ខ្លួន។

លោក ណាក់ និយាយ​ថា៖ «គេ​ជិះ​ឡាន​ម៉ាក​កាមរី ស៊េរី ៩៦ ពណ៌​ស ពាក់​ស្លាក​លេខ ភ្នំពេញ 2P-1596 មក​ប្រាប់​ថា ខាង​សមត្ថកិច្ច​ឲ្យ​មក​ហៅ​ខ្ញុំ​គេ​បង្ហាញ​លិខិត​ឲ្យ​ខ្ញុំ​មើល​ដែរ​តែ​ខ្ញុំ​មិន​ចេះ​អក្សរ​មិន​ដឹង​ថា លិខិត​នោះ​និយាយ​ពី​អ្វី​ទេ ហើយ បន្ទាប់​មក​គេ​ថត​ផ្ទះ​និង ថត​រូប​ខ្ញុំ​ទៀត»។

លោក យឹម ឌឿន មេភូមិ ដំណាក់​អម្ពិល ឲ្យ​ដឹង​ដែរ​ថា លោក​ត្រូវ​បាន​គេ​ប្តឹង​មែន តែ​រឿង​ហៅ​ទៅ ភ្នំពេញ លោក​មិន​ទាន់​ដឹង​ទេ ខណៈ​ដែល​លោក​ត្រូវ​ជាប់​បណ្តឹង​ថា បាន​ចូល​រួម​ជាមួយ​ប្រជា​ពលរដ្ឋ។

លោក សាន សុផាត ចៅក្រម​សាលា​ដំបូង ខេត្ត​កំពង់ឆ្នាំង ដែល​រង​ការ​ចោទ​នេះ​បាន​ប្រាប់​ពី​ម្សិលមិញ​ថា មាន​ជន​ពីរ​នាក់​ដែល​រាប់​ទាំង​មេភូមិ​ផង ដែល​បាន​ចោទ​លោក​នោះ គឺជា​ការ​មួល​បង្កាច់​ទាំង​ស្រុង​តែ​ម្តង ពីព្រោះ​លោក​មិន​ពាក់ព័ន្ធ​ទេ។

លោក​បញ្ជាក់​ថា៖ «ឥឡូវ​ខ្ញុំ​ចាត់​ការ​តែ​ទៅ​តាម​ច្បាប់​ទេ។ តែ​អ្នក​នោះ​មាន​ទាំង​ខាង​ក្រសួង មហាផ្ទៃ កោះ​ហៅ​ខាង​អំពើ​ពុករលួយ និង​ខាង​ប៉េអឹម​ខេត្ត​ហៅ​ផង»។

គួរ​រំឭក​ថា តាម​ប្រជា​ពលរដ្ឋ​ក្នុង ភូមិ​ដំណាក់​អម្ពិល ក្នុង ស្រុក​ទឹកផុស ខេត្ត​កំពង់ឆ្នាំង បាន​អះអាង​កាល​ពី ខែ​កុម្ភៈ ថា លោក សាន សុផាត ចៅក្រម​សាលា​ដំបូង ខេត្ត​កំពង់ឆ្នាំង និង​ឈ្មោះ ហែម តារា ដែល​ថា គាត់​ជា​មេធាវី​រួម​អង្គរក្ស​ម្នាក់​ទៀត​បាន​មក​គំរាម​ពួក​គាត់​ឲ្យ​រុះរើ​ផ្ទះ​ចេញ និង​គំរាម​ចាប់​ពួក​គាត់​ដាក់​គុក​ផង ដោយ​បាន​ចោទ​ពួក​គាត់​ថា នាំ​គ្នា​មក​រស់​នៅ​លើ​ដី​ជា​កម្មសិទ្ធិ​ពួក​គេ ដែល​តាម​ពិត​ជា​ដី​ចំណែក​ផ្លូវ​ដែក​ស្ថិត​ក្នុង​រ៉ា​រថភ្លើង​ក្តុល នៅ​ក្នុង ស្រុក​ទឹកផុស៕

ព័ត៌មានថ្មីៗ