ភ្នំពេញៈ លោកនាយករដ្ឋមន្ត្រី ហ៊ុន សែន បានបញ្ជាឲ្យអាជ្ញាធរពាក់ព័ន្ធចុះស្រាវជ្រាវ និងដោះស្រាយករណីមិនប្រក្រតីនៃរឿងវិវាទដីធ្លីចំនួន ៤ ករណីផ្សេងគ្នា បន្ទាប់ពីទទួលបានពាក្យបណ្តឹងពីគណបក្សខ្មែរក្រោក ដែលចុះស្រាវជ្រាវពីករណីទាំងនេះដល់ទីកន្លែងមានវិវាទ។
លិខិតចំនួន ៤ ច្បាប់ដាច់ដោយឡែកពីគ្នាដោយមានចុះហត្ថលេខាលោក ហ៊ីង ថូរ៉ាក់ស៊ី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជារដ្ឋលេខាធិការប្រចាំការចុះថ្ងៃទី ១៧ ខែមករា បានឲ្យដឹងថា ការចេញលិខិតនេះដោយមានចំណារពីលោកនាយករដ្ឋមន្ត្រី ក្រោយពីបានពិនិត្យពាក្យបណ្តឹង និងរបាយការណ៍សង្ខេបដែលគណបក្សខ្មែរក្រោកបានដាក់ជូនកាលពីពេលកន្លងទៅ។
លោក ហ៊ីង ថូរ៉ាក់ស៊ី បានលើកឡើងក្នុងលិខិតទាំងនោះថា រដ្ឋាភិបាលបានឯកភាពប្រគល់ជូនរដ្ឋបាលខេត្តកំពតបន្តដោះស្រាយ និងរាយការណ៍ជូនជុំវិញករណីដែលគណបក្សខ្មែរក្រោកបានរកឃើញភាពមិនប្រក្រតីចំពោះបុគ្គលមានតួនាទីជាអាជ្ញាធរបានរំលោភយកដីប្រជាពលរដ្ឋ ៦ គ្រួសារ មានទំហំ ៥ ហិកតា ស្ថិតក្នុងភូមិដុះផ្តៅ ឃុំត្រពាំងភ្លាំង ស្រុកឈូក។
បន្ថែមពីនេះ លោកក៏បានលើកឡើងដែរថា រដ្ឋាភិបាលក៏បានបញ្ជាឲ្យរដ្ឋបាលរាជធានីភ្នំពេញបន្តដោះស្រាយជុំវិញករណីមិនប្រក្រតីដែលរដ្ឋបាលរាជធានីបានយកដីប្រជាពលរដ្ឋចំនួន ៨ គ្រួសារ ស្ថិតក្នុងភូមិស្ពានខ្ពស់សង្កាត់គីឡូម៉ែត្រលេខ ៦ ខណ្ឌឫស្សីកែវទៅពុះឡូត៍លក់ធ្វើជាអាជីវកម្ម ដើម្បីផលប្រយោជន៍ផ្ទាល់ខ្លួន។
ក្នុងភាពមិនប្រក្រតីនេះលោក ថូរ៉ាក់ស៊ី បញ្ជាក់ថាគណបក្សខ្មែរក្រោកបានរកឃើញថា រដ្ឋបាលរាជធានីភ្នំពេញបានបំពានចំណារណែនាំរបស់លោកនាយករដ្ឋមន្ត្រី និងរំលោភបទបញ្ជារបស់ក្រសួងមហាផ្ទៃ ដូច្នេះត្រូវតែមានការសើរើ និងចាត់វិធានការតាមផ្លូវច្បាប់។
ក្រៅពីបញ្ជាដល់ស្ថាប័នដែនដីទាំង ២ នេះលោក ហ៊ីង ថូរ៉ាក់ស៊ី បញ្ជាក់នៅក្នុងលិខិតទាំងនោះថា ចំពោះបញ្ហា ២ ទៀតគឺតម្រូវឲ្យលោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បន្តដោះស្រាយភាពមិនប្រក្រតីជុំវិញបញ្ហាដីធ្លីនៅក្នុងខេត្តកំពង់ស្ពឺ និងខេត្តព្រះសីហនុ។
លិខិតទាំងនោះសរសេរថា៖ «សូមជម្រាបជូនឯកឧត្តមថា ករណីដែលបានលើកឡើងដោយប្រធានប្រតិភូគណបក្សខ្មែរក្រោកស្តីពីភាពមិនប្រក្រតី ដែលមានលោក ចែម សារីម និងលោក ប៊ូ សុខគីម យកដីសហគមន៍ អ្នកដាំអំពៅស្ថិតនៅចំណុចវាលកំរៀង ភូមិតាំងស្រឹង ឃុំសង្កែសាទប ស្រុកឱរ៉ាល ខេត្តកំពង់ស្ពឺលក់ឲ្យឈ្មួញ និងករណីជម្លោះដីធ្លីនៅភូមិអូរត្រជាក់ចិត្ត ឃុំសំរុង ស្រុកព្រៃបន់ រវាងប្រជាពលរដ្ឋ ៤៥ គ្រួសារជាមួយក្រុមហ៊ុនឋានសួគ៌ចំកាត់។ រាជរដ្ឋាភិបាលបានឯកភាពប្រគល់ជូនអាជ្ញាធរថ្នាក់ជាតិដោះស្រាយទំនាស់ដីធ្លីធ្វើការពិនិត្យដោះស្រាយ»។
លោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់បានបដិសេធធ្វើអត្ថាធិប្បាយជុំវិញករណីទាំងនេះដោយលើកឡើងថា លោកកំពុងជាប់ប្រជុំ។
លោក ម៉េត មាសភក្តី អ្នកនាំពាក្យសាលារាជធានីភ្នំពេញថ្លែងកាលពីថ្ងៃអង្គារថា លោកនឹងស្រាវជ្រាវជុំវិញករណីនៃការចោទប្រកាន់រដ្ឋបាលរាជធានីភ្នំពេញ រំលោភដីរបស់ប្រជាពលរដ្ឋនេះ។ លោកបញ្ជាក់ថា៖ «ខ្ញុំសុំពេលសួរទៅគណៈកម្មាធិការដោះស្រាយវិវាទជាមុនសិន ដើម្បីទទួលបានព័ត៌មានច្បាស់លាស់ព្រោះតែភារកិច្ចនេះមានការទទួលខុសត្រូវច្រើនផ្នែក។ កិច្ចការនេះ យើងត្រូវការព័ត៌មានឲ្យបានច្បាស់មុននឹងយើងឆ្លើយតប»។
ចំណែកលោក ជាវ តាយ អភិបាលខេត្តកំពតក៏បានប្រាប់ភ្នំពេញប៉ុស្តិ៍កាលពីថ្ងៃអង្គារដែរថា នៅពេលទទួលបានលិខិតនេះ រដ្ឋបាលខេត្តនឹងបង្កើតគណៈកម្មការមួយ ដើម្បីចុះធ្វើការស្រាវជ្រាវជាក់ស្តែងលើទីតាំងដីជម្លោះទាំងនោះ។
លោកបន្តថាការបង្កើតគណៈកម្មការនេះក៏ដើម្បីឲ្យដឹងថា ករណីនេះមានដំណើរដើមទងយ៉ាងណា និងជាប់ពាក់ព័ន្ធនឹងបញ្ហាអ្វីខ្លះ? លោកបានបញ្ជាក់ថា៖ «យើងមិនទាន់ដឹងច្បាស់ដែរថា ករណីនេះយ៉ាងម៉េចជាករណីថ្មី ឬចាស់ដែលយើងត្រូវសិក្សាសិនដើម្បីឲ្យដឹងច្បាស់ ងាយស្រួលដោះស្រាយឲ្យចំគោលដៅ ព្រោះវាមានរឿងរ៉ាវច្រើន ដែលយើងនឹងពិនិត្យលើចំណារឲ្យបានច្បាស់ ថារឿងរ៉ាវមួយណា?»។
លោក សុខ សុវណ្ណវឌ្ឍនាសាប៊ុង ប្រធានគណបក្សខ្មែរក្រោកថ្លែងកាលពីថ្ងៃអង្គារថា វាជារឿងល្អ បន្ទាប់ពីនាយករដ្ឋមន្ត្រីបានទទួលរបាយការណ៍ហើយ និងបានបញ្ជូនទៅអាជ្ញាធរមានសមត្ថកិច្ចចំៗឲ្យមានការដោះស្រាយ។ លោកបញ្ជាក់ថា ក្នុងនាមលោកជាអ្នកចុះស៊ើបអង្កេតករណីទាំងនេះ លោកនឹងបន្តឃ្លាំមើលបន្ថែមទៀត ចំពោះចំណាត់ការនានារបស់មន្ត្រីដែលទទួលបានភារកិច្ចពីលោកនាយករដ្ឋមន្ត្រី។
លោកនិយាយថា៖ «តាមវិធានការនេះគឺស្របទៅតាមច្បាប់ហើយ ដែលនាយករដ្ឋមន្ត្រីចាត់ការតាមកិច្ចអន្តរាគមន៍ពីឧត្តមក្រុមប្រឹក្សាពិគ្រោះ និងផ្តល់យោបល់គណបក្សខ្មែរក្រោក។ តួនាទីយើងគឺតាមដានបន្តការដោះស្រាយរបស់សមត្ថកិច្ចទៅលើ សជណ ដែលរដ្ឋាភិបាលបានចេញ ក្រោមការស្រាវជ្រាវរបស់យើងប្រកបដោយសុចរិតភាពតម្លាភាពដែរអត់?»៕