ប៉ៃលិនៈ សពរបស់លោក នួន ជា អតីតបងធំទី២ នៃរបបខ្មែរក្រហម ត្រូវបានបូជានាវេលាម៉ោង ៧ យប់ ថ្ងៃសុក្រសប្ដាហ៍មុននៅវត្តព្រំគិរីមរកត ក្នុងស្រុកសាលាក្រៅ ខេត្តប៉ៃលិន ក្រោយតម្កល់ទុកអស់រយៈពេល ៧ ថ្ងៃ កន្លងផុត។
អ្នកស្រី ឡៅ ជាលីនដា កូនស្រីទី៣ របស់ នួន ជា បានប្រាប់ភ្នំពេញប៉ុស្ដិ៍ ក្រោយពេលតម្កល់សពអស់រយៈពេល ៧ ថ្ងៃ សាច់ញាតិទាំងអស់លើកសព នួន ជា ដាក់លើឈាបនដ្ឋាន (មេរុ) ដើម្បីធ្វើការបូជាតាមប្រពៃណីព្រះពុទ្ធសាសនា។
ក្រោយកម្មវិធីបុណ្យសពបានបញ្ចប់អ្នកស្រី ជាលីនដា បានឲ្យដឹងថា សាច់ញាតិ និងកូនចៅកំពុងគិតគូរដើម្បីរៀបចំពិធីបុណ្យគម្រប់ ១០០ ថ្ងៃបន្តទៀត។
អ្នកស្រី ជាលីនដា បានប្រាប់ឲ្យដឹងថា ក្រុមគ្រួសារមានគម្រោងធ្វើស្ដូប ឬចេតិយសម្រាប់តម្កល់ធាតុលោក នួន ជា នៅក្នុងវត្ត ស្ថិតក្នុងស្រុកសាលាក្រៅ។ ទោះយ៉ាងណាក៏ដោយ អ្នកស្រីមិនទាន់អាចអះអាងបានច្បាស់លាស់នៅឡើយទេ។
អ្នកស្រី ជាលីនដា ថ្លែងថា៖ «យើងមិនទាន់ដឹងច្បាស់ ចាំមើលពិគ្រោះគ្នាមើលជាមួយបងប្អូនសិន។ យើងនឹងធ្វើខួប ១០០ ថ្ងៃទៀត។ ប៉ុន្ដែយើងមិនទាន់បានមើលពេលវេលាឲ្យបានត្រឹមត្រូវនៅឡើយទេ ព្រោះទើបចប់រួចរាល់កម្មវិធីបុណ្យសព»។
អ្នកស្រីបានឲ្យដឹងថា ក្នុងរយៈពេលកម្មវិធីបុណ្យចាប់ពីថ្ងៃដំបូងរហូតដល់ថ្ងៃទី ៧ មានយាយតា ពុទ្ធបរិស័ទ នៅជុំវិញវត្ដព្រំគិរីមរកត បានមកចូលរួមជាហូរហែដល់ថ្ងៃបូជា។
លោក រី ដារ៉ា អធិការស្រុកសាលាក្រៅ បានឲ្យដឹងកាលពីម្សិលមិញថា ពិធីបុណ្យសពលោក នួន ជា រយៈពេល ៧ ថ្ងៃ មិនមានហេតុការណ៍អ្វីគួរជាការកត់សម្គាល់កើតមានឡើងទេ គ្រាន់តែមិនមានអ្នកចូលរួមច្រើន។
លោកថ្លែងថា៖ «ខ្ញុំមិនទាន់ទទួលបានដំណឹងចំពោះកម្មវិធីបុណ្យ ១០០ ថ្ងៃបន្តទៀត របស់គាត់ទេ (នួន ជា)។ ប៉ុន្ដែបើគាត់ធ្វើបុណ្យកម្លាំងសមត្ថកិច្ចយើងនឹងនៅតែទៅជួយថែរក្សាសន្តិសុខសុវត្ថិភាពជូនពួកគាត់ដដែល»។
លោក ញ៉ឹត ថុល អតីតអធិការស្រុកសាលាក្រៅ បានលើកឡើងពីប្រវត្ដិតស៊ូកាលពីឆ្នាំ ១៩៧៥ ដែលកាលនោះលោកទើបមានអាយុ ១៥ ឆ្នាំ ដោយត្រូវរត់ភៀសខ្លួនពីសង្គ្រាមស៊ីវិលនាពេលនោះ។
លោក ថុល បានថ្លែងដោយបដិសេធមិនបកស្រាយជុំវិញប្រវត្ដិលោក នួន ជា។ ទោះយ៉ាងណាក៏ដោយអង្គជំនុំជម្រះវិសាមញ្ញក្នុងតុលាការកម្ពុជាបានឲ្យដឹងថា នួន ជា ត្រូវបានរកឃើញថា មានពិរុទ្ធក្នុងសំណុំរឿង ២ ដោយឡែកពីគ្នាបានរួមបញ្ចូលទោសជាប់ពន្ធនាគារអស់ ១ ជីវិតពីបទឧក្រិដ្ឋប្រឆាំងនឹងមនុស្សជាតិ ប្រល័យពូជសាសន៍ និងការរំលោភបំពានយ៉ាងធ្ងន់ធ្ងរទៅលើអនុសញ្ញាទីក្រុងហ្សឺណែវឆ្នាំ ១៩៤៩។
លោក ថុល ថ្លែងថា៖ «ត្រូវសួរអង្គការសហប្រជាជាតិវិញ សួរអាមេរិកវិញថា ហេតុអ្វីបានឲ្យខ្មែរក្រហមទៅអង្គុយកៅអី កាលឆ្នាំ ១៩៧៩»។
លោក ឆាំង យុ ប្រធានមជ្ឈមណ្ឌលឯកសារកម្ពុជា (DC-Cam) បានលើកឡើងថា ប្រជាជនកម្ពុជា ដែលមានសម្រស់ស្រស់ស្អាត (ចិត្ដជ្រះថ្លា) ហើយពួកគេបានចូលរួមពិធីបុណ្យសពរបស់ នួន ជា។ ប៉ុន្ដែ នួន ជា បានចាត់ទុកពួកគេ (ប្រជាជនកម្ពុជា) ជាសត្រូវ។ អ្វីទៅជាកំហុស? វាបានផ្ដល់ការអត់ឱនច្រើនណាស់ពីប្រជាជនកម្ពុជា ចំពោះការថ្កោលទោស នួន ជា។
លោក ឆាំង យុ ថ្លែងថា៖ «ពេលអ្នករៀនពីកំហុស បន្ទាប់មកអ្នកនឹងអាចស្វែងរកភាពជោគជ័យផ្ទាល់របស់អ្នកបាន។ ពីព្រោះ អ្នកមិនអាចចម្លងភាពជោគជ័យពីអ្នកដទៃបានទេ»។
សពលោក នួន ជា អតីតមេដឹកនាំក្នុងសម័យខ្មែរក្រហម ត្រូវតម្កល់ទុករយៈពេល ៧ ថ្ងៃ នៅវត្ដព្រំគិរីមរកតមុនបូជា ស្ថិតក្នុងស្រុកសាលាក្រៅ ខេត្ដប៉ៃលិន ដើម្បីធ្វើបុណ្យតាមប្រពៃណីព្រះពុទ្ធសាសនា។
តុលាការបានប្រកាសជូនដំណឹងថា នួន ជា បានទទួលមរណភាពនៅល្ងាចថ្ងៃទី ៤ ខែ សីហា ឆ្នាំ ២០១៩ នៅមន្ទីរពេទ្យមិត្តភាពខ្មែរសូវៀត ក្នុងអាយុ ៩៣ ឆ្នាំ៕