ត្បូងឃ្មុំៈ លោកឧបនាយកដ្ឋមន្ត្រី ស ខេង ថ្លែងថា ការជួបជុំគ្នាទទួលទាននំបញ្ចុកនិយាយរឿងនយោបាយ និងលទ្ធិប្រជាធិបតេយ្យជារឿងត្រឹមត្រូវតែបើជជែកគ្នាពីការត្រៀមទៅទទួលអតីតមេដឹកនាំអតីតគណបក្សប្រឆាំងចូលមកធ្វើបដិវត្តន៍ពណ៌ វាជារឿងខុស។
លោករដ្ឋមន្ត្រីក្រសួងមហាផ្ទៃបានថ្លែងដូច្នេះ ក្នុងពេលលោកធ្វើជាអធិបតីក្នុងទិវាសប្តាហ៍ជាតិសុវត្ថិភាពចរាចរណ៍លើកទី១២ នាព្រឹកថ្ងៃអង្គារម្សិលមិញនៅស្រុកពញាក្រែក ខេត្តត្បូងឃ្មុំ។ លោកថ្លែងថា ការណែនាំឲ្យមានការរៀបចំទិវាហូបនំបញ្ចុករបស់លោកនាយករដ្ឋមន្ត្រី ហ៊ុន សែន គឺជានំបញ្ចុកសាមគ្គី។ ប៉ុន្តែមានក្រុមខ្លះបានជួបជុំគ្នា និយាយរឿងផ្សេង ដែលប៉ះពាល់ដល់សន្តិភាព និងស្ថិរភាពសង្គម។
បើទោះបីជាលោក ស ខេង មិនបាននិយាយចំឈ្មោះក្រុមណាមួយ ក៏គេយល់ថា លោកនិយាយសំដៅទៅក្រុមអ្នកគាំទ្រអតីតគណបក្សសង្គ្រោះជាតិ ខណៈដែលក្រុមនេះក៏បានរៀបចំពិធីជួបជុំគ្នាទទួលទាននំបញ្ចុកកាលពីថ្ងៃអាទិត្យផងដែរ។
លោក ស ខេង ថ្លែងថា៖ «ក៏ប៉ុន្តែ មានអ្នកខ្លះនោះ ហូបនំបញ្ចុក គ្រាន់តែយកឈ្មោះថា នំបញ្ចុកទេ ប៉ុន្តែធាតុពិតគឺជាការប្រជុំ។ ប្រជុំយើងត្រូវចែកឲ្យដាច់ជា ២ ទៀត បើប្រជុំរឿងនយោបាយ តាមគោលការណ៍នៃលទ្ធិប្រជាធិបតេយ្យ ក៏អត់អីដែរ។ ចង់និយាយថា ប្រជុំដើម្បីរៀបចំត្រៀមខ្លួនបោះឆ្នោតឆ្នាំ ២០២២ ឆ្នាំ ២០២៣ ក៏អត់អីទេ ល្អ ព្រោះដើម្បីពង្រឹងលទ្ធិប្រជាធិបតេយ្យ។ ប៉ុន្តែការហូបនំបញ្ចុក ប្រជុំដើម្បីប្រមូលគ្នា ចាត់តាំងគ្នាមកធ្វើបដិវត្តន៍ពណ៌ ផ្ដួលរំលំរដ្ឋាភិបាលអាហ្នឹងខុស។ សុំចែកឲ្យដាច់បញ្ហានេះ»។
លោកបន្តថា ក្រុមខ្លះជ្រកក្រោមស្លាកនំបញ្ចុក ប៉ុន្តែពួកគេមិនមាននំបញ្ចុកទេ ពួកគេហូបបាយ ឬបបរ។
លោកថា៖ «កន្លែងមួយចំនួននោះ រៀបចំផែនការប្រមូលកម្លាំងទៅទទួលមេដឹកនាំគេ មកបំបះបំបោរធ្វើចលនាបដិវត្តន៍ពណ៌។ អានោះដែលជាបញ្ហាយើងត្រូវយកចិត្តទុកដាក់ មិនមែនថា យើងមិនឲ្យគាត់ធ្វើសកម្មភាពនយោបាយទេ អត់ទេ។ អ្នកណាទៅហាមឃាត់គាត់ជំនុំគ្នាហូបនំបញ្ចុកក្តី មិនត្រឹមតែនំបញ្ចុកទេ គាត់ជំនុំគ្នា ដើម្បីរៀបចំកម្លាំងត្រៀមបោះឆ្នោត ២០២២-២០២៣ អត់អីទេ យើងគាំទ្រទៅទៀត។ ក៏ប៉ុន្តែបើមកបំផុសចលនាចលាចលផ្ដួលរំលំរដ្ឋាភិបាល ដែលកើតចេញពីការបោះឆ្នោត តាមរយៈបដិវត្តន៍ពណ៌ អាហ្នឹងខុស សូមចាំឲ្យច្បាស់ចំណុចនេះ»។
លោក ស ខេង ថ្លែងថា ករណីមានការជួបជុំជជែករឿងដែលខុសនោះ លោកមិនឲ្យសមត្ថកិច្ចទៅចាប់ពួកគាត់ទេ ប៉ុន្តែត្រូវពន្យល់អប់រំ និងបកស្រាយជូនអ្នកដែលចូលរួមទាំងនោះ។ លោកថា ការជួបជុំដែលអាចនាំឲ្យមានចលាចល ឬបដិវត្តន៍ពណ៌ គឺបំផ្លាញសន្តិភាព និងស្ថិរភាពប្រទេស។
កាលពីថ្ងៃអាទិត្យកន្លងទៅ ទាំងសមាជិកគណបក្សកាន់អំណាចគ្រប់លំដាប់ថ្នាក់ បានជួបជុំគ្នាទទួលទាននំបញ្ចុក តាមការណែនាំរបស់លោកនាយករដ្ឋមន្ត្រី ហ៊ុន សែន។ ការទទួលទាននំបញ្ចុកនេះ ធ្វើឡើងស្រប ពេលដែលសមាជិកអតីតគណបក្សសង្គ្រោះជាតិ នៅតាមខេត្តមួយចំនួន ក៏បានជួបជុំគ្នាទទួលទាននំបញ្ចុកដែរ។
ការប្រកាសទទួលទាននំបញ្ចុក របស់សមាជិកអតីតគណបក្សប្រឆាំងបានធ្វើឡើងបន្ទាប់ពីមាន សកម្មជនចំនួន ៣៥ នាក់ នៅខេត្តបាត់ដំបង ដែលធ្លាប់ជួបជុំគ្នាហូបនំបញ្ចុក ត្រូវបានកោះហៅទៅសាកសួរនៅតុលាការ ពាក់ព័ន្ធនឹងការបំពានលើសាលដីកាតុលាការកំពូល។
ឧត្តមសេនីយ៍ឯក ឆាយ គឹមខឿន អ្នកនាំពាក្យអគ្គស្នងការនគរបាលជាតិបានថ្លែងពីម្សិលមិញថា អ្វីដែលលោក ស ខេង បានលើកឡើងជារឿងត្រឹមត្រូវ។
លោក គឹមខឿន ពន្យល់ថា៖ «រឿងទី១ គឺពាក់ព័ន្ធនឹង CNRP។ រឿង ១ ទៀត សម រង្ស៊ី ត្រឡប់មកវិញ ដឹងគាត់ជាស្អីទេ? គាត់ជាទណ្ឌិត ដែលយើងប្រុងចាប់ខ្លួន។ អ៊ីចឹងបើគាត់ប្រជុំជជែកគ្នាប្រមូលកម្លាំងប្រុងនឹងមកគាំទ្រលោក សម រង្ស៊ី ស្មើនឹងគាត់មកប្រឆាំងនឹងសាលដីកាដែលស្នើចាប់ខ្លួន សម រង្ស៊ី អាហ្នឹងខុសច្បាប់ហើយ។ បើគាត់រៀបចំផែនការអ៊ីចឹង បានន័យថា គាត់រៀបចំផែនការបង្កចលាចលសង្គម»។
លោកបន្តថា៖ «អ៊ីចឹងបើយើងរកឃើញភ័ស្តុតាងអ៊ីចឹងមែន បើភ័ស្តុតាងមិនច្បាស់លាស់យើងត្រូវអប់រំណែនាំដូចសម្ដេចមានប្រសាសន៍។ តែបើគាត់មានការមានះ ចចេសហើយធ្វើឲ្យមានភ័ស្តុតាងជាក់ស្ដែង អាហ្នឹងយើងនឹងរៀបចំសាច់រឿង បញ្ជូនទៅតុលាការ»។
លោក គឹមខឿន ថ្លែងថា លោកមិនអាចប្រាប់បានទេថា តើការជួបជុំគ្នាត្រៀមរៀបចំទៅទទួលលោក សម រង្ស៊ី កើតឡើងនៅកន្លែងណាខ្លះដោយលោកគ្រាន់តែបញ្ជាក់ថា សមត្ថកិច្ចមានតម្រុយហើយ។
អ្នកវិភាគនយោបាយ លោក ឯម សុវណ្ណារ៉ា ថ្លែងថា ទស្សនៈរបស់លោក ស ខេង មិនអាក្រក់ទេ។
ប៉ុន្តែលោកថា៖ «ការលើកយកពាក្យបដិវត្តន៍ពណ៌ មកលាបពណ៌នោះបានន័យថា រលកបដិវត្តន៍ វាមកលងអារម្មណ៍អ្នកនយោបាយយើងវិញទេ។ អ្វីដែលយើងទទួលស្គាល់ការពិតគឺច្បាប់រដ្ឋធម្មនុញ្ញយើង ផ្ដល់សិទ្ធិសេរីភាព ដល់ពលរដ្ឋនៅក្នុងការបញ្ចេញមតិ សិទ្ធិនយោបាយរបស់ខ្លួន អនុវត្តបាននៅក្នុងសង្គមប្រជាធិបតេយ្យ កុំឲ្យតែការធ្វើនយោបាយនោះវាខុសគោលការណ៍ច្បាប់។ ប៉ុន្តែកុំឲ្យអ្នកមានអំណាច ឬអ្នក នយោបាយប្រើគោលការណ៍ច្បាប់នេះទៅគាបសង្កត់ធ្វើឲ្យប៉ះពាល់ដល់សេរីភាពពលរដ្ឋ»៕