កោះកុងៈ លោក ពេជ្រ ស្រស់ ប្រធានគណបក្សយុវជនកម្ពុជាបានអះអាងថា ក្រុមការងាររបស់លោកកំពុងចុះស៊ើបអង្កេតករណីឈ្មួញដីឈ្មោះ ទុន ដៀត ដែលជាមន្ត្រីយោធាពាក់ផ្កាយ២ បានលួចបោះបង្គោល និងបូមខ្សាច់លុបឆ្នេរ ស្ថិតនៅភូមិស្មាច់ងាម សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង។
លោក ស្រស់ បានប្រាប់ភ្នំពេញប៉ុស្តិ៍កាលពីថ្ងៃពុធថា ក្រោយទទួលបានពាក្យបណ្តឹងពីប្រជាពលរដ្ឋក្នុងតំបន់នេះលោកបានឲ្យមន្ត្រីរបស់លោកចុះទៅស៊ើបអង្កេត ដើម្បីឲ្យប្រាកដថា ករណីលួចបោះបង្គោល និងបូមខ្សាច់លុបឆ្នេរក្នុងតំបន់នេះ ជាការពិតឬយ៉ាងណា។
លោក ស្រស់ បានបន្តថា បើករណីនេះពិតជាមានមែននោះលោកនឹងចុះទៅដោយផ្ទាល់ ដើម្បីជួបជាមួយអភិបាលខេត្តកោះកុងដើម្បីស្នើឲ្យចាត់វិធានការចំពោះបទល្មើសនេះ។
លោកបន្តថា៖ «យើងនឹងសុំបំភ្លឺពីអភិបាលខេត្ត ព្រោះកាលណាតែមានការចាក់ដីលើទីសាធារណៈ មិនមែនចេះតែអាចចាក់បានតាមចិត្តទេ ទោះបីអ្នកហ្នឹងមានអំណាចប៉ុនណាក៏ដោយ ហើយបើសិនជាមានការចាក់បែបនេះមែន តើនៅក្នុងរូបភាពអ្វី? តើក្នុងរូបភាពអភិវឌ្ឍន៍តំបន់ឆ្នេរ ឬទទួលសិទ្ធិអាជីវកម្មដែលយើងចង់ដឹងឲ្យច្បាស់? ព្រោះការចាក់ដីនេះតើមានផលប៉ះពាល់ទ្រព្យសម្បត្តិជាតិដែរឬទេ»។
ករណីការបោះបង្គោល និងចាក់ដីខ្សាច់លុបឆ្នេរនេះលោក ស្រស់ សន្និដ្ឋានដំបូងថា អាចនឹងមានការបើកដៃពីចៅសង្កាត់ និងអាជ្ញាធរជំនាញនៅក្នុងខេត្ត ទើបបានជាមានការចាក់ដីយ៉ាងដូច្នេះ។ លោកបន្តថា៖ «ប៉ុន្តែផ្ទុយទៅវិញ ខ្លាចតែអាជ្ញាធរពាក់ព័ន្ធមានការចូលរួមបើកដៃឲ្យមានការចាក់នេះ។ ខ្ញុំនឹងបន្តតាមដានរឿងហ្នឹងទៀតតាមរូបភាពដែលប្រជាពលរដ្ឋអះអាងពិតជាមានការបោះបង្គោល ចាក់វាតទីយកដែនសមុទ្រពិតមែន»។
លោកស្រី មិថុនា ភូថង អភិបាលខេត្តកោះកុងមិនអាចសុំការបញ្ជាក់ជុំវិញករណីនេះបានទេ ដោយសារតែទូរស័ព្ទរបស់លោកស្រីមិនមានអ្នកទទួល។ ចំណែក លោក ទុន ដៀត ដែលលោក ពេជ្រ ស្រស់ អះអាងថា មានតួនាទីជាប្រធានច្រកទំនាក់ទំនងព្រំដែនកម្ពុជា- ថៃដែលរងការចោទប្រកាន់មិនអាចរកប្រភពដើម្បីសុំការបញ្ជាក់បានទេ។
ប៉ុន្តែបើតាមលោក នាម យ៉ុង ចៅសង្កាត់ស្មាច់មានជ័យបានបដិសេធចំពោះការចោទប្រកាន់ថា អាជ្ញាធរដែនដីបានឃុបឃិតជាមួយលោក ទុន ដៀត ឲ្យមានការបោះបង្គោល និងបូមខ្សាច់លុបឆ្នេរក្នុងតំបន់នេះ។
លោកអះអាងពីថ្ងៃពុធថា ដីនេះគឺជាកម្មសិទ្ធិរបស់បុគ្គលឈ្មោះ ទុន ដៀត ដែលជាប្រធានច្រកទំនាក់ទំនងព្រំដែនកម្ពុជា-ថៃ ជាយូរឆ្នាំមកហើយ ហើយសកម្មភាពចាក់ខ្សាច់នេះទើបតែត្រូវបានធ្វើក្នុងអំឡុង ១ សប្តាហ៍នេះប៉ុណ្ណោះ ព្រោះទីតាំងនេះគឺជាកន្លែងស្តុកខ្សាច់ ដែលដឹកចេញពីកប៉ាលសម្រាប់លក់នៅលើទីផ្សារ។
លោកអះអាងបន្តថា ចំពោះបង្គោលដែលបោះចូលសមុទ្រនោះគឺបានបោះចូលឡើងជាង ១ ឆ្នាំមកហើយ ដើម្បីបំពាក់សំណាញ់ការពារសំរាម។
លោកបញ្ជាក់ថា៖ «មុនដំបូងបំផុតហ្នឹងគឺចៅហ្វាយស្រុកហ្នឹង គេឲ្យគាត់ (ទុន ដៀត) ដូរទីតាំង ស្តុកដីខ្សាច់សម្រាប់ទុកលក់ហ្នឹងពីផ្ទះរបស់គាត់ នៅដងទង់ហ្នឹងមកដីនៅមាត់សមុទ្រដែលជាកន្លែងដីគាត់ស្ថិតនៅស្មាច់មានជ័យរបស់ខ្ញុំគ្រប់គ្រងនេះ ហើយដីនេះក៏ដីគាត់ដែរ។ ដោយសារតែការបូមខ្សាច់ចេញពីកប៉ាលហ្នឹង ទុយោគាត់វាខ្លី វាក៏ទៅក្បែរទឹកបន្តិច ហើយខាងកាសែតណាមិនដឹង គេយល់ច្រឡំទៅ»។
បើតាមលោក នាម យ៉ុង ដីដែលកំពុងកាន់កាប់ដោយលោក ទុន ដៀត នេះគឺមានទំហំជាងកន្លះហិកតានៅមាត់សមុទ្រ ស្ថិតនៅភូមិស្មាច់ងាម សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង៕