សពក្មេងរងគ្រោះ ៣ នាក់ពេលនាំយកមកធ្វើបុណ្យ។ រូបថត សហការី
កោះកុងៈ នគរបាលស្រុកស្រែអំបិល ខេត្តកោះកុង បានអះអាងពីម្សិលមិញថា ករណីក្មេងប្រុស-ស្រី ៣ នាក់ ដែលរកឃើញស្លាប់ក្នុងទឹកអូរកាលពីថ្ងៃ ១៨ វិច្ឆិកា នៅភូមិ-ឃុំបឹងព្រាវពុំមែនជាអំពើឃាតកម្មទេ បន្ទាប់ពីធ្វើកោសល្យវិច័យរួច។
លោក តេង ឃាន ប្រធានផ្នែកនៃអធិការដ្ឋាននគរបាលស្រុកស្រែអំបិលបានប្រាប់ថា ក្មេងទាំង ៣ នាក់ ដែលលង់ទឹកស្លាប់នោះទី១ ឈ្មោះ ជឿន រក្សា ភេទប្រុស អាយុ ៧ ឆ្នាំ, ទី២- ឈ្មោះ ចិត្ត វិរិន ភេទប្រុស អាយុ ៥ ឆ្នាំ និងម្នាក់ទៀតឈ្មោះ ឆៃ សៀវវើ ភេទស្រី អាយុ ៣ ឆ្នាំ ពួកគេរស់នៅភូមិ-ឃុំខាងលើ។
លោកថា៖ «ក្មេងរងគ្រោះទាំង ៣ នាក់ ខាងជំនាញបច្ចេកទេសវិទ្យាសាស្ត្រ និងគ្រូពេទ្យបានធ្វើកោសល្យវិច័យមិនរកឃើញថាជាអំពើឃាតកម្មអីទេ»។
.jpg)
ដោយឡែកលោក ស៊ិន វណ្ឌិន នាយប៉ុស្តិ៍នគរបាលឃុំបឹងព្រាវប្រាប់ឲ្យដឹងតាមសម្ដីសាក្សីថា ក្មេងរងគ្រោះម្នាក់ ឈ្មោះ ជឿន រក្សា រៀនថ្នាក់ទី ២ នៃសាលាបឋមសិក្សាបឹងព្រាវជាកូនគ្រួសារក្រីក្រដែលឪពុកម្តាយចេញទៅធ្វើសំណង់រហូតល្ងាចទើបវិលមកផ្ទះវិញ។ ព្រឹកថ្ងៃកើតហេតុ គេឃើញក្មេងរងគ្រោះទាំង ៣ នាក់ ដើរលេងក្នុងភូមិ។ លុះថ្ងៃត្រង់ស្រាប់តែបាត់ពួកគេ ប៉ុន្តែគ្មានអ្នកចាប់អារម្មណ៍ថាពួកគេជួបបញ្ហាទេ។
លោកបន្តថា លុះដល់ម៉ោងប្រមាណ ២ រសៀល បុរសម្នាក់ឈ្មោះ រ៉ា សំ ដែលជាឪពុកមារបស់ក្មេងឈ្មោះ ជឿន រក្សា បានបាត់ក្មួយមិនឃើញទៅផ្ទះក៏ឲ្យអ្នកភូមិជួយរក។ ដោយរកក្នុងភូមិមិនឃើញក្រុមអ្នកភូមិក៏នាំគ្នាដើរទៅរកតាមអូរជាកន្លែងកើតហេតុដែលមានចម្ងាយពីភូមិប្រហែល ២០០ ម៉ែត្រ ហើយបាននាំគ្នាចុះរាវរកក៏ប្រទះឃើញពួកគេទាំង ៣ នាក់នៅក្នុងទឹកអូរនោះតែម្ដង។
លោកថា៖ «ពេលរកឃើញក្មេងរងគ្រោះខ្លួនពួកគេនៅទន់ និងខ្លួនប្រាណនៅក្តៅនឹកថា អាចនៅមានជីវិត ហើយនាំគ្នាដឹកទៅសង្គ្រោះនៅមន្ទីរពេទ្យបង្អែកស្រុក តែទៅដល់មន្ទីរពេទ្យគ្រូពេទ្យថា ពួកគេដាច់ខ្យល់ស្លាប់អស់ហើយ»។
លោកបញ្ជាក់ថា ទឹកអូរនោះមានជម្រៅប្រហែល ១ ម៉ែត្រកន្លះប៉ុណ្ណោះ ប៉ុន្តែដោយសារពួកគេនៅក្មេងពេកទើបគ្មានលទ្ធភាពការពារខ្លួនឯងបាន។ ចំពោះការស្លាប់ម្តងទាំង ៣ នាក់បែបនេះ ក្រុមអ្នកភូមិគិតថាប្រហែលជាមុនដំបូងលង់តែម្នាក់ទេ ប៉ុន្តែដល់ឃើញដូច្នោះក៏នាំគ្នាចុះជួយទើបបណ្តាលឲ្យលង់ទឹកស្លាប់ទាំង ៣ នាក់តែម្ដងយ៉ាងនេះ៕
