សកម្មភាពប្រជ្រៀតគ្នាជិះរថយន្តអំឡុងថ្ងៃបុណ្យភ្ជុំកាលពីឆ្នាំមុន។ ហុង មិនា
ភ្នំពេញៈ លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានណែនាំឲ្យម្ចាស់ប្រព័ន្ធផ្សព្វផ្សាយទាំងអស់ចូលរួមផ្សព្វផ្សាយសារអប់រំអំពីបញ្ហាគ្រឿងញៀន និងគ្រោះថ្នាក់ចរាចរណ៍ក្នុងឱកាសពិធីបុណ្យកាន់បិណ្ឌ និងពិធីបុណ្យភ្ជុំបិណ្ឌប្រពៃណីជាតិចាប់ពីថ្ងៃទី ១៤ ដល់ថ្ងៃទី ២៩ ខែកញ្ញា ឆ្នាំ ២០១៩។
ការណែនាំនេះបានធ្វើឡើងក្នុងសេចក្តីជូនដំណឹងកាលពីម្សិលមិញដោយ ខៀវ កាញារីទ្ធ បានលើកឡើងថាក្នុងឱកាសពិធីបុណ្យនេះបងប្អូនប្រជាពលរដ្ឋនៅទូទាំងប្រទេសនឹងធ្វើដំណើរទៅវត្ត និងទៅស្រុកកំណើត ដើម្បីជួបជុំបងប្អូន និងក្រុមគ្រួសារនៅតាមរាជធានី និងខេត្តនានា។
នៅក្នុងលិខិតនោះលោករដ្ឋមន្ត្រីបានបញ្ជាក់ថា ការផ្សព្វផ្សាយពីសារទាំងនេះនៅតាមកញ្ចក់ទូរទស្សន៍ វិទ្យុ ទស្សនាវដ្តី កាសែត និងតាមប្រព័ន្ធផ្សព្វផ្សាយនេះគឺជាការដាស់តឿនក្រើនរំឭក និងបញ្ជ្រាបនូវការយល់ដឹងដល់ពលរដ្ឋឲ្យមានការយល់ដឹងកាន់តែច្បាស់ពីផលប៉ះពាល់ដែលបង្កឡើងដោយសារគ្រោះថ្នាក់ចរាចរណ៍ និងការប្រើប្រាស់គ្រឿងញៀនដែលកំពុងតែជះឥទ្ធិពលអាក្រក់ដល់សង្គមខ្មែរ។
.jpg)
លោកបានបញ្ជាក់ថា៖ «ចូលរួមកាន់តែសកម្មថែមទៀតក្នុងការការពារខ្លួន ក្រុមគ្រួសារ មិត្តភក្តិ និងសហគមន៍ឱ្យចៀសឆ្ងាយពីការប្រើប្រាស់គ្រឿងញៀន ដែលធ្វើឱ្យប៉ះពាល់ដល់អាយុជីវិត ទ្រព្យសម្បត្តិ និងធ្វើដំណើរដោយមានការប្រុងប្រយ័ត្នខ្ពស់ ជាពិសេសក្នុងឱកាសបុណ្យកាន់បិណ្ឌ និងបុណ្យភ្ជុំបិណ្ឌប្រពៃណីជាតិដែលមានប្រជាពលរដ្ឋធ្វើដំណើរច្រើនកុះករតាមដងផ្លូវ ចៀសវាងការបង្កគ្រោះថ្នាក់ចរាចរណ៍ដែលនាំឱ្យខាតបង់ទ្រព្យសម្បត្តិ និងបាត់បង់អាយុជីវិតរបស់ប្រជាពលរដ្ឋយើង»។
លោក មាស រិទ្ធី អគ្គនាយករងទូរទស្សន៍ហង្សមាសទទួលបន្ទុកផ្នែកព័ត៌មានបានប្រាប់ភ្នំពេញប៉ុស្តិ៍ពីម្សិលមិញថា តាមពិតទៅទូរទស្សន៍ហង្សមាសបានផ្សព្វផ្សាយច្រើនមកហើយចំពោះបញ្ហាទាំងនេះ។ ប៉ុន្តែលោកគាំទ្រចំពោះការជំរុញបន្ថែមរបស់ក្រសួងព័ត៌មាន បើទោះជាមានស្ថាប័នជាច្រើនបានបញ្ជ្រាបនូវសារអប់រំជាបន្តបន្ទាប់តាមរយៈកម្មវិធីរបស់ខ្លួន ប៉ុន្តែក៏នៅមានស្ថាប័នមួយចំនួន អនុវត្តមិនបានល្អនៅឡើយដែរ។
លោកបញ្ជាក់ថា៖ «ប្រសិនបើក្រសួងបន្ថែមមកទៀត យើងកាន់តែបង្កើននូវការផ្សព្វផ្សាយរបស់យើងឲ្យឡើងគុណទ្វេតែម្តង។ ព្រោះខ្ញុំមើលឃើញថា ប្រព័ន្ធផ្សព្វផ្សាយមួយចំនួនបានប្រើប្រាស់បានច្រើនហើយ តែមួយចំនួនបានផ្សព្វផ្សាយដែរ ប៉ុន្តែតិចអត់បានប្រចាំជារៀងរាល់ថ្ងៃ»។
ស្រដៀងគ្នានេះដែរលោក ណុប វី នាយកផ្នែកប្រព័ន្ធផ្សព្វផ្សាយនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យបានថ្លែងថា វាជារឿងប្រសើរ ព្រោះជារួមវាគឺជាការរួមចំណែករបស់ក្រសួងព័ត៌មានក្នុងការត្រួតពិនិត្យ ប្រសិនបើមើលឃើញថា ការផ្សព្វផ្សាយអប់រំទាក់ទងជាមួយនឹងគ្រឿងស្រវឹង និងគ្រឿងញៀនអាចបង្កហានិភ័យដល់សង្គម។ ប៉ុន្តែការអនុវត្តបានកម្រិតណា គឺអាស្រ័យទៅលើប្រព័ន្ធផ្សព្វផ្សាយទាំងនោះ។
យ៉ាងណាក្ដីលោក ណុប វី រំពឹងថាការផ្សព្វផ្សាយអំពីសារអប់រំនឹងជួយកាត់បន្ថយសារដែលនាំឲ្យប៉ះពាល់ដល់សង្គម បើទោះជាវាជារឿងមួយដែលពិបាកក្នុងការកាត់បន្ថយក៏ដោយដូចជា ការផ្សព្វផ្សាយបញ្ហាពីគ្រឿងស្រវឹង ដែលជាប្រភពនៃគ្រោះថ្នាក់ចរាចរណ៍ ហើយវាគឺជាប្រភពចំណូលដ៏ធំរបស់ប្រព័ន្ធផ្សព្វផ្សាយទាំងនោះ។
លោកបានបញ្ជាក់ថា៖ «ស្ថាប័នយើង មិនផ្សព្វផ្សាយទេនូវគ្រឿងស្រវឹង និងបារី សូម្បីតែការផ្សព្វផ្សាយការនាំពលករខ្មែរទៅក្រៅប្រទេសដែលនាំឲ្យរងគ្រោះផ្សេងៗក៏យើងមិនផ្សព្វផ្សាយដែរ។ កន្លងមកយើងធ្លាប់បានធ្វើច្រើនហើយ ពួកយើងក៏មិនទាន់គិតថានៅក្នុងឱកាស (ភ្ជុំបិណ្ឌ) ហ្នឹងនឹងមានយុទ្ធនាការអីនៅឡើយ ព្រោះតែវិសាលភាព និងលទ្ធភាពរបស់យើងក៏នៅមានកម្រិតដែរ។ ក៏ប៉ុន្តែសម្រាប់ស្ថាប័នផ្សព្វផ្សាយនៅក្នុងស្រុកខ្មែរមានច្រើនណាស់ ខ្ញុំគិតថាគួរតែចូលរួមឲ្យបានច្រើន ហើយគួរតែចូលរួមកាត់បន្ថយនូវការផ្សាយពាណិជ្ជកម្មស្រា បារី ឬអាចបញ្ឈប់តែម្តង»៕
