ភ្នំពេញៈ លោកនាយករដ្ឋមន្ត្រី ហ៊ុន សែន ប្រកាសដាក់ឱ្យប្រើប្រាស់បណ្តោះអាសន្ននូវការធ្វើចរាចរណ៍ផ្លូវក្រោមដី តភ្ជាប់ចរាចរណ៍ពីផ្លូវជាតិលេខ ៤ ទៅមហាវិថីសហព័ន្ធរុស្ស៊ី ត្រង់រង្វង់មូលចោមចៅ ដើម្បីកាត់បន្ថយការកកស្ទះចរាចរណ៍ បន្ទាប់ពីមានការស្នើសុំពីលោក ឃួង ស្រេង អភិបាលរាជធានីភ្នំពេញ។
លោកនាយករដ្ឋមន្ត្រីបានប្រកាសយ៉ាងដូច្នេះ ក្នុងពេលលោកប្រកាសបើកការដ្ឋានសាងសង់ស្ពានបេតុងខ្សែកាប្លិ៍ ឆ្លងកាត់ទន្លេបាសាក់ តភ្ជាប់ពីទីក្រុងកោះពេជ្រទៅកាន់កោះនរា និងពីកោះនរា ឆ្ពោះទៅផ្លូវជាតិលេខ ១ ក្នុងភូមិសាស្ត្រសង្កាត់និរោធ ខណ្ឌច្បារអំពៅកាលពីម្សិលមិញ។ លោកប្រកាសយ៉ាងដូច្នេះថា៖ «ប្រកាសដាក់ឱ្យប្រើប្រាស់ជាបណ្តោះអាសន្នផ្លូវក្រោមដីប្រវែង ៤៨៨ ម៉ែត្រ»។
លោក ឃួង ស្រេង អភិបាលរាជធានីភ្នំពេញបានថ្លែងក្នុងឱកាសនោះថា ដោយសារតែស្ថានភាពនៃការកកស្ទះនៅចំណុចរង្វង់មូលចោមចៅ មានការលំបាកកាន់តែខ្លាំង ខណៈផ្នែកខ្លះនៃស្ពានកំពុងបន្តការសាងសង់នៅឡើយ ដូច្នេះមានតែការបើកឱ្យចរាចរណ៍នៃផ្លូវក្រោមដីដែលបានសាងសង់រួចរាល់ជាបណ្តោះអាសន្នប៉ុណ្ណោះ ទើបអាចជួយសម្រួលបាននូវការកកស្ទះចរាចរណ៍។
លោកបញ្ជាក់ថា គម្រោងស្ថាបនាស្ពានអាកាស និងផ្លូវក្រោមដីចោមចៅ ដែលបានបើកការដ្ឋានកាលពីថ្ងៃ ២៩ ខែមិថុនា ឆ្នាំ ២០១៨ ហើយបច្ចុប្បន្នការស្ថាបនាផ្លូវក្រោមដីបានអនុវត្តរួចរាល់។
លោកបញ្ជាក់ថា៖ «ខ្ញុំបាទសូមគោរពអនុញ្ញាតស្នើសុំសម្រេចដ៏ខ្ពង់ខ្ពស់ពីសម្តេចតេជោបើកដំណើរការជូនប្រជាពលរដ្ឋជាបណ្តោះអាសន្ន ដើម្បីជួយសម្រួលដល់លំហូរចរាចរណ៍ និងកាត់បន្ថយការកកស្ទះចរាចរណ៍នៅតំបន់នេះរហូតដល់ពេលការដ្ឋានត្រូវបញ្ចប់ និងសម្ពោធដាក់ប្រើប្រាស់ជាផ្លូវការនាពេលខាងមុខ»។
ក្រៅពីនេះលោក ស្រេង ក៏អំពាវនាវដល់ប្រជាពលរដ្ឋដែលរស់នៅក្នុងតំបន់នេះ និងអ្នកធ្វើដំណើរឆ្លងកាត់ចូលរួមសហការផ្តល់ភាពអធ្យាស្រ័យយោគយល់ និងភាពអត់ធ្មត់ខ្ពស់ចំពោះផលប៉ះពាល់ដែលនឹងរំខានដែលអាចកើតមានឡើងដោយការដ្ឋានស្ថាបនាផ្លូវនានាផងដែរ។
ស្ពានអាកាស និងផ្លូវក្រោមដីចោមចៅជាគម្រោងរបស់រាជរដ្ឋាភិបាលកម្ពុជា តាមរយៈរដ្ឋបាលរាជធានី ភ្នំពេញដោយទទួលម៉ៅការសាងសង់ដោយក្រុមហ៊ុនវិនិយោគទុនអាណិកជនកម្ពុជា (OCIC) ដោយចាប់ដំណើរការសាងសង់ក្នុងរយៈពេល ៣០ ខែ និងចំណាយថវិកាសាងសង់ចំនួន ២២ លាន ដុល្លារ។
មន្ទីរសាធារណការ និងដឹកជញ្ជូនរាជធានីភ្នំពេញបានប្រកាសថា ការសាងសង់នេះគឺត្រូវបានបែងចែកជា ៣ ផ្នែកគឺស្ពានទី ១ ជាស្ពានអាកាសមេតភ្ជាប់ចរាចរណ៍ពីមហាវិថីសហព័ន្ធរុស្ស៊ីមកផ្លូវជាតិលេខ ៣ មានប្រវែងសរុប ៤០៨ ម៉ែត្រ ទទឹង ១៥,៨ ម៉ែត្រដែលមានចរាចរណ៍ ២ គន្លងទៅ និង ២ គន្លងមកជម្រាលស្ពាន ៤,៥ ម៉ែត្រ និងមានកម្ពស់អតិបរមាដែលអាចចរាចរណ៍ក្រោមស្ពានមាន ៥,៥ ម៉ែត្រ។
ចំពោះស្ពានទី ២ បំបែកចេញពីស្ពានអាកាសមេ បត់ឆ្វេងតភ្ជាប់ចរាចរណ៍ពីមហាវិថីសហព័ន្ធរុស្ស៊ីឆ្ពោះទៅផ្លូវវេងស្រេងសម្រាប់ចរាចរណ៍ ១ ទិស ដែលមាន ១ គន្លងរថយន្ត និង ១ គន្លងទោចក្រយានយន្តមានប្រវែងសរុប ២០២ ម៉ែត្រ (ស្ពានអាកាស ប្រវែង ៤០ ម៉ែត្រ ផ្លូវក្រោមដី ប្រវែង ១១៨ ម៉ែត្រ និងផ្លូវលើដីប្រវែង ៤៤ ម៉ែត្រ) ទទឹង ៥,២៥ ម៉ែត្រ។
ចំណែកស្ពានទី ៣ ជាស្ពានកោងបត់ឆ្វេងតភ្ជាប់ចរាចរណ៍ពីផ្លូវវេងស្រេង មកផ្លូវជាតិលេខ ៣ មានប្រវែងសរុប ២០៦ ម៉ែត្រ (ស្ពានអាកាសប្រវែង ៦០ ម៉ែត្រផ្លូវក្រោមដីប្រវែង ១១៨ ម៉ែត្រ និងផ្លូវលើដីប្រវែង ២៨ ម៉ែត្រ) ទទឹង ៥,២៥ ម៉ែត្រសម្រាប់ចរាចរណ៍ ១ ទិស ដែលមាន ១ គន្លងរថយន្ត និង ១ គន្លងទោចក្រយានយន្ត។ បើតាមមន្ទីរសាធារណការចំពោះផ្លូវក្រោមដី ជាផ្លូវតភ្ជាប់ចរាចរណ៍ពីផ្លូវជាតិលេខ ៤ មកមហាវិថីសហព័ន្ធរុស្ស៊ី ដែលមានប្រវែងសរុបជិត ៥០០ ម៉ែត្រ ទទឹង ៨,៥ ម៉ែត្រ សម្រាប់ចរាចរណ៍ ១ ទិសដែលមាន ២ គន្លងរថយន្ត និង ១ គន្លងទោចក្រយានយន្ត។
លោក គង់ សុវណ្ណ អនុប្រធានក្រុមកម្មវិធីសុវត្ថិភាពចរាចរណ៍សហគមន៍នៃគម្រោងអភិវឌ្ឍន៍ផ្លូវជនបទជំហានទី ២ របស់ក្រសួងអភិវឌ្ឍន៍ជនបទប្រាប់ភ្នំពេញប៉ុស្តិ៍ពីម្សិលមិញថា ការប្រកាសឱ្យប្រើប្រាស់ផ្នែកណាមួយនៃផ្លូវដែលមិនទាន់បានសាងសង់ចប់គឺជាការដោះស្រាយបញ្ហាប្រឈមចំពោះមុខស្របពេលកំណាត់ផ្លូវនេះជួបប្រទះបញ្ហាកកស្ទះចរាចរណ៍យ៉ាងខ្លាំងក្លា។ ស្របពេលប្រកាសដាក់ឱ្យប្រើប្រាស់បណ្តោះអាសន្ននេះលោកជឿថា មន្ត្រីបច្ចេកទេសប្រាកដជាបានត្រៀមលក្ខណៈរួចជាស្រេចជាពិសេសបញ្ហាសុវត្ថិភាពដល់អ្នកដំណើរព្រោះថា បើមានបញ្ហាអ្វីកើតឡើងជាយថាហេតុ នោះគឺជាការទទួលខុសត្រូវរួម៕