ភ្នំពេញៈ លោកនាយករដ្ឋមន្ត្រី ហ៊ុន សែន ណែនាំឲ្យប្រធានក្រុមការងារថ្នាក់ជាតិចុះមូលដ្ឋានធ្វើការផ្សព្វផ្សាយអប់រំប្រជាពលរដ្ឋដើម្បីពង្រឹងការគ្រប់គ្រងសភាពការណ៍ដើម្បីបញ្ចៀសកុំឲ្យមានហេតុការណ៍ផ្ដួលរំលំរដ្ឋាភិបាល ដោយបដិវត្តន៍របស់លោក សម រង្ស៊ី។
ក្នុងលិខិតចុះថ្ងៃទី ៧ ខែ ឧសភា ឆ្នាំ ២០១៩ ដែលភ្នំពេញប៉ុស្តិ៍បានទទួលកាលពីថ្ងៃព្រហស្បតិ៍ម្សិលមិញ លោក ហ៊ុន សែន បានសរសេរថា លោក សម រង្ស៊ី បានប្រកាសជាបន្តបន្ទាប់អំពីគម្រោងវិលត្រឡប់ចូលមកកម្ពុជាវិញក្នុងឆ្នាំ ២០១៩ «ក្នុងគោលបំណងដឹកនាំការធ្វើបដិវត្តន៍ពណ៌ជាថ្មី ដោយបានអំពាវនាវដល់កងកម្លាំងប្រដាប់អាវុធ និងប្រជាពលរដ្ឋឲ្យធ្វើការផ្ដួលរំលំរាជរដ្ឋាភិបាលស្របច្បាប់ ដែលកើតចេញពីការបោះឆ្នោតដោយសេរី ត្រឹមត្រូវ និងយុត្តិធម៌»។
លោកបន្តថា សកម្មភាពបែបនេះគឺជាការបំពានធ្ងន់ធ្ងរលើរដ្ឋធម្មនុញ្ញ និងច្បាប់កម្ពុជា ដែលជាលទ្ធផលអាចនាំឲ្យប្រទេសជាតិធ្លាក់ក្នុងវិបត្តិ ភាពចលាចល វឹកវរ ដែលមិនអាចប៉ាន់ស្មានបាន។
លិខិតរបស់លោក ហ៊ុន សែន បន្តថា ការវិលត្រឡប់របស់លោក សម រង្ស៊ី ឬអត់ ការធ្វើបដិវត្តន៍បានសម្រេចឬមិនសម្រេច ក៏ដូចជាការដឹកនាំបដិវត្តន៍ពណ៌របស់លោក សម រង្ស៊ី មិនចំណុះទៅលើមហិច្ឆតារបស់លោក សម រង្ស៊ី ទេ ប៉ុន្តែកត្តាសំខាន់គឺលើការគ្រប់គ្រងបានល្អប្រសើរនូវសភាពការណ៍តាមមូលដ្ឋាននានានៅទូទាំងប្រទេស។
លិខិតបន្តថា ដើម្បីគ្រប់គ្រងសភាពការណ៍តាមមូលដ្ឋាន ក្រុមការងារថ្នាក់ជាតិចុះមូលដ្ឋានរាជធានីខេត្ត «ដឹកនាំ ណែនាំ ដល់ក្រុមការងារនិងមន្ត្រី អាជ្ញាធរ កងកម្លាំងមានសមត្ថកិច្ចគ្រប់ថ្នាក់ សហការរៀបចំវេទិកាសាធារណៈគ្រប់ឃុំ ភូមិ ដើម្បីផ្សព្វផ្សាយអប់រំប្រជាពលរដ្ឋគ្រប់មជ្ឈដ្ឋានអំពីផលវិបាកនៃការផ្ដួលរំលំរាជរដ្ឋាភិបាលស្របច្បាប់ តាមរយៈសកម្មភាពបដិវត្តន៍ពណ៌ ដែលជាសកម្មភាពខុសច្បាប់ និងការវិលត្រឡប់មកកម្ពុជារបស់ទណ្ឌិត សម រង្ស៊ី ដើម្បីដឹកនាំសកម្មភាពខុសច្បាប់នេះ»។
លិខិតក៏បានណែនាំឲ្យធ្វើកំណែទម្រង់ផ្ទៃក្នុង ដោះស្រាយបញ្ហារបស់ពលរដ្ឋឲ្យបានទាន់ពេលវាលា លើកកម្ពស់សេវាសាធារណៈជូនពលរដ្ឋ និងអភិវឌ្ឍមូលដ្ឋាន និងអប់រំមន្ត្រី អាជ្ញធរ កម្លាំងសមត្ថកិច្ចគ្រប់ថ្នាក់ឲ្យបម្រើពលរដ្ឋ។
លោក ផៃ ស៊ីផាន អ្នកនាំពាក្យរាជរដ្ឋាភិបាលបានថ្លែងថា លោកមិនបានឃើញលិខិតនោះទេ ដូច្នេះលោកមិនអាចបញ្ជាក់ថាវាជាលិខិតពិត ឬក្លែងក្លាយ។
លោក សុខ ទូច ប្រធានរាជបណ្ឌិត្យសភាកម្ពុជាបានថ្លែងថា ការចេញលិខិតនេះមានទិដ្ឋភាព ៣ គឺទី១ ការអំពាវនាវរបស់លោក សម រង្ស៊ី ឲ្យកងកម្លាំងមិនស្ដាប់បង្គាប់នោះអាចកើតមាន ប្រសិនបើរដ្ឋាភិបាលមិនបានណែនាំ។ ទី២ លោកថា បើសិនជាមានការកើតឡើងបដិវត្តន៍មែននោះ នឹងមានការបង្ក្រាបពីរដ្ឋាភិបាលដែលធ្វើឲ្យពលរដ្ឋរងគ្រោះ ប៉ុន្តែលោក សម រង្ស៊ី មិនរងផលប៉ះពាល់ដោយសារលោកនៅក្រៅប្រទេស។ ទិដ្ឋភាពមួយទៀតលោកថា គឺជាការព្យាយាមរបស់រដ្ឋាភិបាលកុំឲ្យហេតុការណ៍អ្វីមួយកើតឡើង ពីព្រោះរដ្ឋាភិបាលជាអ្នកទទួលខុសបើសិនមានការបង្ហូរឈាមកើតឡើង។ លោកបន្តថា មានឧទាហរណ៍ថ្មីៗនៅកូរ៉េខាងត្បូង ដែលអ្នកគាំទ្របានជួជុំគ្នាធ្វើបាតុកម្មភ្លើងទៀន។
លោកថ្លែងថា៖ «ការផ្ញើសារនេះជាការដាស់តឿនក្រើនរំឭក កុំឲ្យមានរឿងកើតឡើងដោយសាររដ្ឋាភិបាលធ្វើមិនដឹងមិនឮ។ បើរដ្ឋាភិបាលមិនធ្វើសកម្មភាព អត់ពន្យល់អត់អី ស្រាប់តែពេលផ្ទុះមានការបង្ហូរឈាម សំណួរគឺថា ហេតុអីបានរដ្ឋាភិបាលមិនពន្យល់ប្រជាជន?»៕