លោក Mike Pompeo រដ្ឋមន្ត្រីការបរទេសអាមេរិក និងលោកនាយករដ្ឋមន្ត្រី ហ៊ុន សែន។ រូបថត រង្សី និង Twitter
ភ្នំពេញៈ លោកនាយករដ្ឋមន្ត្រី ហ៊ុន សែន និង លោក Mike Pompeo រដ្ឋមន្ត្រីការបរទេសសហរដ្ឋអាមេរិកបានសន្ទនាគ្នាតាមទូរស័ព្ទកាលពីព្រឹកម្សិលមិញ ដោយពិភាក្សាគ្នាជាពិសេសពាក់ព័ន្ធនឹងជំងឺកូវីដ ១៩ និងបញ្ហាមួយចំនួនទៀត។ នេះបើតាមការបញ្ជាក់របស់ក្រសួងការបរទេសកម្ពុជា។
សេចក្ដីប្រកាសព័ត៌មានរបស់ក្រសួងការបរទេសបានថ្លែងថា លោក ហ៊ុន សែន និងលោក Pompeo បានបង្ហាញការពេញចិត្តចំពោះការជួយគ្នាទៅវិញទៅមកក្នុងគ្រាលំបាកនៃការប្រឆាំងនឹងការរាលដាលពេញពិភពលោកនៃជំងឺកូវីដ ១៩។ លោក Pompeo បានអរគុណកម្ពុជាចំពោះការជួយសង្គ្រោះអ្នកដំណើរលើនាវាកម្សាន្ត MS Westerdam កាលពីខែកុម្ភៈដែលនាវានោះមានពលរដ្ឋអាមេរិកាំងជាង ៦០០ នាក់។
ចំណែកលោក ហ៊ុន សែន វិញក៏បានអរគុណសហរដ្ឋអាមេរិកផងដែរ ដែលបានផ្ដល់ជំនួយ និងកិច្ចសហការពីសំណាក់អ្នកជំនាញនៃមជ្ឈមណ្ឌលបង្ការ និងទប់ស្កាត់ជំងឺឆ្លងអាមេរិក និងការផ្ដល់ជំនួយទឹកប្រាក់ ២ លានដុល្លារ សម្រាប់ការប្រឆាំងនឹងជំងឺកូវីដ ១៩។ បើតាមក្រសួងការបរទេសក្រៅពីបញ្ហាពាក់ព័ន្ធនឹងរឿងកូវីដ ១៩ កិច្ចសន្ទនាក៏បាននិយាយដល់បញ្ហាផ្សេងទៀតផងដែរ។
.jpg)
ក្រសួងការបរទេសបញ្ជាក់ថា៖ «ជាមួយនឹងការអះអាងថា អាមេរិកនឹងបន្តជួយគាំទ្រដល់កិច្ចប្រឹងប្រែងនានាដើម្បីសុខភាព សុវត្ថិភាពរបស់ប្រជាជនកម្ពុជា ឯកឧត្តម Pompeo បានស្វាគមន៍សេចក្ដីថ្លែងការណ៍របស់រាជរដ្ឋាភិបាលកម្ពុជាស្ដីពីអធិបតេយ្យភាពជាតិគាំទ្រគ្រប់ទម្រង់នៃកិច្ចសហប្រតិបត្តិការផ្នែកសន្តិសុខអាស៊ាន ហើយបញ្ជាក់ពីសារៈសំខាន់នៃសេរីភាពក្នុងការបញ្ចេញមតិ ទោះបីមតិនោះខុសគ្នាក៏ដោយ»។
លោក ហ៊ុន សែន បានលើកឡើងពីតួនាទីសំខាន់របស់អាមេរិកក្នុងតំបន់ វិភាគទានរបស់អាមេរិក និងសារៈសំខាន់របស់អាមេរិកក្នុងការកាត់បន្ថយគម្លាតរវាងប្រទេសនានាក្នុងតំបន់មេគង្គក្រោម និងសមាជិកអាស៊ានផ្សេងទៀត។ លោកក៏បានអរគុណចំពោះកម្មវិធីអ្នកស្ម័គ្រចិត្តអាមេរិកដែលបានជួយដល់សង្គមកម្ពុជាផងដែរ។
លោក ហ៊ុន សែន ក៏បានអញ្ជើញលោក Pompeo មកបំពេញទស្សនកិច្ចនៅកម្ពុជា នៅពេលសមស្របណាមួយហើយលោកក៏បានផ្ដាំផ្ញើការគាំទ្ររបស់លោកជូនចំពោះលោក ដូណាល់ ត្រាំ ផងដែរ។
លោក កុយ គួង អ្នកនាំពាក្យក្រសួងការបរទេសបានថ្លែងថា លោកមិនមានព័ត៌មានបន្ថែមលើសពីអ្វីដែលមាននៅលើសេចក្ដីប្រកាសព័ត៌មានទេ។
លោកស្រី Emily Zeeberg អ្នកនាំពាក្យស្ថានទូតសហរដ្ឋអាមេរិកប្រចាំកម្ពុជា បានថ្លែងតាមអ៊ីមែលកាលពីម្សិលមិញថា លោក ហ៊ុន សែន និងលោក Pompeo បានសន្ទនាជាមួយគ្នាតាមទូរស័ព្ទ។ លោកស្រីថាឆ្នាំនេះជាខួបទី ៧០ ឆ្នាំនៃទំនាក់ទំនងការទូតរវាងប្រទេសទាំង ២ ហើយលោក Pompeo និងលោក ហ៊ុន សែន បានទទួលស្គាល់អំពីទំនាក់ទំនងទ្វេភាគី។ ក្នុងរយៈពេលប៉ុន្មានទសវត្សរ៍ចុងក្រោយ សហរដ្ឋអាមេរិកបានផ្ដល់ជំនួយអភិវឌ្ឍន៍ជាង ២ ពាន់លានដុល្លារដល់កម្ពុជាទៅលើវិស័យសុខាភិបាល កសិកម្ម អប់រំ ពាណិជ្ជកម្ម និងវិស័យជាច្រើនទៀត។
ខ្លឹមសារនៃអ៊ីមែលរបស់លោកស្រី Emily Zeeberg ក៏មិនខុសពីសេចក្ដីប្រកាសព័ត៌មានរបស់ក្រសួងការបរទេសដែរ ដោយលោកស្រីបានថ្លែងថាលោក Pompeo ក៏សង្កត់ធ្ងន់លើការប្ដេជ្ញាចិត្តរបស់សហរដ្ឋអាមេរិកក្នុងការជួយកម្ពុជា ដើម្បីឆ្លើយតបនឹងការរាលដាលនៃជំងឺកូវីដ១៩ និងនិយាយពាក់ព័ន្ធរឿងអធិបតេយ្យរបស់កម្ពុជា។
លោកស្រីថ្លែងថា៖ «លោករដ្ឋមន្ត្រីការបរទេស Pompeo និងលោកនាយករដ្ឋមន្ត្រី ហ៊ុន សែន ក៏បានពិភាក្សាពីសារៈសំខាន់នៃអធិបតេយ្យរបស់កម្ពុជា ក៏ដូចជា មធ្យោបាយដើម្បីពង្រឹងអភិបាលកិច្ចដោយប្រជាធិបតេយ្យដែលរួមមានសារៈសំខាន់នៃសេរីភាពបញ្ចេញមតិ ជាពិសេសក្នុងពេលវេលានេះដែលសំឡេងទាំងអស់ត្រូវការដើម្បីប្រយុទ្ធនឹងជំងឺរាតត្បាតសកល»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាយល់ថា មិនថាថ្នាក់ដឹកនាំទាំង ២ និយាយពីបញ្ហាអ្វីនោះទេ ការលើកទូរស័ព្ទនិយាយជាមួយគ្នានេះគឺជាកាយវិការល្អស្រេចទៅហើយលើទំនាក់ទំនងរវាងប្រទេសទាំង ២។
លោកថ្លែងថាតាមលោកដឹង លោកនាយករដ្ឋមន្ត្រី និងលោក Pompeo មិនធ្លាប់បាននិយាយទូរស័ព្ទជាមួយគ្នាទេពីមុនមក។ លោកថ្លែងដូច្នេះថា៖ «ការហៅទូរស័ព្ទរកគ្នាគឺជាការបោះដៃរកគ្នាជាជំហានវិជ្ជមានដ៏សំខាន់មួយក្នុងទំនាក់ទំនងកម្ពុជា និងសហរដ្ឋអាមេរិក ហើយប្រទេសទាំង ២ គួរតែចាប់ផ្ដើមលើកកម្ពស់ការយល់គ្នាឲ្យបានប្រសើរឡើង ដើម្បីកុំឲ្យមានការយល់ច្រឡំលើគ្នាតទៅទៀត»។
លោកបន្តថាក្នុងប៉ុន្មានខែចុងក្រោយនេះលោកឃើញទំនាក់ទំនងកម្ពុជា និងអាមេរិកមានភាពវិជ្ជមាន។ វិជ្ជមានគឺដោយសារតែមានការសរសេរលិខិតឆ្លើយឆ្លងរវាងលោក ហ៊ុន សែន និងលោក ដូណាល់ ត្រាំ ពាក់ព័ន្ធនឹងជំនួបកំពូល អាមេរិក-អាស៊ាន និងពាក់ព័ន្ធនឹងការជួយពលរដ្ឋអាមេរិកាំងលើនាវា Westerdam។ ថ្មីៗនេះក៏មានការឆ្លើយឆ្លងជាមួយលោក Ted Yoho តំណាងរាស្ត្រពីគណបក្សសាធារណរដ្ឋប្រចាំរដ្ឋហ្វ្ល័ររីដាដែលបានរៀបចំច្បាប់ដាក់ទណ្ឌកម្មកម្ពុជាចំពោះការជួយដល់ពលរដ្ឋអាមេរិកាំងលើកប៉ាល់ Westerdam។
លោកថ្លែងថា៖ «ខ្ញុំថា វាវិវឌ្ឍរីកចម្រើន ហើយយើងត្រូវចាប់យកកាលានុវត្តភាពនេះឲ្យទៅកាលានុវត្តភាពនៃការស្ដារឡើងវិញនូវទំនាក់ទំនងនៃប្រទេសទាំង ២ ឲ្យកាន់តែប្រសើរឡើង»៕
