ភ្នំពេញៈ ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោកអះអាងថា ការដំឡើងឋានន្ដរស័ក្ដិ និងតែងតាំងមុខងារមន្ត្រីយោធា គឺឈរលើការវាយតម្លៃយ៉ាងយុត្តិធម៌ និងតម្លាភាពហើយត្រូវបានពិនិត្យយ៉ាងល្អិតល្អន់ពីថ្នាក់ដឹកនាំដោយមិនមានការសូកប៉ាន់ទេ។
ការថ្លែងរបស់លោក ហ៊ុន ម៉ាណែត បែបនេះ ធ្វើឡើងក្នុងពេលដែលលោកធ្វើជាអធិបតីក្នុងពិធីប្រកាសតែងតាំងលោកវរសេនីយ៍ឯក នូវ សំអុល ជាមេបញ្ជាការតំបន់ប្រតិបត្តិការសឹករងខេត្តព្រះសីហនុ កាលពីថ្ងៃព្រហស្បតិ៍សប្ដាហ៍មុន។
លោកឧត្តមសេនីយ៍ឯក ហ៊ុន ម៉ាណែត បានលើកឡើងថា ការដំឡើងឋានន្ដរស័ក្ដិ និងតែងតាំងមុខងារនៅខេត្តព្រះសីហនុនាពេលនេះ គឺបានឈរលើការពិនិត្យ និងវាយតម្លៃពីថ្នាក់ដឹកនាំនៃកងយោធពលខេមរភូមិន្ទ ពិសេសការវាយតម្លៃអំពីឆន្ទៈ សមត្ថភាព សុខភាព អតីតភាពការងារ ចំណេះដឹង បទពិសោធ សីលធម៌ ការតស៊ូឧស្សាហ៍ព្យាយាម និងឥរិយាបថ ទទួលខុសត្រូវចំពោះការងាររបស់សាមីខ្លួននីមួយៗ។
លោកបានបញ្ជាក់ថា៖ «គោលការណ៍របស់កងទ័ពជើងគោក ចាប់ពីតំបន់ប្រតិបត្តិការសឹក និងកងទ័ពព្រំដែន ថៃ ការជ្រើសរើសមេបញ្ជាការ និងនាយសេនាធិការត្រូវមានគណៈកម្មការជើងគោកមួយក្នុងការវាយតម្លៃ ជាច្រើនថ្នាក់ ក្នុងនោះមាន ទី១ គឺការវាយតម្លៃរបស់អង្គភាពផ្ទាល់...បន្ទាប់ពីឆ្លងឯកឧត្តមមេបញ្ជាការភូមិភាគហើយ ត្រូវដាក់ចូលទៅក្នុងកងទ័ពជើងគោកដើម្បីធានាបាននូវតម្លាភាព និងប្រសិទ្ធភាព»។
ជាមួយគ្នានេះ លោកក៏បានព្រមានដល់មន្ត្រីផ្សេងៗផងដែរ ដោយកុំឲ្យពាក់ព័ន្ធនឹងការទទួលសំណូក ឬក៏សូកប៉ាន់ដើម្បីទទួលបានឋានន្ដរស័ក្ដិ ឬមុខងារ ហើយលោកបានស្នើឲ្យមន្ត្រីដែលដឹងពីអំពើពុករលួយ ឬការសូកប៉ាន់ ត្រូវរាយការណ៍ជាសម្ងាត់ ដើម្បីឲ្យបញ្ជាការកងទ័ពជើងគោកស៊ើបអង្កេត និងដាក់ពិន័យទៅតាមបទបញ្ជាផ្ទៃក្នុងកងយោធពលខេមរភូមិន្ទ និងចាត់វិធានការហ្មត់ចត់តាមច្បាប់។
លោកបានបញ្ជាក់ថា៖ «រឿងផលប្រយោជន៍គឺហាមដាច់ខាតមិនឲ្យមាន ដូច្នេះខ្ញុំសូមប្រកាសនៅទីនេះតែម្តង បើនាយទាហានណាដឹងព័ត៌មាននេះ សូមជូនដំណឹងមកខ្ញុំ...យើងមិនឲ្យមាន (រឿងហ្នឹងទេ) យើងឲ្យតម្លៃអ្នកមានស្នាដៃ និងមានឆន្ទៈបម្រើជាតិមិនមែនតាមរយៈការទិញនោះទេ»។
លោកបានបន្តទៀតថា នៅខេត្តណាដែលមានសក្តានុពលក្នុងការវិនិយោគអភិវឌ្ឍរីកចម្រើន គឺទាមទារឱ្យកងកម្លាំងប្រដាប់អាវុធ មានឆន្ទៈក្នុងការដឹកនាំ និងមានលក្ខណសម្បត្តិគ្រប់គ្រាន់ក្នុងការត្រៀមជួយដល់ប្រជាពលរដ្ឋ។
លោកថា៖ «ការដំឡើងឋានន្តរស័ក្តិមុខតំណែង មិនមែនជាការផ្ទេរសិទ្ធិទេ ប៉ុន្តែជាការទទួលខុសត្រូវបន្តវេនពីមួយជំនាន់ទៅមួយជំនាន់ដើម្បីធានាបាននូវប្រសិទ្ធភាពនិរន្តរភាពក្នុងការបំពេញតួនាទី និងភារកិច្ច របស់កងយោធពលខេមរភូមិន្ទ»។
ទាក់ទងនឹងការដំឡើងឋានន្តរស័ក្ដិនេះ លោក ប៉ិច ពិសី នាយកកម្មវិធីនៃអង្គការតម្លាភាពកម្ពុជាបានស្វាគមន៍កិច្ចខិតខំប្រឹងប្រែងរបស់មេបញ្ជាការកងទ័ពជើងគោកក្នុងការទប់ស្កាត់អំពើសូកប៉ាន់ផ្សេងៗ តែលោកស្នើឲ្យអនុវត្តជាក់ស្តែងក្នុងការទប់ស្កាត់អំពើស៊ីសំណូកសូកប៉ាន់នានា។
លោកបញ្ជាក់ថា៖ «យើងស្វាគមន៍ប្រសាសន៍របស់គាត់ក្នុងការទប់ស្កាត់ភាពមិនប្រក្រតីទាំងឡាយណាទាក់ទងនឹងការតែងតាំងដោយសារកន្លងមកយើងឃើញមានការសូកប៉ាន់ដើម្បីបានតំណែង។ យើងជំរុញឲ្យមានការធ្វើសកម្មភាពផ្ទាល់ដើម្បីទប់ស្កាត់បញ្ហានេះ។ សំខាន់បំផុត គឺឆន្ទៈនិងការតាំងចិត្តក្នុងការអនុវត្តការងារនេះឲ្យមានប្រសិទ្ធភាព»៕