លោក នាយករដ្ឋមន្ត្រី ហ៊ុន សែន ក្នុងកម្មវិធីនៅខេត្តកោះកុងកាលពីម្សិលមិញ។ ហ្វេសប៊ុក SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានឲ្យមេធាវីរបស់លោក សិក្សាដើម្បីដក់ពាក្យប្ដឹងអ្នកនយោបាយប្រឆាំងម្នាក់ពាក់ព័ន្ធនឹងការប្រមាថជីវិតលោកតាមបណ្ដាញសង្គមហ្វេសប៊ុកចំនួន ៣២ ដង ដោយទាមទារសំណង ២ លានដុល្លារ ជាសារព្រមានដែលលោកទំនងជាសំដៅលើ សោ ចាន់ដេត អតីតសមាជិកព្រឹទ្ធសភាគណបក្ស សម រង្ស៊ី។
ការថ្លែងរបស់លោក ហ៊ុន សែន យ៉ាងដូច្នេះ បានធ្វើឡើងកាលពីម្សិលមិញខណៈលោកជួបសំណេះសំណាលជាមួយកម្មករ កម្មការិនីជាង ១៣ ០០០ នាក់ នៅតំបន់សេដ្ឋកិច្ចពិសេសខេត្តកោះកុង ក្នុងឃុំប៉ាក់ខ្លង ស្រុកមណ្ឌលសីមា ខេត្តកោះកុង។
លោកបានថ្លែងថា៖ «ឥឡូវហ្នឹងគឺថា មានជាង ៣០ ដែលអាហ្អែងបង្ហោះប្រមាថជីវិតអញ ៣២។ អ៊ីចឹងបើវាចេញមកថ្ងៃហ្នឹងទៀតបានការយើងទៀតហើយ។ប្រមូលធ្វើជាវត្ថុតាង រឹប (អូស) ទ្រព្យសម្បត្តិហ្អែងនៅក្នុងស្រុក។ ទារមិនតិចជាង ២ លានដុល្លារទេប្រាប់ឲ្យហើយដើម្បីកុំឲ្យវាឈ្លើយ។ និយាយឡើង អាផូស្តចុងក្រោយទំនាយលោក ហ៊ុន សែន ចំកន្លែងកំបុតក។ កំបុតកអាហ្អែងមិនកំបុត។ ប៉ុន្តែអត់ទេ ជូនសារទៅប្រាប់អាហ្អែងមុន ហើយប្រាប់ទៅខេត្តនោះឲ្យមើលទ្រព្យសម្បត្តិវានៅត្រង់ណា»។
.jpg)
លោកបន្តថា៖ «តែកាត់រួចហើយ គ្មានទេ អញរឹប រួចហើយយកអាហ្នឹងទៅចែកកុមារកំព្រា។ កុំឲ្យវាព្រហើន អាងរត់ទៅនៅក្រៅស្រុកបានអានេះនៅក្នុងស្រុកអត់ហ៊ានទេ ដល់ទៅនៅក្រៅស្រុកប្រមាថជីវិតឯងរហូត។ ប្រមាថជីវិតហ្នឹង ដាក់អាហ្អែងនៅស្ងៀមៗមានអី អានេះចូលអន្ទាក់តើ។ ដល់ចូលអន្ទាក់គ្រឹប ដាក់គ្រឹបនៅត្រង់ហ្នឹង។ អាហ្នឹងមុខវាកំពុងតាមហើយ ឥឡូវកំពុងតាមស្ដាប់»។
លោកបន្តទៀតថា៖ «ថ្ងៃនេះចាប់ពីពេលនេះទៅ ទារអាហ្អែងខ្លាំងៗកុំឲ្យខូចពេក។ធ្វើអីមិនកើតបន់ឲ្យគេងាប់ៗ។ឥឡូវយើងគិតមើល បើនយោបាយបន់ឲ្យគេងាប់ បន់ឲ្យគេគ្រោះថ្នាក់ អ៊ីចឹងថា តើធ្វើនយោបាយដើម្បីរួបរួមឬដើម្បីស្អី? អ៊ីចឹងបានឥឡូវខ្ញុំអត់វាមិនបានគឺថា ឲ្យតែមានរឿងបបួលស្បថតែម្ដង ស្បថដាក់ជីវិត ព្រោះអាហ្អែងនិយាយមិនទៀង ប៉ុន្តែអត់ហ៊ានទេ អត់ហ៊ានស្បថដាច់ខាតពួកនេះ ព្រោះអាមនុស្សខូចអត់ហ៊ានស្បថទេ»។
លោក គី តិច មេធាវីតំណាងរបស់លោកនាយករដ្ឋមន្ត្រីបានបដិសេធធ្វើអត្ថាធិប្បាយដោយលោកថា កំពុងសិក្សាស្រាវជ្រាវលើករណីនេះនៅឡើយ។
កាលពីដើមខែកុម្ភៈ លោកនាយករដ្ឋមន្ត្រី ក៏បានលើកឡើងម្ដងរួចមកហើយថា អ្នកដែលប្រមាថជីវិតលោក ដោយបន់ឲ្យលោកស្លាប់នោះកំពុងរស់នៅក្នុងប្រទេស កាណាដា។
ការលើកឡើងបែបនេះអាចបញ្ជាក់បានថា លោកសំដៅទៅលើលោក សោ ចាន់ដេត អតីតសមាជិកព្រឹទ្ធសភានៅអាណត្តិមុនពីកូតាគណបក្ស សម រង្ស៊ី។ លោក សោ ចាន់ដេត ដែលមានលំនៅឋាននៅខេត្តបាត់ដំបង បច្ចុប្បន្នកំពុងរស់នៅប្រទេស កាណាដា។ លោកក៏ជាមនុស្សម្នាក់ក្នុងចំណោមអ្នកជាប់បម្រាមនយោបាយដែលនៅសល់ ១១៤ នាក់ផងដែរ។
កាលពីថ្ងៃទី ៩ ខែ មីនា លោក ចាន់ដេត បានបង្ហោះសារមួយមានភាពស៊ីចង្វាក់នឹងការថ្លែងរបស់លោក ហ៊ុន សែន ដោយសរសេរថា៖ «ឆ្នាំនេះលោក ហ៊ុន សែន ជួបគ្រោះកំបុតក»។
លោកបានរៀបរាប់ថា លោក ហ៊ុន សែន ជួបនឹងគ្រោះសង្ឃរា ៨ ទិស រួមមាន ការដក EBA និង GSP រឿងសិទ្ធិមនុស្ស កិច្ចព្រមព្រៀងទីក្រុងប៉ារីស មូលដ្ឋានយោធាចិន វិបត្តិផ្ទៃក្នុងដោយដៃម្ខាងចាប់ចិន និងម្ខាងទៀតចាប់វៀតណាម កម្លាំងប្រឆាំងរបស់មហាជន និងជំងឺប្រចាំកាយ។
លោកសរសេរថា៖ «សង្ឃរានយោបាយទាំង ៨ ទិសខាងលើនេះនឹងវាយបក់សង្គ្រុបផ្ដាច់ផ្ដិលជីវិតនយោបាយលោក ហ៊ុន សែន យ៉ាងឆាប់រហ័សបំផុតក្នុងឆ្នាំ ២០១៩ នេះ»។
កាលពីម្សិលមិញ លោកក៏បានបង្ហោះសារមួយទៀតដោយសរសេរថា៖ «តើរដ្ឋមន្ត្រីនៃរបបលោក ហ៊ុន សែន ណាខ្លះដែលលោក ហ៊ុន សែន ខ្លួនឯងបានព្រលយពាក្យថា "បន់ឲ្យលោក ហ៊ុន សែន ស្លាប់"?។
ចំណែកសារដែលសរសេរកាលពីថ្ងៃទី ២៧ កុម្ភៈ មានខ្លឹមសារថា វៀតណាមនិងលោក ហ៊ុន សែន បំពេញភាពស្របច្បាប់រឿងព្រំដែនមុននឹងលោក ហ៊ុន សែន និងបក្ខពួកអស់ជីវិត។ ចំណែកសារដែលលោកផុសកាលពីថ្ងៃទី ២២ កុម្ភៈ សរសេរថា ពាក្យថា សម រង្ស៊ី កឹម សុខា ជាមនុស្សតែមួយធ្វើឲ្យជំងឺលោក ហ៊ុន សែន រើកាន់តែខ្លាំង។
ប៉ុន្តែកាលពីម្សិលមិញ លោក សោ ចាន់ដេត មិនអាចទាក់ទងសុំអត្ថាធិប្បាយបន្ថែមបានទេ។ លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាយល់ឃើញថា ការធ្វើនយោបាយបន់ឲ្យគេស្លាប់បែបនេះ គឺជានយោបាយអសីលធម៌។
លោកថា៖ «មជ្ឈដ្ឋានអ្នកប្រឆាំងមួយចំនួន គាត់អត់មានយុទ្ធសាស្ត្រអ្វីទេ ក្រៅតែពីបន់ស្រន់ឲ្យសម្ដេច ហ៊ុន សែន ដែលគេហៅថា ជាដៃគូប្រកួតប្រជែងនយោបាយដ៏ខ្លាំងមួយនៅក្នុងសង្វៀននយោបាយកម្ពុជាស្លាប់គឺគាត់ចង់ឲ្យអ្នកនយោបាយខ្លាំងមួយស្លាប់ដើម្បីគាត់ងាយស្រួលប្រកួតប្រជែង។ឥរិយាបថឬយុទ្ធសាស្ត្រនយោបាយបែបនេះគឺជាយុទ្ធសាស្ត្រអគុណធម៌ អសីលធម៌ និងមនុស្សដែលមានភាពខ្សោយបំផុតក្នុងនយោបាយ»។
លោកថ្លែងបន្តថា ការប្ដឹងនេះក៏ជាសញ្ញាមួយកុំឲ្យអ្នកប្រឆាំងប្រើសេរីភាពជ្រុលហួសពីគុណធម៌ សីលធម៌នៃមនុស្សជាតិ។ លោកថា លើលោកនេះមិនមានការប្រកួតប្រជែងនយោបាយណាបន់ឲ្យគូប្រកួតស្លាប់ទេ។
លោក ឡៅ ម៉ុងហៃ អ្នកវិភាគនយោបាយយល់ឃើញថា ជាធម្មតា សម្តីរបស់លោកនាយករដ្ឋមន្ត្រីគឺជាច្បាប់ «ប៉ុន្តែយើងរង់ចាំមើលសិនថា តើមេធាវីរបស់គាត់នឹងប្រើច្បាប់មួយណាដើម្បីចោទប្រកាន់អ្នកដែលបន់ឲ្យលោកស្លាប់»។
លោកបានបន្តថា៖ «ប៉ុន្តែនេះ (ការបន់ឲ្យស្លាប់) បង្ហាញពីការធ្លាក់ចុះនៃសីលធម៌នៅក្នុងសង្គមរបស់យើង និងការស្អប់គុំកួនរបស់មនុស្សណាម្នាក់ទៅលើគាត់»៕
