ភ្នំពេញៈ លោកនាយករដ្ឋមន្ត្រី ហ៊ុន សែន ថ្លែងកាលពីម្សិលមិញថា «ច្បាប់ស្ដីពីការគ្រប់គ្រងប្រទេសជាតិក្នុងភាពអាសន្ន» នឹងចេញក្រោយចូលឆ្នាំខ្មែរ ហើយលទ្ធភាពនៃការអនុវត្តច្បាប់នេះមានតែ ០,១ ភាគរយប៉ុណ្ណោះ ដោយយោងលើស្ថានភាពជំងឺកូវីដ ១៩ នៅកម្ពុជាបច្ចុប្បន្ន។
ថ្លែងក្នុងសន្និសីទសារព័ត៌មានពិសេសកាលពីម្សិលមិញនៅ វិមានសន្តិភាព លោក ហ៊ុន សែន ថ្លែងថាសេចក្ដីព្រាងច្បាប់ស្ដីពីការគ្រប់គ្រងប្រទេសជាតិក្នុងភាពអាសន្នអាចនឹងក្លាយជាច្បាប់ពេញលេញក្រោយចូលឆ្នាំខ្មែរ បន្ទាប់ពីឆ្លងកាត់នីតិវិធីនៅរដ្ឋសភា ព្រឹទ្ធសភា និងក្រុមប្រឹក្សារដ្ឋធម្មនុញ្ញ។
កាលពីម្សិលមិញរដ្ឋសភាបានចេញសេចក្ដីប្រកាសព័ត៌មានដោយបញ្ជាក់ថា សេចក្ដីព្រាងច្បាប់នេះត្រូវបានគណៈកម្មាធិការអចិន្រៃ្តយ៍នៃរដ្ឋសភាពបានអនុម័តច្បាប់នេះរួចហើយ។ សេចក្ដីប្រកាសបញ្ជាក់ថា ច្បាប់នេះត្រូវបាន «បញ្ជូនទៅកាន់គណៈកម្មការនីតិកម្ម និងយុត្តិធម៌នៃរដ្ឋសភាដោយសហការជាមួយគណៈកម្មការមហាផ្ទៃ ការពារជាតិ និងមុខងារសាធារណៈនៃរដ្ឋសភា ពិនិត្យ សិក្សា ហើយធ្វើរបាយការណ៍ជូនគណៈកម្មាធិការអចិន្រៃ្តយ៍រដ្ឋសភាវិញ»។
លោក ហ៊ុន សែន ថ្លែងថាថ្ងៃសុក្រនេះ សភាអាចនឹងប្រជុំពេញអង្គដើម្បីអនុម័តច្បាប់នេះ។ វាត្រូវការពេលវេលាប្រហែល ១ អាទិត្យនៅព្រឹទ្ធសភា ប៉ុន្តែបន្ទាប់ពីឆ្លងសភានៅថ្ងៃសុក្រនេះ វាជាពេលវេលាចូលឆ្នាំ។ លោកថា លោកបានស្នើសុំព្រឹទ្ធសភាឲ្យមានការកោះប្រជុំវិសាមញ្ញរួចហើយ ប៉ុន្តែដោយសារបញ្ហាសុវត្ថិភាព វាអាស្រ័យថា តើព្រឹទ្ធសភាអាចប្រជុំមុនចូលឆ្នាំបានឬអត់?
លោកបន្តថា បន្ទាប់ពីព្រឹទ្ធសភាអនុម័តច្បាប់នេះត្រូវឆ្លងកាត់ការត្រួតពិនិត្យអំពីធម្មនុញ្ញភាពរបស់វាពីសំណាក់ក្រុមប្រឹក្សាធម្មនុញ្ញ។
លោកថ្លែងថា៖ «ដូច្នេះការប៉ាន់ស្មានថ្ងៃនេះគឺថ្ងៃទី ៧ មេសា ដល់ថ្ងៃសុក្រ ទី១០ សភាសម្រេច។ ដល់ថ្ងៃ ១៣ ឬ ១៤ ចូលឆ្នាំ។ អ៊ីចឹងទេច្បាប់នេះអាចក្រោយចូលឆ្នាំខ្មែរ»។
ទោះបីយ៉ាងណាលោកថា លទ្ធភាពនៃការប្រើច្បាប់នេះមានតែ ០,១ ភាគរយប៉ុណ្ណោះ ពីព្រោះលោកមានជំនឿរហូតដល់ជាង ៩៩ ភាគរយថា កម្ពុជាអាចគ្រប់គ្រងសភាពការណ៍ពាក់ព័ន្ធនឹងជំងឺកូវីដ១៩ បាន។ សភាពការណ៍របស់កម្ពុជាមិនទាន់ដល់អាសន្នដែលត្រូវដាក់ប្រញាប់ប្រញាល់នោះទេ។ តែកម្ពុជាមានតម្រូវការចាំបាច់ឲ្យមានច្បាប់នេះក្នុងដៃតែប៉ុណ្ណោះ។
លោកបញ្ជាក់ដែរថា លោកមិនចង់ប្រើច្បាប់នេះទេ ព្រោះការប្រកាសដាក់ប្រទេសក្នុងគ្រាអាសន្នធ្វើឲ្យប៉ះពាល់ដល់សិទ្ធិពលរដ្ឋ និងប៉ះទង្គិចដល់បញ្ហាសេដ្ឋកិច្ច និងបញ្ហាជាច្រើនទៀត។
លោកថ្លែងយ៉ាងដូច្នេះថា៖ «កាលណាសភាពការណ៍ត្រួតត្រាលែងបានដោយបទបញ្ជា ដោយការអំពាវនាវហើយ គេដាក់ហើយ កុំឆ្ងល់ពេកនិយាយឲ្យវាស្រួលស្ដាប់។ បើនិយាយគ្នាលែងស្ដាប់ រដ្ឋាភិបាលអំពាវនាវថា កុំឲ្យមានការប្រមូលផ្ដុំគ្នាក្រែងលោវាឆ្លងជំងឺ កុំឲ្យមានបញ្ហានេះអ៊ីចេះ បញ្ហានោះអ៊ីចុះ និយាយគ្នាលែងស្ដាប់ គេប្រកាសដាក់ហើយ»។
សេចក្ដីព្រាងច្បាប់ស្ដីពីការគ្រប់គ្រងប្រទេសស្ថិតក្នុងភាពអាសន្នមាន ៥ ជំពូក និង ១១ មាត្រា។ ច្បាប់នេះមានចែងពីការដាក់ទោសទណ្ឌអ្នកល្មើសដោយត្រូវជាប់ពន្ធនាគារពី ១ ឆ្នាំរហូតដល់ ១០ ឆ្នាំតាមលក្ខខណ្ឌមានចែង និងបន្ថែមដោយការផាកពិន័យ។
កាលពីថ្ងៃចន្ទ អង្គការសិទ្ធិមនុស្សចំនួន ៤ រួមមាន អង្គការ CIVICUS, FORUM-ASIA, Frontline Defenders និង Civil Rights Defenders បានបង្ហាញក្ដីបារម្ភអំពីឥទ្ធិពលនៃច្បាប់នេះ ដោយលើកឡើងថា វាផ្ដល់នូវអំណាចទៅអង្គនីតិប្រតិបត្តិធ្វើឲ្យប៉ះពាល់ដល់សេរីភាពជាមូលដ្ឋាន គ្មានចំណុចបញ្ចប់ច្បាស់លាស់។
ក្រុមអង្គការដដែលលើកឡើងថា៖ «រដ្ឋាភិបាលកម្ពុជាត្រូវតែធ្វើការកែសម្រួលច្បាប់នេះជាបន្ទាន់ ដើម្បីឲ្យវាស្របទៅនឹងច្បាប់សិទ្ធិមនុស្ស និងបទដ្ឋានអន្តរជាតិ។ បើមិនដូច្នេះទេ អំណាចនៃភាពមានអាសន្ននេះនឹងត្រូវបានប្រើជាអាវុធមួយទៀតក្នុងឃ្លាំងអាវុធរបស់កម្ពុជា ដើម្បីកម្ទេចមតិប្រឆាំង បង្ក្រាបអ្នករិះគន់ និងបំបិទមាត់អ្នកការពារសិទ្ធិមនុស្ស»។
គិតត្រឹមព្រឹកថ្ងៃអង្គារម្សិលមិញកម្ពុជារកឃើញអ្នកឆ្លងម្នាក់ទៀត ដែលជាស្ត្រីទេសចរជនជាតិវៀតណាមអាយុ ២៧ ឆ្នាំ។ ស្ត្រីរូបនេះបានចាកចេញពីក្រុងបាវិត ខេត្តស្វាយរៀងកាលពីថ្ងៃទី ២ ខែមីនា ទៅប្រទេសវៀតណាម ហើយបានត្រឡប់មកវិញនៅថ្ងៃទី ១០ មីនា។ ស្ត្រីរូបនេះមានមិត្តប្រុសជនជាតិចិនដែលបានចាកចេញពីកម្ពុជាកាលពីថ្ងៃទី ៣ មេសា។
ក្រសួងសុខាភិបាលបញ្ជាក់ថា តួលេខអ្នកមានជំងឺនេះសរុបនៅកម្ពុជាមានសរុប ១១៥ នាក់ ប៉ុន្តែ ៥៨ នាក់ បានជាសះស្បើយបូកទាំងអ្នកជាសះស្បើយចំនួន ៥ នាក់កាលពីម្សិលមិញ។ អ្នកមានវីរុសនេះដែលកំពុងសម្រាកព្យាបាលនៅតាមមន្ទីរពេទ្យនានាមានចំនួន ៥៧ នាក់៕