កំពង់ធំ: ក្រុមបណ្ដាញសកម្មជនការពារព្រៃឡង់ ខេត្តកំពង់ធំកាលពីម្សិលមិញអះអាងថាព្រៃឡង់នៅតែរងការកាប់ទន្ទ្រាន និងលួចដឹកឈើចេញពីសំណាក់ជនល្មើសអនាធិបតេយ្យ អ្នកមានអំណាច និងមន្ត្រីមូលដ្ឋានមួយចំនួន ប៉ុន្ដែមន្ត្រីថាសកម្មភាពទាំងនោះមិនមានជាលក្ខណៈទ្រង់ទ្រាយធំទេដោយក្រសួងកំពុងមានវិធានការបន្ថែម។
សកម្មជនក្រុមស្នូលនៃបណ្ដាញការពារព្រៃឡង់ខេត្តកំពង់ធំលោក សុខ ប្លោក ថ្លែងថាលោកបានប្រទះឃើញភ័ស្តុតាងមួយចំនួនដែលបញ្ជាក់ថា សកម្មភាពកាប់បំផ្លាញព្រៃឡង់នៅតែបន្តកើតខណៈក្រុមលោកល្បាតឃើញក្នុងព្រៃឡង់ពីថ្ងៃទី ១៣ ដល់ថ្ងៃទី ១៥ ខែតុលាឆ្នាំនេះ។
លោកបន្តថា៖ «យើងបានឃើញសកម្មភាពនេះកើនឡើងខ្លាំងមែនទែន ដោយសារទី ១ យើងឃើញមានឧបករណ៍ដឹកឈើខុសច្បាប់គឺគោយន្ត។ គោយន្តរាប់រយគ្រឿងតែម្ដងនៅពេលយើងដេកជិតផ្លូវនោះ គឺមានគោយន្តជាច្រើនបានដឹកឈើជាហូរហែ ហើយមួយទៀតគឺយើងបានឃើញគល់ឈើដែលគេកាប់រួច ប៉ុន្ដែនៅសល់តែចម្រៀកប្រើការមិនបាន ចំណែកឈើល្អៗត្រូវលួចដឹកជញ្ជូនចេញបាត់ទៅហើយ»។
លោកថាភ័ស្តុតាងទាំងនេះស្ដែងឲ្យឃើញពីកំណើននៃការកាប់បំផ្លាញព្រៃឡង់ ក្រោយមានការប្រកាសដាក់ជាព្រៃអភិរក្ស។
លោក សុខ ប្លោក បានរិះគន់មន្ត្រីការពារព្រៃឈើដែលមិនបង្ក្រាប និងហាក់មិនអើពើចំពោះការកាប់បំផ្លាញព្រៃឈើនេះ។ លោកថា ទីតាំងកាប់ឈើខ្លះនៅមិនឆ្ងាយពីទីស្នាក់ការរបស់ប៉ុស្ដិ៍រដ្ឋបាលព្រៃឈើឡើយ។
តំណាងសហគមន៍ព្រៃឡង់ខេត្តកំពង់ធំលោក ហឿន សុភាព បានឱ្យដឹងថា ក្រុមសហគមន៍នៅតែសង្កេតឃើញថា មានមន្ត្រីពាក់ព័ន្ធថ្នាក់មូលដ្ឋានខ្លះនៅលួចប្រព្រឹត្តពុករលួយជាមួយឈ្មួញធ្វើឲ្យការកាប់ទន្ទ្រានព្រៃឈើនៅតែបន្តកើតមាន។
លោកបន្តថា៖ «ការពិតទៅអ្វីដែលយើងនិយាយមិនមែនជះទឹកដាក់គ្នា មិនមែនជារឿងចង់បំបាក់ម្ខាងៗទេ ប៉ុន្តែ... គឺជារឿងពិតដែលកើតឡើងនៅមូលដ្ឋាននីមួយៗ ការពិតទៅគឺមន្ត្រីមួយចំនួនមិនមែនទាំងអស់ទេ គឺយើងនិយាយតែមន្ត្រីមួយចំនួនដែលខិលខូច។ រឿងនេះខ្ញុំគិតថាពិបាកក្នុងការធ្វើសកម្មភាព ឬការងាររបស់ក្រុមយើងផងដែរ ដោយសារព្រៃឈើ វាទាក់ទងរឿងនយោបាយគឺវាពិបាកនៅក្នុងការវិនិច្ឆ័យ ការគ្រប់គ្រង ឬក៏ការនិយាយស្តី វាលំបាកមែនទែន»។
លោក ប៊ុន សុធី នាយខណ្ឌរដ្ឋបាលព្រៃឈើខេត្តកំពង់ធំកាលពីម្សិលមិញបានថ្លែងថា លោកមិនបានទទួលព័ត៌មាននេះទេ ព្រោះតំបន់ព្រៃឡង់ត្រូវបានផ្ទេរឲ្យមន្ទីរបរិស្ថានខេត្តកំពង់ធំជាអ្នកកាន់កាប់គ្រប់គ្រងហើយ។
លោកថា៖ «មន្ទីរបរិស្ថានបានចល័តមន្ត្រីឧទ្យានុរក្សទៅតាមគោលដៅនីមួយៗហើយ ខ្ញុំជារដ្ឋបាលព្រៃឈើទេ អ៊ីចឹងយើងចែកដែនសមត្ថកិច្ចគ្នាគ្រប់គ្រងវិញ។ បងអាចទាក់ទងទៅមន្ទីរបរិស្ថានគេដឹងច្បាស់ជាងខ្ញុំ»។
លោក តុប កក្កដា ប្រធានមន្ទីរបរិស្ថាន ខេត្តកំពង់ធំមិនអាចសុំការបញ្ជាក់ពីរឿងនេះបានទេកាលពីម្សិលមិញ។
យ៉ាងណាក្ដីរដ្ឋលេខាធិការ និងជាអ្នកនាំពាក្យក្រសួងបរិស្ថានលោក នេត្រ ភក្ត្រា បានថ្លែងកាលពីម្សិលមិញថា កាលពីថ្ងៃទី ៣ តុលាកន្លងទៅក្រុមបណ្ដាញការពារព្រៃឡង់បានជួបពិភាក្សា និងផ្ដល់របាយការណ៍មួយចំនួនឲ្យទៅមន្ត្រីក្រសួងបរិស្ថានរួចហើយ។
លោកបានបញ្ជាក់ថា៖ «ទាក់ទងនឹងបទល្មើសព្រៃឈើជាធម្មតាយើងទទួលស្គាល់ថា វាកើតឡើងហើយ ប៉ុន្ដែកម្រិតនៃបទល្មើសនេះទ្រង់ទ្រាយធំវាលែងមានហើយ វានៅមានតែទ្រង់ទ្រាយតូចៗហើយយើងក៏ចាំបាច់ចាត់វិធានការបន្ថែមដើម្បីកុំឲ្យបន្ដកាប់ម្ដងបន្ដិចៗបែបនេះទៀត ហើយការចូលរួមរបស់សហគមន៍គឺជាផ្នែកមួយជួយពង្រឹងការការពារបន្ថែមទៀត យើងគាំទ្រ...ពួកគាត់»។
លោកនាយករដ្ឋមន្ត្រីកាលពីថ្ងៃទី ៣១ ខែមីនា ឆ្នាំ ២០១៦ បានប្រកាសដាក់ព្រៃឡង់ជាព្រៃអភិរក្សដោយលោកបានបញ្ជាក់ថា៖ «យើងដាក់ព្រៃមួយចំនួនជាព្រៃអភិរក្សតែម្ដងដូចព្រៃឡង់ហ្នឹងឯង! ទុកវាធ្វើអីទៀត ត្រូវដាក់វាជាព្រៃការពារ អ្នកណាដែលទៅបំបួសអី ទាំងសង្គមស៊ីវិលទាំងអ្នកណាដែលទៅរុំឈើហ្នឹងឱ្យចូលរួមក្នុងចលនាការពារព្រៃឈើតែម្ដង»។
ក្រៅពីត្អូញត្អែរពីការលំបាកប្រជាសហគមន៍ការពារព្រៃឡង់ក៏មានបំណងចង់ជួបពិភាក្សាគ្នាជាមួយអាជ្ញាធរដែនដី មន្ត្រីជំនាញ និងអង្គការក្រៅរដ្ឋាភិបាល ដើម្បីបញ្ជាក់ឱ្យច្បាស់ពីការងារពួកគេផងដែរចៀសវាងការលាបពណ៌លើសហគមន៍ដែលកំពុងបំពេញការងារដែលប្រឈមគ្រោះថ្នាក់នេះ។
កាលពីថ្ងៃ ៩ ឧសភាឆ្នាំ ២០១៦ រាជរដ្ឋាភិបាលបានប្រកាសបង្កើតតំបន់ព្រៃឡង់ជាតំបន់ដែនជម្រកសត្វព្រៃមានផ្ទៃដីជាង ៤៣ ម៉ឺនហិកតា (៤៣១៦៨៣ ហិកតា) គ្របដណ្ដប់លើខេត្តចំនួន ៤ រួមមាន ខេត្តព្រះវិហារ ខេត្តកំពង់ធំ ក្រចេះ និងខេត្តស្ទឹងត្រែង ក្រោមការគ្រប់គ្រងរបស់ក្រសួងបរិស្ថាន។ ប៉ុន្តែសហគមន៍នៅតែរកឃើញបទល្មើស៕